تجربتي مع معرض الطارق بمول العرب

ليا موقف حصل مع واحد قريبي في معرض سيارات الطارق بمول العرب بجد خدمة مبيعات سيئة للغاية , أشترى عربية كارنز من المعرض و من ساعت ما راح يتفرج عليها لحد ما اترخصت و هما كل ساعة بكلمة, اول مرة اتفقوا على سعر و في نفس الدقيقة زوده الفين جنيه, و بعدبين حددوا معاد للتسليم و غيروه مرتين , و حدد مواصفات معينة في العربية أتغيرت ساعت التسليم, ووعد بأرسل مندوب من المعرض لترخيص السيارة و بعدين رجع في كلامه وقاله لازم هو الي يجي يستلم الورق بنفسه, و بعد خناقات بعتله مندوب يرخص و بعد الترخيص المندوب طلب 400ج , و لما رحت اوديلهم صورة الرخصة عشان الضمان بلغت امير مدير التسويق بالمعرض عن السيناريو و ان ده مش اسلوب يليق بالمعرض, فكانت الصدمة البرود الي أستقبل بيه الشكوى و كئنه بيقول بناقص زبون, و خلا الواحد خارج بيقول إذا كان رب البيت بالدف ضاربا.
حسبنا الله ونعم الوكيل

فعلا الطارق الي في مول العرب في شكاوي كتير اوي منة وكان افضلك تروح سمير ريان

مفيش زي سمير ريان مع ان المندوب اللي بيبيعلي كان قرب يشد في شعره ههههههههههههه بس استحمل لحد الاخر
وسمير ريان ده نفسه راجل ميه ميه اصيل بجد

سبحان الله ناس تطلع بيهم السما وناس تنزل بيهم الارض

هما شغالين بنظام ولا فروع وفروع ؟!!!!!!!

معاملتهم تفتقر للذوق وفن البيع انا كنت متواجد بمول العرب ودخلنا معرض الطارق انا وصديقى نتفرج على Audi A4 وعجبتة وكان ناوى يحجز لاكن معاملتهم التفتقر لفن البيع واسلوب التعامل مع العملاء السلبى الطارد للعملاء مش يشجع حد انة يدخلهم مرة تانية حتى لو حيتفرج مش حيشترى صرفنا نظر فورا

على النقيض معرض القرش فى مصر الجديدة صراحة افضل بمراحل فى اسلوب التعامل دة غير بيسيب العملاء يتفرجو ويعرفهم كل التفاصيل لو سألو

موضوع زيادة السعر اظن اكثر المعارض حاليا بتعمل للاسف الموضوع دة بحجة الدولار زاد حتى اعلب اماكن لبيع Computer parts , mobile السعر غير ثابت ممكن تلاقى سعرة اليوم مختلف عن تانى يوم للاسف الكل بيتبع سياسة رفع السعر بدون اى منطق

دلوقتي في مصر بس ممكن اتنين يشتروا نفس العربية من مكانين غير بعض بفرق سعر ممكن يوصل ل5000ج

أنا بنصح اي حد يسأل مرة واتنين وعشرة قبل ما يقرر يشتري منين.

سمير ريان محترم جدا

الطارق ده من اسوء الناس اللي الواحد ممكن يتاعمل معاها بشهادة الجميع ، انا مره حجزت معاهم كارينز ، وكنت مسافر وكان ا=لازم اجيبها قبل اما اسافر وعملولي البحر طحينة ومن هنا لهنا هتاخدها وترخصها تاني يوم ، المهم الحمد لله كنت مديهم ميعاد قبل سفرب باسبوع عشان ابقى في الأمان / المهم فضلوا يلاعبوني يجي اسبوع والنهرادة لأ بكره ، النهاردة لأ بكرة ، وفي الأخر الواد السالس الغير محترم اللي هناك اسمه محمود بقيت أكلمه يكنسل عليه وميردش ، المهم روحت ردحتلهم في المعرض وقولتليهم هالغي الحجز يا ولاد ..... المهم تنحوا عليه وقالوالي حضرتك تاخد فلوس الحجز بعد 5 ايام من الغاء الحجز عشان الراجل اللي هيمضى على الفلوس بيجي من اسكندرية كل يوم اتنين واربعاء
المهم انتظرت ولغيت الحجز واليوم اللي كنت بستلم فيه الفلوس جالي أمير مدير المعرض يساومني تاني ويقولي انا ملتزم اسلمهالك كمان 48 ساعة العربية في المصنع ومجرد بس النقل لحد هنا ، قولتله مش هي في ابو رواش قالي اه قولتله هاخد مندوب معايا دلوقتي ونروح نستلمها تنح ومردش قولتله والله ما هتسلمني ولا كمان اسبوع وانا متأكد من اللي بقوله ، المهم بعد مناهدة يجي نص ساعة وخدت الفلوس وطلعت على سمير ريان خدت العربية وانا واقف ، عاينت ، دفعت الفلوس ، جابوا العربية ، غسلوها، خدتها وروحت بيها ، تاني يوم الساعة عشرة الصبح قابلت المندوب بتاع سمير ريان في المرور ورخصت واخدت الرخصة والله العظيم في ساعة واحدة بس ( 60 دقيقة بدون مبالغة) والطارق كلمني بعد اسبوع من بعد ما جابت الرعبية بيقولي العربية موجودة لو لسه بتفكر ، قولتله شكراً يا باشا مش عايز ، وقولتله مش قولتلك بعد اسبوع ضحك وسكت

موقف تاني حصل مع جاري والله بدون مبالغة ، راح هو وأخته وجوز أخته يتفرجوا على عربية في الطارق مول العربية ، المهم كان معاهم كاميرا ديجيتال كانون ، ونسيوها في عربية من اللي كانوا بيتفرجوا فيها ، المهم كلموا الطارق بعد ساعة من اكتشافهم لنسيان الكاميرا وبعد كده قالولهم الكاميرا موجودة وتمام اتفضلوا استلموها بس بكره عشان احنا هنقفل ، المهم الراجل راح يستلم الكاميرا قالوله كاميرة ايه اللي حضرتك بتسال عليها مافيش كاميرات اتنسيت هنا ، وده راح في دنيا تانية وأتجنن عليهم وكان هيكسر المعرض ، المهم جالوا أمير أفندي مدير المعرض وقالوا أهدي أهدي ، وسمع الموضوع قالوا فعلاً في كاميرا اتنسيت لنبارح وواحدة جت استلمتها ، اتجنن اكتر ، قاله مافيش حد من طرفي جه ، قاله مالناش دعوة واحدة جت ادتنا مواصفات الكاميرا واستلمتها ، المهم الراجل مكدبش خير وكلم الطارق فرع اسكندرية وقدم شكوي ، الراجل اللي هناك كان في منتهى الزوق ، قالوا حضرتك روح المرعض وكلمني من هناك واداله رقمه ، المهم المعلم راح وكلمه وفعلاً النيا اتقلبت ودخلوا وفتحوا الكاميرات ووروه الست اللي جت واستلمت الكاميرا واحدة اول مرة يشوفها ، المهم الطريقة كانت مريبة ، البنت دخلت سلمت اخدت الكاميرا ومشيت في دقيقة ، اللي هي حتى مالحقتش تكلم حد وتشرحله ، زي ما تكون واحدة راحه تستلمها وتمشي ، المهم ، الراجل قاله أدي التليفون لمدير المعرض وكان صوته جايب أخر الشارع ، لدرجة أن جاري كان سامع صوت الراجل من التليفون ، المهم ، مير قاله حضرتك قولي هي بكام واحنا نديك حقها ، جاري تنح وقاله عايز الكاميرا بتاعتي عشان عليها صور شخصية ، قاله اكتر حاجة ممكن أعملها اجيبلك غيرها وعشان خاطري كفاية مشاكل احد كده ، المهم جاري حب يلم الدور وقالهم ، انا مش هاقولكم تمنها راديو شاك قدامك اهوه ، تعالي نشف تمنها كام ، المهم قالوا اللي هتقول عليه هندفعه ، قاله تمنها جديدة 1650 جنيه ، المهم قعدوا يلفوا على بعض ولموا من بعض 1200 جنيه ، قالوا خليههملكم ، انا عايز تمن الكاميرا كامل ، قعدوا يعيطوا والله لمبنهم من بعض والله احنا مالينا ذنب وبتحاول نرضيك ، قالهم لأ ذنبكوا وانتوا مش بترضوني انتي هتتنفخوا من الأدارة عشان كده بتلموا الليلة ، قالوا احنا اسفين ومتعملناش مشاكل اكتر من كده ، خدهم ومشي وقال الم الدور كاية اني ربتهم وعلمتهم الأدب ، وكلم الراجل في اسكندرية وشكروا ، ده موقف حصل مع الطارق فرع العرب مول

مشكورر علي التحذير

الي يغيظ ان قريبي لما راحة توكيل كيا و أشتكى من الطارق قالوا انه فعلا بتجيلهم شكاوي منه كثير !!!!!!!!!!!
بس التوكيل كان فعلا محترم, و خلص كل حاجة من عنده و قال هيبقى هوا يتفاهم مع الطارق بعد كده

اللي زي الطارق زفت المصريه
الافضل سمير ريان
والقرش

معظم المعارض والتوكيلات بقت معاملتها زي الزفت .. يعني بندفع دم قلبنا وكمان مفيش معامله محترمه ولا التزام بالكلمة .. مش بنطلب حاجه اكتر من حقنا !! دي اخر تجربه مع قريبي في اوبل استرا من القرش .. ماكنتش متوقع ان معاملتهم هتبقى كده

من تاخير في التسليم .. للون مش موجود .. لعربيه فيها بقعه بهتانه في البويه في الرفرف الامامي ... تاخير في استلام الورق .. اروح المرور ارخص واقعد بالساعات وفي الاخر يندهولي عشان فيه حاجه غلط في الورق اللي واخده من القرش !!!

هي بلد بايظه ... ومن سيء لأسوأ

فرع الاسكندرية زبالة انا اتنصب عليا لما جبت العربية ب 8 الف استلام فوري و قلت ادب و بناقص الزبون

مهوا خلاص اتغنوا فبناقص الزباين

للأسف معاملتهم سيئة جداً, وعن تجربة شخصية, وقلة ذوق

انا حاجز كارينز عندهم من فترة وكل يوم يقولى بكرة كل يوم يققولى بكره اتصلت بالتوكيل قالى تعالى استلم حالا هنزل وارد عليكم فى اللى حصل وربنا يسهل الاحوال دعوتكم معى

اقتباس:

---

المشاركة الأصلية كتبت بواسطة أبــوحبيبه ونور

انا حاجز كارينز عندهم من فترة وكل يوم يقولى بكرة كل يوم يققولى بكره اتصلت بالتوكيل قالى تعالى استلم حالا هنزل وارد عليكم فى اللى حصل وربنا يسهل الاحوال دعوتكم معى

---

متابع

الحمدلله بعد ما كلمة التوكيل فى ابورواش رحتهلم شفت لونين واستلمت الحمدلله اتاخرت ساعتين فى اﻻستﻻم عشان كان معه عميل بس وبازن الله رايح المرور السبت دعواتكم