الله يرحمك عليكى يامصر

**وائل شويخ2** · 30-06-2013 08:47 AM

السلام عليكم ورحمه الله وبركاته

الله يرحمه يامصر ياحبيبتنا كلنا فين حبنا لبلدنا ولوطنا
وصل بينا الأمر للتخويين والأقتتال والتكفير
مصر بلد الأمن والأمان كما قال الله عز وجل
بدل منبص لمستقبلنا ومستقبل عيالنا
بئينا بندور أذاى نجيب البنزين والتمويين
وأزاى أخرج بليل من غير ما أودع عيالى ويمكن مرجعش
أيام الثوره وبعد نجاحها فى شيل الطاغيه مبارك
أنا واحد من الناس فرحت وهللت وقولت كل أحلامن هتتحقق
وكنت بحلم مصر كلها تكون خضرا وفى كل قريه مصنع
سيبكم من الدستور والحاجات السياسيه ألى أغلب الناس العاديه مش بتفهم فيها حاجه

ندخل على الواقع

د محمد مرسى راجل طيب ومحترم وتاريخه قال كده

لكن

أنا مواطن عادى مسلم والله وأهلى عوودونى على الصلاه والصيام والزكاه

وبحترم الكبيير ووسطى زى ما الأسلام ووسطى وبيقابل السيئه بالحسنه

مواطن مصرى حس بشىء أفضل بعد ما د مرسى مسك البلد

بل بالعكس الدنيا بتنهار أى نعم هو ماسك البلد منهاره

بس هو لو كان شد كويس على البلد وحط كل واحد فى مكانه الصح

كان حال البلد أتغيير

لو كان وقف جنب الفقير ألى كلنا بلا أثتثناء بننتمى ليهم كان حصل فرق كبيير

لو كان السيد مرسى لمس مشاعر الناس وطيبتهم كما فعل مبارك فى خطابه الأخير

لكان فرق معاه جامد

الشعب المصرى طيب ورمانسى وغلبان غلب يأخى

الناس كلها تعبانه بجد ونفسها فى حكومه تريحها وتذلل أى صعوبات تقابلها
_________________
كيلو بطاطس أيه ألى ب5جنيه

كنا زمان نتغدى بطاطس وبيض وكنا متكدرين من الغدوايه دى

شوف دلوقتى ك البطاطس بكام وطبق البيض بكام واللحمه بكام

_____________

بلاش ياعم الأكل هنطفح أى حاجه

قبل الثوره بشهر جم بتوع الصرف الصحى

مسك شوارع قريتنا وحفرها كلها

وركب مواسير الصرف الصحى والثوره قامت وسابوا الدنيا بايظه

قام الناس الغلابه جمعوا من بعض وردموا الحفر ولغايه دلوقتى مفيش جديد

_____________

هكلمكم على أيه أزمات البنزين ألى كلنا طفحنا منها
التموين ألى الغلابه واقفه عليه طابور
________________

علمانيه أيه ودينيه أيه

أحنا غلابه يابشر
مش يهمنا أيه ألى يبئا رئيس يهمنا هناكل أيه النهارده

هنعيش أزاى أحنا وعيالنا هنئمن مستقبل عيالنا أذاى

من الأخر أحنا طفحنا كلنا وزهئنا وهنطلع من هدومنا
__________________

كفايه عليكه كده أنا تعبت وعنيه دمعت وانا بكتب

رحمه الله عليكى يبامصر

**أحمد جودة** · 30-06-2013 10:19 AM

يا عم بلاش تشائم ان شاء الله بكرة احسن 100 مرة رغم أنف الحاقدين

ولا اخوان ولا معارضة ولا اى كائن على وجه الارض يقدريضيع مصر اللي ربنا ذكرها فى القرءان

**Ahmed Nasser** · 30-06-2013 11:35 AM

معاك فى كل حاجة انت قولتها بس انشاء الله بكرة احسن

**hilal** · 30-06-2013 01:28 PM

الدكتورة منال عمر قالت الآتي
بين الحرامي (مبارك وشفيق) والطماع (مرسي والاخوان)
كان الاختيار صعب ، وكان لازم نتحالف مع الطماع مؤقتا للتخلص من الحرامي
الطماع هيقضي على نفسه بنفسه
لأنه ساب مشاكل البلد وانشغل بنهب أكبر قدر من السلطة والمناصب للعصابة
بس للأسف مش هيقدر يبلعها لأن البلد كبيرة قوي عليهم
والفقرا مش هيسكتوا عليهم لحد ما يبلعوا البلد كلها

**aboamina** · 30-06-2013 01:46 PM

البلد دي كبيرة محتاجة رئيس كبير بجد يستحقها ...

**S O P H O S** · 30-06-2013 05:16 PM

ربنا يولي الصالح

**eslamrace** · 30-06-2013 06:14 PM

ربنا يرحمنا ويولى من يصلح ويارب د/ مرسي يتصرف باقصي درجات الحكمه لان الوضع كده دقيق وصعب جدا ويا ريت نتعلم من التاريخ ونخاف على الدم شويه من امبارح 8 ماتوا يا رب البلد تهدى باي شكل علشان نقدر نعيش .