اسعار البورسلين

**mrwho87** · 30-06-2013 04:49 PM

السلام عليكم

انا بوضب حاليا شقتي عشان الجواز و كنت عايز اعمل الارضيه بورسلين نزلت السلاب بس الاسعار نار محدش يعرف اماكن عندها تشكيلات كويسه و اسعارها معقوله ؟

**mr_safwt** · 30-06-2013 07:30 PM

لا دة السلاب نار فعلا روح عند رويال وليسيكو هتلاقى اسعار معقولة شوية

**medo11_1** · 30-06-2013 10:51 PM

بص يا باشا انا كنت نزلت اتفرجت فى السلاب و فى الفجالة و فى البورسلين الصينى فى الفجالة ب 85 تقريبا و كان ساعتها فى السلاب عاملين علية تخفيض من 210 الى 105
حاول تنزل الفجالة تلف هناك شوية و شوف كدة اية الكلام و قولنا عملت اية
و ربنا يعينك ان شاء الله

**shaddadfalcon1** · 30-06-2013 11:15 PM

85 للمتر؟
ياخبر

**Angel_wolf** · 01-07-2013 01:06 AM

الى موجود كلة صينى سواء الفجالة او السلاب عندك المحجوب عندة صينى واسبانى واماراتى
الصينى بيبتدى من 94 جنية هتلاقية هو بنفس الكارتونة والشكل الى موجود الفجالة بس الفكرة فى الفجالة ان ساعات كتير البلاطة مش كلها بتبقى بورسلين يعنى النص بورسلين والنص عجينة سراميك وفى ناس عندها الحجر كلة بورسلين وناس عندها طبقة واحدة على الوش كدة متفرقش حاجة عن السراميك وهيقلك بورسلين بردوا المحجوب البلاطة عندة كلها بورسلين ابعد عن بورسلين كليوبترا الشركة للاسف بتنهار والمنتجات بقت سيئة حسبى الله ونعم الوكيل فى الى كان السبب كليوبترا الى كانت مغرقة الخليج كلة بورسلين النهاردة تسمك البلاطة تلاقيها كلها دفيوهات وتروح المعارض بتاعتهم متلاقيش الا نوعين من البورسلين ولما تطلب كمية يقولك استنى 20 يوم لما نعمهملك عمولة ولا كائنها ورشة خراطة وبالنسبة للسلاب فى عندة فى الغالب نوعين نوع صينى صرف ودة زبالة ونوع تانى بيقول اسباتى ومتفنش فى الصين دة كويس بس سعرة غالى

المهم الى تركز عليه فى الشراء سواء جبت من اى مكان
1- البلاطة كلها تبقى بورسلين
2-اختار حاجة تكون سادة او فيها شغل مش كتير علشان متبقاش شبة السراميك
3-اوعى تجيب اقل من 60*60 مقاس الحجر
4-السُمك بتاع الحجر بيزيد كل لما الحجم بتاع البلاطة يبقى اكبر ودة علشان تستحمل (هتفرق معاك لو انت جايب بلاطة متر فى متر مثلا او اكبر)
5-الاسطى الى هيركب اقف على راسة علشان يزبط الفواصل على الاخر علشان ميبنش فروقات بين البلاط و بعضة مندفعش احنا دم قلبنا علشان البلاطة مقطوعة ليزر ويجيى المبلط يبهدل الدنيا كلها
6 -لو جبت بورسلين غامق اللون والوفواصل بانت فية اوعى تخلى المبلط يحط اسمنت ابيض عادى روحة اشترلية اكسد ملون من عند الموان بنفس لون البورسبين ويخلطة مع الاسمنت الابيض علشان يدارى الفواصل وكذلك اعمل كدة فى السراميك
7-ربنا يتملك على خير ويدك خير الشقة ويكفيك شرها ويتملك الجواز على خير

اى حاجة انا فى الخدمة

**omar-saad** · 01-07-2013 02:02 AM

اومال الجوهرة بكام بقى ؟

**Ahmed_Ramadan** · 01-07-2013 09:12 AM

متابع

**yassin_samir** · 01-07-2013 11:03 AM

ارخص مكان ممكن تجيب منة فى ترسا الهرم65 للمتر

**aliabdo** · 01-07-2013 11:19 AM

بص عن تجربه الستات عندنا لزم يفرشو الارض سجاد حتى لو معموله مرمر مش بورسلين؛ لو بتدور على حاجه سعرها معقول عشان اقل بورسلين صينى عامل 65 جنيه ؛ هات سيراميك اسمه قطع او لحام ليزر لما بيركب بيكون شبه البروسلين قوى و سعره من 30 جنيه و انت طالع

**shaddadfalcon1** · 01-07-2013 12:07 PM

المشاركة الأصلية كتبت بواسطة aliabdo

بص عن تجربه الستات عندنا لزم يفرشو الارض سجاد حتى لو معموله مرمر مش بورسلين؛ لو بتدور على حاجه سعرها معقول عشان اقل بورسلين صينى عامل 65 جنيه ؛ هات سيراميك اسمه قطع او لحام ليزر لما بيركب بيكون شبه البروسلين قوى و سعره من 30 جنيه و انت طالع

ههههههههه والله انت جبت المفيد
الستات عندنا فعلا بيعاملو الارضيه كانها واحده ست لازم تتستر

متعملش بورسلين الا اذا كنت هتجيب عفش مودرن عشان يبان وتبقي صرفت فلوسك في حاجه مفيده

لو هتجيب عفش كلاسيك وسجاجيد وكده يبقي احسن حاجه قضيها سيراميك نضيف وممكن تخلي البورسلين للصاله او حتي تكون مش مفروشه