أجمع ملاك النترا hd تركيب حساس صدمات للأنذار على الجهاز الأصلى للسياره
كنت عملت موضوع بسأل فيه عن كيفيه تركيب حساس صدمات لجهاز الأنذار الأصلى الخاص بهيونداى وكلنا عارفين ان الجهازما بيضربش غير لما البيبان تتفتح او الشنطه او الكبوت تمام
المهم لما قريت موضوع الهيونداى الأم دى الجديده وسمعت عن موضوع السينسور دا الموضوع شعلل فى نافوخى وقلت اكيد ينفع فى الموديل بتاعنا لأن بنسبه 80% واحد ان مكانش 100% المهم عزمت النيه وروحت للكهربائى بتاعى الموضوع مش محتاج توكيل وقعدت انا وهو ومخمخنا وفكرنا ووصلنا الحمد لله لطريقه التركيب الصحيحه 100%وبدون لعب فى ضفيرة العربيه من اساسه وخصوصا ان الكهربائى بتاعى بصراحه ربنا يباركله مخه واديه نضيفه جدا
المهم كان كل هدفنا هو اخذ اشاره الحساس لجهاز الأنذار عشان يضرب فى حاله خبط السياره او الجلوس عليهها او محاول الفتح من اى مكان يعنى من الأخر قبل ما يفتح العربيه الجهاز يضرب انذار ولقينا اننا محتاجين نبعد عن ازرار البيبان و الشنطه عشان وانت ماشى طبيعى الجهاز هيرسل اشاره فا لمبه الصالون او لمبه الشنطه متروشكش فما لقيناش قدمنا غير زرار الكبوت ايوه زرار الكبوت الفابريكا المهم عملنا تست خارجي ونجحت التجربه وزى ماقلتلكم الكهربائى بتاعى نضيف ومش عايز يعمل شغل عك ويمشى سلك فى حوض الموتور فعشان كدا عرفنا فردة السلك لونها ايه وتتبعناها هى داخله لفين جوه الصالون ومن هنا بدأنا عمليه التوصيل وتم التركيب بنجاح والحمد لله والتقفيل وبمنتهى النضافه واصبح لدى جهاز انذار كامل فابريكا مثله مثل أجهزة التركيب وعلى فكره جهاز الفابريكا بيفصل دواره العربيه من الأساس اى استفسار انا تحت امركم ولو حد حابب يروح للكهربائى بتاعى ينفذ انا تحت امركم بردو والفضل يرجع لله وملاك الهيونداى ام دى وللمهندس سمير الشهاوى اللى عامل موضوع مجمع فيه الحديث عن الفكره دى وبكدا ياجماعه مش محتاجين للتوكيل ونصبه وقصة حجز المواعيد وخصوصا ان مفيش لعب فى ضفيرة السياره نهائى
