الموضوع: التقييم الشامل ل عزيزه 2 (موضوع طويل)

بسم الله الرحمن الرحيم وهنبتدى الليله
حكايتى مع عزيزه 2 تتلخص فى الاتى بعد 500 مقارنه وكلام النـــــــاس ال يقولك لو فكرت تبيعها مش هاتجيبلك فلوس ومش هتعرف تبيعها واخرها 50 55 الف وقطع غيار نــــار
والكل اجمع على السيراتو بس ال حصل كالاتى اخدت هدنه مع نفسى وصليت صلاه استخاره لقيت نفسى مشدود لل جين 2 بطريقه فظيعه غير كده فى واحد قريبى كبير قالى كلمه مفهمتش معناها غير لما عملت بيها قالى اركب العربيه ولما تحس انها حته منك اشتريها علطول ومتفكرش كتير العربيات كلها الجديده اخرها 5 سنين كلها زى بعد ومتقعدش تقلى اوبشن ولا صاج محمل بصراحه انا مكنتش مقتنع بكلامه لحد مجربت بصراحه حسيت احساس غريب فى الجين 2 فعلا اكنها حته منى بالظبط بعكس

السيراتو حسيت انى راكب عربيه عاديه ومش قصدى ان السيراتو وحشه بالعكس العربيه ممتازه بس مش لايقه عليا , المهم بعد سؤال العضاء البروتونيين استقريت وحددت انا عايز ايه طلعتلى المشكله ان السوق كله مفهوش اوتوماتيك سبورت اسود بس الحمدالله الكوسه بتنفع للاسف فى البلد ديه المهم العربيه اتوجدت وبشروطى ال تتلخص فى الاتى العربيه ماتكونش معديه ال 50 كيلو و فتحه الكبوت على الشمال و تكون اخر شحنه المهم شوفت العربيه يوم الجمعه وكانت عامله 47 كيلو وفتحت

الكبوت على الشمال وطلعت من المصنع فى ماليزيا يوم 25/5 والحمدلله مفيش اى عيوب ماعدا خربوش صغير اوى فى الاكصدام اليمين ومطلعش البويه وطبعا بناء على توجيهات الاخوه الافاضل عملت تست على كل حاجه اتقالت فى الاستلام واستلمتها وركبت تجاريه يوم الجمعه كانت الساعه 2 بليل الصراحه كنت ماشى خايف جدا العربيه بتسحب ببشاعه غير ماكنت متخيل خالص من كتر كلام الناس على الاوتوماتيك حسيت انها ضايعه ومكنتش عايز اعدى ال 3 rpm المهم كنت

هاموت وانام عشان كان عندى شغل تانى يوم بدرى جدا المهم انا شفلى فى مدينة السادات بعد مدخل السادات ب 25 كيلو يعنى الاجمالى فى مشوار الشغل رايح جاى 240 كيلو بالميت وده اكيد الميت من عندنا ده غير الفكه يعنى فى اليوم من 260~300 العربيه فيها اوبشن لذيذ ال هوا مثبت السرعه واللذيذ فيه انك لو ماشى على هاى واى ف بثبت السرعه على اى رقم فوق الخمسين وبعدين انسى الدنيا كل الكنترول فى التاره يعنى عايز ازود عايز اقلل بتحكم فى التاره مش بدوس بنزين

والموضوع ده لاحظت ان ناس كتير مش عارفاه !!!!! الكل بيثبت وخلاص كل ده المقدمه
ندخل فى التقييم :
المميزات :
الشكل تحفه جدا ولاحظت ان كل الناس بتبص على العربيه وبتشاور عليها بطريقه غريبه اكنها عربيه ب ميليون جنيه مش عارف ليه؟؟؟!!!!!
السبورت باكيدج بيخلى شكل العربيه حلو اوى و ال بيستفسر على انحها بتحك فى المطبات جربت عليها كل مطبات مصر بحالها محكتش خالص ماشاء الله مع ان العربيه كمان شكلها واطى موت معادله صعبه مش كده
مثبت سرعه مفيد جدا لو بتسافر كتير جوه القاهره ملوش لازمه
*الاوتوماتيك خطير ماشاءالله ومتحولش وانتا واقف فى اشاره وفتحت انك تتدوس بنزين العربيه بتتجنن ومبعرفش اسيطر عليها لازم تدوس على الدواسه وتخليها تنزل من 1 الى 2 مللى بالكتير على فكره التسارع بتاعه اعلى من الباسات ومحدش يعلق على الكلام ده غير لما يقرا العيوب
الصوت الى حد ما كويس بيعجب ناس كتير بس انا بقول ناقص صب وبازوكا وسماعتين بيونير
التكيف ثلاجه على راى توت باشا قبل 12 صباحا و بعد 6 بليل
2 اير باج
abs +ebd
سنتر و 4 زجاج كهرباء
انذار كامل ومينفعش تشغل العربيه من غير مفتاحه
فوج لايت امامى وخلفى
كراسى رائعه ومريحه
شنطه بحر ومحتاجه سماعات عشان تدى احسن صوت
سواقه العربيه وصوتها بيغريك انك تجرى بطريقه بشعه عشان سرعه الاستجابه بس الحمدلله بفضل مثبت السرعه ريحنى كتير فى فترة التليين لانى كل مابسوقها ببوظ كل حاجه غصب عنى يعنى بيكون فى تسارع وبعدى ال 100 فعلا غصب عنى العربيه ديه محتاجه واحد رجله خفيفه موت على البنزين ماشاءالله
العزل رائع

العيوب:
ماتحولش تشغل التكيف ابدا و انتى ماشى براحه لان لو حاولت انك تشد شويه او تلحق تعدى من عربيه او من اشاره تتضمن تماما ان هتعمل حادثه لان الاوتوماتيك بيكون جيالوه طراوه ونايم شويه ومحتاج تعمل كيك دون وتستنى عمال مايفوق خلال ثانيتين وبيكون السحب ضعيف الى حد ما وده بيفكرنى بكلام الاستاذ سمعه والفجوه بس عامتا الموضوع ده مش فارق معايا خالص هو بيفرق مع الناس ال بتحب نشد وهيا فاتحه التكيف مش اكتر
مش حاسس انها stable بعكس الباسات بحس انى مش ماشى يعنى على 130 بحس انى قلقان وماشى بسرعه
لفه الدركسيون رخمه شويه بس بيقولو عشان رياضيه
مفيش عيوب تأفيل بس اللون بتاع زرار التكيف وعصاية الفتيس بحس انه مش معمول بنضافه وممكن يتمسح مع الوقت اكنك جايب ريموت كنترول صينى
كنت باسمع صوتيين واحد انا عارف انه طبيعى والتانى مش عاجبنى
الصوت الاول صوت الفرامل يعنى لو العربيه واقفه وجبت ال D وريحت رجلك سنه على الفرامل بتسمع صوت تزيق وده عارف انه طبيعى عشان لسه جديده
الصوت التانى صوت وانا واقف وبلف الدركسيون بسمع اكن مفيش زيت باور بس مش للدرجادى هو اقل بكتير ولازم عشان تسمعه تكون فى مكان مقفول طبعا هاتقولوى ازاى ببساطه الجراج تحت العماره فبيكون ساكت وساعتها بسمعه
الجنوط شكلها مش عاجبنى القديمه كانت احلى بالنسبالى بس فى ناس عجبتها ازواق


التوكيل:
رحت التوكيل يوم 27/8 الساعه 1:30 ابو رواش
وحظى النور كان مقطوع على عز العرب كلها ومفيش ولا تكيف شغال والجو حر
المهم دخلت وطلبت اعمل صيانه الالف طبعا شاف الرخصه بصلى واستعجب قالى انتا لسه مرخص!!!!!؟؟
قالى عايز زيت 5 ولا 10 قلتلو ايه الفرق قالى 5 تعمل صيانة ال 5 ال 10 تعمل صيانة ال 10 قلتلو عادى يعنى مش لازم اعمل صيانة ال 5 قالى لو خدمه شاقه وقالى كده كده كلها كام يوم وتيجى تعمل صيانة ال 10 على طريقه دى قلتلو اوك 10 الزيت كان توتال ومعندهمش غيرو وتكلفه الصيانه كانت 350 جنيه
وطلبت منه يبص على العفشه ويربطها
وقلتلو على الصوتيين بتاع الدركسيون والفرامل زياده تأكيد
خلصو الساعه 5 وقالى عملو تشحيم والفرامل عادى صوت طبيعى عشان جديده
وصوت الدركسيون قالى كلوك سبرنج وشحموه وكلو تمام
المهم وانا ماشى على طريق مصر اسكندريه لقيت ان الطاره مش مظبوطه مش فى السنتر مايله شويه محدش ياخد بالو منها غير على السرعات العاليه
رجعت تانى كانت الساعه 5:30 وسألت هو حد فك التاره قالولى اه قلتلهم مش مظبوطه قالولى الطريق مش مظبوط جربها فى طريق تانى ولو فى مشكله نعملها فى الحال المهم الموضوع ده مضايقنى جدا ومش عارف ارحلهم النهارده بسبب الشغل
وديه نها.. قصدى بدايه مشوارى مع عزيزه 2
ولو فى اى استفسار انا فى الخدمه معلش الموضوع طويل وممل جدا ف حاولو تاخدوه على مراحل