يخربيت برود الناس!

**p r i n c e** · 08-07-2013 06:31 PM

واحد صاحبي اتصل بيا ايوا الو ازيك يا كبير تمام الحمدلله بس تعالالي بسرعة انا ف شارع كذا و العربية قاطعة مني بنزين تعالى آخد لترين بنزين بس ادور بيهم العربية و اروح لأقرب بنزينة ( احنا هنا ف المنيا عندنا ازمة و وقفت آخر مرة 3 ساعات عشان افول ) بس مش مشكلة دا صاحبي مش هستخسر فيه 2 لتر.
المهم روحتله و سيبت مصالحي و اروح الاقيه مجهز جركن 10 لتر و خرطوم :-d
قولت أكيد هياخد 2 لتر مش هيملى الجركن كلو
حاولنا نشفط بنزين من التانك عندي بالخرطوم معرفناش خالص
كان في واحد كهربائي ف المكان اللي احنا فيه صاحبي راح سأله قاله مش عارفين نشفط بنزين من العربية
قاله لا الفيرنا دي حوار تاني هطلعلك منها بنزين بس ب 10 جنيه
بس مش من التانك
قالي افتح الكبوت و قالي هطلع البنزين من مكان الطرمبة اللي بتوصل للموتور و انا طبعا خايف على العربية لسة مكملتش 20 ألف كيلو و ان صاحبي يخلي عنده دم و يقول خلاص مش مهم
بس مفيش فايدة واقف متنح و انا محرج مش عارف اقوله لأ
الراجل فتح الكبوت و شال العلبه بتاعت الكتاوت و شال الكتاوت بتاع طرمبه البنزين و قعد يفك حاجات كدا عند الرشاشات و وصل سلكه كدا مكان كتاوت طرمبه البنزين و البنزين طلع من الرشاش الواصل للموتور ( صاحبي سابه يملى الجركن كله و قاله انا هفضل املى لحد متقولي كفاية بس سابه يملاه على الآخر بمنتهى البرود ) مش مشكلة البنزين انا بس خايف يكون العك اللي الراجل عمله دا ممكن يعملي مشكلة ف العربية
طمنوني بالله عليكم :-(

**samihanwar** · 08-07-2013 06:49 PM

كنت تنفض لصاحبك من الاول وتقوله ان الفيرنا فيها مصفى ومش هعرف اسحبلك بنزين منها
دى اول حاجه
تانى حاجه مش الكهربائى رجع كل حاجه مكانها ولا نسى حاجه

**p r i n c e** · 08-07-2013 06:52 PM

المشاركة الأصلية كتبت بواسطة samihanwar

كنت تنفض لصاحبك من الاول وتقوله ان الفيرنا فيها مصفى ومش هعرف اسحبلك بنزين منها
دى اول حاجه
تانى حاجه مش الكهربائى رجع كل حاجه مكانها ولا نسى حاجه

عيبي ان انا بتكسف و مش بعرف اقول لحد لأ لو طلب اي حاجة حتى لو انا من جوايا مدايق مش بعرف اقول لأ
و الراجل رجع كل حاجة مكانها بس أنا خايف يكون اللي عمله دا غلط اساسا

**reda elgohary** · 08-07-2013 07:23 PM

نصيحة من أخ
لا تندم على معروف فعلته لآن ربنا هيعوضك خير منه،،، وكلنا بنتعرض للمواقف ديه سواء من صديق أو معارف.

**p r i n c e** · 08-07-2013 07:48 PM

المشاركة الأصلية كتبت بواسطة reda elgohary

نصيحة من أخ
لا تندم على معروف فعلته لآن ربنا هيعوضك خير منه،،، وكلنا بنتعرض للمواقف ديه سواء من صديق أو معارف.

والله مش ندمان على المعروف و لا زعلان على البزين
انا خايف بس الطريقة اللي سحب بيها البنزين تسبب ضرر للعربية

**samihanwar** · 08-07-2013 09:13 PM

معلش فى فرق بين انى اعمل خير وانى اتعامل مع واحد جلدو تخين
ده بيقول ان سحب من العربيه 10 لتر مش لترين يمشى بيهم حالو يعنى جلدو تخين وطماع وبستكتر على الناس

**lad** · 08-07-2013 09:26 PM

غلطااااااااااان المفروض مكنتش اديتلو حاجة طلمبة ايه اللى فكتها حرام عليك وكمان طلع صاحبك ميستهلش و ياخد 10 لتر

**shaddadfalcon1** · 08-07-2013 11:10 PM

هو الحركه دي بعملها عندي عادي بس مش من رشاشات زي مابتقول

بيفك الفلتر وياخد الخرطوم اللي طالع منه ويفضل يفتح الكونتاك ويقفله وفي طبعا واحد تاني بيفتح علبة الفيوزات زي ماعمل عندك ويوصل السلك بتاع الطرمبة فتفضل شغاله علي طول تضخ بنزين كان العربيه دايره مثلا

والمفروض ان مفيش اي مشكلة يعني

**bassam92** · 08-07-2013 11:44 PM

مافيش مشكلة يا سيدى ده كلام فاضى ما تقلقش

**monamize4** · 08-07-2013 11:46 PM

بص يا باشا ,,

صعب حد يخاف على حاجة حد ف الزمان دا و الصراحة انت غلطان 100 %
الموضوع مش مستاهل انك تعمل كدة ف عربيتك الزيرو و صاحبك العربية موقفتش منه على طريق سريع و لا ف الصحرا و اصلا اديك شايف صاحبك اللى كان عايز 2 لتر اخد 10 لتر من غير ما يستاذن ف الشوية الزيادة و الله اعلم لو كان معاه جركن اكبر كان عمل ايه

و اصلا مينفعش ان الموقف يبقى قدام عينك و برضاك و بعدين تيجى تقول ( يخرب بيت برود الناس )
كان من حقك ترفض و انت واقف ان يحصل كدة ف عربيتك

و اتمنى انك متزعلش منى ,,
انا بقولك كدة لمصلحتك لان انا زيك كدة كنت مبرضاش ازعل حد و اجى دايما على نفسى لكن من فترة قررت ان دا مينفعش خصوصا ف الزمن دا و بقيت (ابرد وشى) مع اللى انا عارف انى مفرقش معاه
لكن لما اساعد حد انا عارف انى فارق معاه او حد محتاج بجد ,, ببقى عايز اموت نفسى عشانه