الموضوع: تجربتي مع صيانة الـ1000 كيا ريو 2013

السلام عليكم شباب,

احب انهاردة احكيلكم علي يومي الجميل في التوكيل لصيانة ال 1000 كيلو,

امبارح شديت الرحال و نويت و قولت اطلع علي توكيل كيا في المقطم بعد ما اتصلت بيهم و سألت علي تكاليف الصيانة لقيتهم بيقولولي اني هدفع تمن قطع الغيار بس, مع العلم ان انا عربيتي خليجي اول فئة و اكدت علي موظف خدمة العملاء اللي كلمني انني مش هدفع مصنعية.
المهم نزلت من البيت علي 9 و نص علي ميعاد الصيانة الساعة 10 وصلت التوكيل و دخلت للمهندس شاف العربية وكان معاه ورقة زي الكروكي اللي بتتعمل لما بتأجر عربيه و مرسوم عليها العربيه عشان لو فيها خدوش او حاجة. المهم قلتله انا عايز اغير زيت و فلتر و اشوف موضوع السوفت وير بتاع البنزين فا المهندس ضحك فابقوله في حاجة؟ قاللي اصل انا كل الناس اللي بتجيلي بريو بتسأل علي نفس الموضوع ووعدني اننو هيبص عليه.
المهم قاللي تكلفة العربية هتبقي 450 جنية بالمصنعية.. قلتلو بس انا لما كلمتكوا الموظف قاللي مش هدفع مصنعية. فا قاللي لا دا في عربيات الوكيل بس. مكدبتش خبر لأني اصلا بشتغل في خدمة عملاء وعارف اخرتها.. كلمت الكول سنتر وقلتلهم انني اتقالي معلومات غلط من الموظف و مسيبتهومش غير لما كلموا التوكيل خصموا المصنعية 101 جنية
الممهم قعدت استنيت حوالي ساعة لحد ما العربيه خلصت و غسلوها و استلمتها و انا دافع 349 جنية
سألت المهندس قاللي ان السوفت وير معمولو ابديت كدا كدا بس هوا عمل حاجة في البوجيهات, و دلوقتي انا حست ان العربية بقت بتسحب احسن من الأول ما شاء الله و استهلاكها للبنزين قل حوالي الربع.

حسيت ان الصيانة محترمين بصراحة احسن من صيانة النيسان بكتير و اهتمو بالعروسة حبيبة قلبي الريو

عموما لكل واحد بيفكر في العربية, انا والله لو رجع بيا الوقت كنت برضو هشتريها مرة و اتنين و تلاتة.

اسيبكو مع شوية صور للعروسة