مساعدة في تجديد لانوس ii

**hesham2060** · 13-07-2013 10:07 PM

[overline][/overline]بسم الله الرحمن الرحيم

السلام عليكم ورحمة الله وبركاته يا رجالة دايو وكل سنة وحضراتكوا طيبين
مبدئيا انا نادرا لما بشارك ف المنتدي بس انا قاريء جيد جدا لمواضيع المنتدي بشكل عام وبقسم دايو بشكل خاص لان والدي واصدقائي من ملاك دايو بموديلاتها المختلفة
قبل ما اخش ف الموضوع لازم اخص بالشكر وحوش دايو الاستاذ ممدوح والاستاذ عصام غنايم علي مجهودهم الجبار والمعلومات الي الواحد استفاد بيها بجد

المهم عشان مطولش صديقي زي اخويا بالظبط ربنا رزقه بعربية دايو لانوس 2 موديل 2003 فاضيه لونها اسود العربية سليمة اساسيات وماتور ماشاء الله وعفشة مجددة بالكامل .. والعربية فابريقة سقف شنطة كبوت ورشة حزام وزجاج عادي مش كهربا .. بس المشكلة ان العربية منظرها من برة قميء جدا خصوصا ان الشمس مبوظة لون السقف والكبوت والشنطة خصوصا ان العربية لونها اسمر والجناب بتاعة العربية باظت فيها خبطات كتير وعروق وتموجات ف الابواب وكده المهم رحنا لكذا سمكري قالوا العربية حتتكلف سمكرة كتير وسمعنا ارقام عالية شوية

فانا كان عندي اقتراح هل ممكن مثلا نجيب اربع ابواب ويكونوا كهربا بنفس لون العربية ونحاول نجيب كمان رفرفين امامي وبالتالي مش حنحتاج شغل سمكرة كتير واي سمكري يركبهم سهل مجرد فك مسامير وتركيب ونحاول نعدل الرفرفين الخلفيين فارجوا مساعدتكم هل مثلا لو حب يبيع العربية بعد كده تغيير الابواب والرفارف يعيب العربية ف البيع والسعر وكده ولو محلات قطع غيار واسعار للحاجات دي اكون شاكر جدا .... وفي اقرب فرصة اقدر اقابل صديقي واجبلكوا صور للعربية ومتشكر جدا واسف للاطالة

**aldesha989** · 13-07-2013 10:42 PM

اه ينفع تجيب اربع ابواب كهرباء وتجيب رفارف جديده بس هترش اكيد ومش هتفرق بالمره ترش العربيه كلها وسقف وشنطه وكبوت هتريحك كتير وكده تبقى جددتها كلها ومبروك عليك وربنا يديلك خيرها ويكفيك شرها

**hesham2060** · 13-07-2013 11:02 PM

المشاركة الأصلية كتبت بواسطة aldesha989

اه ينفع تجيب اربع ابواب كهرباء وتجيب رفارف جديده بس هترش اكيد ومش هتفرق بالمره ترش العربيه كلها وسقف وشنطه وكبوت هتريحك كتير وكده تبقى جددتها كلها ومبروك عليك وربنا يديلك خيرها ويكفيك شرها

طب معلش يا باشا ليا استفسار
دلؤتي انا عايز اجيب ابواب ورفارف بنفس لون العربية الاسمر عشان موجعش دماغي ف حوار الرش والسمكرة وقلت اسمكر وارش بس الرفارف الي ورا واسيب الكبوت والسقف والشنطة بنفس بوية بلدها ولونها وحشة اوي

ولا انت شايف اني اجيب وارش كله عشان يبقي مية واحدة زي ما بيقولوا ومعلش هي التكلفة تبقي كام ف حوار الرش والابواب وكده

**aldesha989** · 14-07-2013 01:25 AM

المشاركة الأصلية كتبت بواسطة hesham2060

طب معلش يا باشا ليا استفسار
دلؤتي انا عايز اجيب ابواب ورفارف بنفس لون العربية الاسمر عشان موجعش دماغي ف حوار الرش والسمكرة وقلت اسمكر وارش بس الرفارف الي ورا واسيب الكبوت والسقف والشنطة بنفس بوية بلدها ولونها وحشة اوي

ولا انت شايف اني اجيب وارش كله عشان يبقي مية واحدة زي ما بيقولوا ومعلش هي التكلفة تبقي كام ف حوار الرش والابواب وكده

بص ياريس انتا لو الابواب دى فى منها جديد والله اعلم اكيد لونهم مش هيبقى زي لون العربيه لان غالبآ بينزلو اسود بس الاسود بتاعه مش ميتالك ده لو بينزلو جديد او هتجيبهم من التوكيل وده طبعآ تبيع العربيه اسهل لان التوكيل اسعاره غبيه

ولو هتجيبهم مستعملين وده الارجح
ممكن تلاقى نفس اللون بس لو جيبت نفس اللون هتلاقى اللون متبهدل واكيد الابواب على الاقل متخربشه فا لو عندك استعداد تمشى بالابواب بهتانه او متخربشه دى حريه شخصيه وكله بيعتمد على حسب ميزانيتك فى الاول والاخر

**Ahmed Nasser** · 14-07-2013 01:51 AM

هات اربع ابواب كهربا ورش العربية رشة كاملة طالما البوهية وحشة
بس دة بعد ماتشوف ميزانيتك كام؟؟

**MMamdouh** · 14-07-2013 11:45 AM

كدة كدة هترش العربية... عمر ما القطع الاستيراد ما بيبقى لونها مطابق 100% للون العربية... ممكن الاسود ميبقاش مشكلة اوى لانة غامق بس باقى الالوان عمرها ما بتضبط ابدا

MMamdouh

**Chemist Shehap** · 14-07-2013 06:45 PM

بص انا لسه جايب عندى فى لانوس 1 الأتى
1- رفرف اماى ب 100 جنيه استيراد
2- بابين امامى ( الباب عضم بس فاضى ب 200 جنيه والكامل كان ب 300 بالمكنه ولوح الزجاج والفرش والأوكره وكل حاجته .. بس كان ممكن يخلص على 250 )
3- بابين خلفى نفس الكلام
4- فرش ابواب فاضيه 200 جنيه ( بس انا استغلتهم وما رضتش اجيبهم )
وخلى بالك انت لو حاولت تقلب العربيه زجاج كهربا بلوحه تحكم رئيسيه زى اللى بتنزل فى الكامله هتكلف كتير
انا اخر مره سألت عليها كان الفرش بفرش باب السائق الضفيره الرئيسيه كانت ب 1300
مش عارف دلوقتى
نصيحه اخ لأان عمر المعدل هيبقى زى الوكيل نفسه
مشى حالك ب 2 كهربا اماى بس ... لغايه ما ربنا يريد وتبعها وتجيبلك واحده كامله
بالتوفيق

**mostafa mahmod** · 15-07-2013 02:41 PM

بص يا باشا
اولا فى موضوع الزجاج هتكلفه كتير عالفاضى
هات بس مكنتين قزاز للشباكين اللى قدام مع مفتاح كهربا الى فى الكونسوله و شكرا
اما بالنسبه للرش انت تروح الاول لسمكرى لو الرفارف و الاكصدامات هتاخد معجون كتير اشترى جديد احسن و رش العربيه كلها
اما الابواب مش مستاهله انك تشترى طالما مفيش حادثه يعنى الابواب مفهاش خبطات
.
انصحك تروح لورشه نايل موتورز فى الحرفيين ناس كويسه جدا و فاهمين و هيعملوا الصح

**hesham2060** · 15-07-2013 04:23 PM

متشكر جدا علي رايكوا ونصايحكوا يا رجالة وفعلا انا حعمل بالنصيحة مش مستاهلة تكاليف كتير وازازكهربا ووجع دماغ ان شاء الله ححاول ف اقرب فرصة اروح ورشة الاستاذ كريم منير وربنا يسهل