لمبة زيت الإبيزا 2001 بتنور عند 1500 أر بي أم وتقفل عند 2000

**msami2k** · 14-07-2013 05:21 PM

السلام عليكم
أنا عندي مشكلة غريبة،
في بعض الأحيان لما عداد الأر بي أم يوصل لـ 1500 لفة لمبة الزبت الحمراء ببتنور وتطفي بشكل مستمر وبيطلع صوت صفارة قصيرة 3 مرات بس من التابلوه، لكن اللمبة بتفضل تنور وتطفي.
ولما العداد يزيد وأول ما يوصل لحد 2000 أر بي أم اللمبة بتبطل تنور وترجع مطفية عادي
.
الكلام ده بيبتدي يحصل ما لما العربية تسخن لحد درجة 90 لكن لما تكون باردة مبيحصلش
.
ولما بغير الزيت بزيت جديد وأغير الفلتر الموضوع بيقف فترة قصيرة (500 - 1000) كيلو وبعدين يرجع تاني، وكل لما الزيت يقدم يبتدي يتكرر كتير وكمان لما الحر بيزيد برضه بيزيد تكراره، وغيرت كذا نوع زيت والموضوع بيحصل مع كل واحد بمعدل مختلف، وعلى فكرة الزيت بيكون لسه مباظش وساعات بيحصل بعد 10 كيلومتر بس من تغيير الزيت وعامة الزيت مبيقلش ودورة الزيت شكلها عادي
.
الموضوع بقاله سنتين (40000 كيلو) ومش مؤثر على حاجة في العربية
.
غيرت ساعة الزيت (الحساس الأخضر اللي في جنب الموتور) بساعة جديدة (كذا واحدة) ومن ساعتها بدأ الموضوع يحصل أكتر مع الجديدة وأسرع، لكن القديمة بتخليه يحصل أقل
.
النقطة اللي بيحصل عندها وبيقف عندها مش ثابته تماما يعني بيحصل من (1500 - 1800) أر بي أم وبيقف عند (2000-2500) أر بي أم، وكل ما الموضوع يكون بيتكرر أكتر بتعلى نقطة الحدوث والتوقف
.
الموضوع شكله ليه علاقة بلزوجة الزيت ونظافته ودرجة حرارته، بس ايه الجزء البايظ في العربية اللى بيدي الإنذار ده
.
في ناس بتقول طرمبة الزيت ضعيفة وفي ناس بتقول مجرى الزيت مسدود وعاز يتسلك وناس بتقول حاجات غريبة
.
حد يعرف حل للمشكلة دي ......

**hossamalsadik** · 14-07-2013 07:15 PM

بص ياباشا هو موضوع غريب بس ماغريب الا الشطان أعذنا الله منه

أنتا هتغسل الماتور بفلاش غسله محترمه
وتحط الزيت بلزوجة 50w15 or10
ممكن يكون مجارى الزيت مسدوده ممكن الطرمبه ضعيفه
شوية أسألة
بعد ما بتحط الزيت أول مره بتعمل كده بردو ولا بعدها بفتره؟ وبفتره اد ايه ؟ ونوعية الزيت ايه ؟ ودرجة لزوجته أيه ؟
أنتا بتابع مستوى الزيت اثناء حدوث الواقعة ؟ يعنى ناقص ولا زى ماهوا
فى عندك أى ترشيح للزيت ؟

**Karim Ibiza** · 14-07-2013 11:14 PM

طالما الزيت مش بينقص يبقي الموضوع بسيط أن شاء الله

اللي بيخلي اللمبة تنور هو أن الزيت مش بيوصلها
والمسئول عن رفع الزيت هو الطرمبة
طرمبات الزيت بتاعت فولكس نادرا قوي لو باظت بس عموما لازم تعتبره احتمال
غالبا هتبقي المشكلة في مصفة الزيت جايز تكون مسدودة
نزل الزيت وفك كرتيرة الزيت ونضف المصفة وغير فلتر الزيت وان شاء الله المشكلة تتحل

**SYD** · 15-07-2013 01:13 AM

من غير لما اكمل قراية في موضوعك بس اعتقد ان المشكلة تكمن في طرمبة الزيت
احتمال فعلا كبير زي ما قال الأخ حسام انها تكون مشكلة في الكوستبانات تكون مسدودة ودي فعلا حلها انك تعمل Flush ودة هتجيب علبة Flush engine وليكن ليكوي مولي وتغير زيت بعدها
جرب بزيت خفيف شوية وليكن 10-40

وان شاء الله المشكلة تتحل

والله المستعان
،
،