رجاء مساعده ...ساجا..

يا جماعه الله يخليكو لو حد معاه ساجا 2012 او 2013 يقولي الموديلين دول فيهم مشكله في استهلاك البنزين؟؟؟
انا هجيبها ان شاء الله زيرو بس في ناس بتقول كلام فحلقي عن استهلاكها للبنزين..
أتا أعرف انه عالي بالنسبه لل 1300 لكنه اقل من ال 1600 !!!لقيت أرقام فلكيه في استهلاك البنزين..

انا بسافر كتير ..مكن العربيه تقف بيه و لا اعتماديتها كويسه؟؟؟

أ-صلاخ حكيم أرجوك تفيدني بخبرتك و معرفتك للعربيه ال 2013 فيها مشاكل؟؟
و كان عندي سؤال لحضرتك؟؟هي العربيه ممكن يتعملها سبويلر؟؟؟
أرجو المشاركه و الردود أنا فعلا محتاس...
أنا 24 سنه طالب في كلية هندسه أخر سنه و خاطب من اسكندريه فبسافر كتير..رجاء ردود وافيه من بتاعة الرجاله في القسم هنا..

ناس كتير بتشكر فيها ولسه سائل فى اباظة عن سعرها الاوتوماتيك عامل 85000 شايفها صفقة رابحة ان شاء الله

شاكر جدا لحضرتك....أ-صلاح حكيم...مردتش عليه؟؟؟

ديه مشاركة كنت كتبتها قبل كده فى المنتدى
وده نصها :-

بص أنا هحاول أفيدك بخبرة عملية و تجربة شخصية

العربية ساجا ليها مميزات و عيوب هبدأ بالمميزات : -

1 - العربية ثباتها رائع جدا فى الطريق الطوالى و الملفات حتى على السرعات العالية و حتى لو انت لوحدك .

2 - العربية واسعة و مساحة وضع الاقدام فيها رائعة حتى فى الكنبة الخلفية

3 - بالنسبة لسعرها فيها كماليات تتفوق بها على السيارات التى فى نفس الفئة مثل الايرباج و حساس الركن الخلفى و الفوج لايت امامى و خلفى و جنوط سبور و غيرها ...

4- على حد علمى ان معدل الامان فيها عالى بالنسبة لفئتها

5 - سحب العربية قوى حتى فى الاوتوماتيك

6 - العفشة ناعمة تخليك ماتحسش ان ظهرك بيوجعك على الارض المكسرة و المطبات يعنى العربية بتاخد و تدى اكثر شوية من العفشات الناشفة عشان تقلل احساسك بالارض المكسرة و تحافظ على ظهرك ..

العيوب : -

1 - استهلاك البنزين للأسف سئ لا يقارن ب 1300 سي سي خصوصا جوة البلد و الزحمة و الاشارات تقريبا 120 كيلو متوسط الاستهلاك فى الصفيحة بدون تكييف و لكن على الطرق السريعة و السفر جيدة من 250 الى 280 كيلو فى الصفيحة على سرعة 120 او 100 تقريبا بدون تكييف برضه - ديه تجربتى الشخصية ممكن في بعض الاعضاء تقول كلام مختلف شويه بس مش هيبقى الفرق كبير على ما اعتقد

2 - قطع الغيار غير متوفرة كتير هتتعب لما تلاقيلها قطعة غيار- ممكن كمان متلاقيهاش فى التوكيل و تقعد تحجز بالشهور لحد ما ييجى عليك الدور ممكن بعد كده المشكلة ديه تتحل لما العربية تنتشر اكثر

3 - بها بعض عيوب الصناعة ( حصل معايا ان البطارية ماااااتت فى اول 5 شهور !! روحت غيرتها فى الضمان ببطارية acdelco - المساعد الخلفى ضرب زيت و بقالى دلوقتى اكثر من 3 شهور حاجزه بس العربية بتمشى و لكن لازم يتغير

4- العربية تكنولوجيتها عالية شوية يعنى مش اي حد يفهم فيها و حساسة قوى للبنزين المغشوش اللى هو سمة اساسية فى بلدنا و لكن ماشية برضه

5 - الباور متوسط او جيد و ده عشان يخلليها ثابتة فى السرعات العالية لكن مش زى نعومة باور الكورى و اليابانى

يا ريت تكون استفدت من المعلومات ديه و ربنا يوفقك للخير ان شاء الله .....

وأنا اسف لو كنت مش متواجد كتير فى المنتدى

http://www.nilemotors.net/Nile/AH/Ni...ser_online.gif http://www.nilemotors.net/Nile/AH/Ni...ons/report.gif

أ/صلاح أنا شاكر جدا...أنا خايف يحصل عطل وملاقيش قطعة الغيار و العربيه تتركن ؟؟؟هل لحد دلوقتي ده ممكن يحصل؟؟؟و بعدين قطع غيار الجين 2 و البيرسونا موجودين بره...بس هل في للساجا طبعا غير الفلاتر و كده اللي لها بدايل..هل بدأ يتواجد لها قطع غيار بره؟؟
بس طبعا على الاقل لازم أول 30 --40 الف كيلو أحافظ على الضمان فهل في الوقت ده ممكن العربيه تتركن بسبب عدم توافر قطعة غيار؟؟؟؟؟؟؟؟
هل العربيه ممكن تتركن؟؟؟؟؟؟؟؟؟؟؟؟؟؟؟؟

اقتباس:

---

المشاركة الأصلية كتبت بواسطة abdullahraafat

أ/صلاح أنا شاكر جدا...أنا خايف يحصل عطل وملاقيش قطعة الغيار و العربيه تتركن ؟؟؟هل لحد دلوقتي ده ممكن يحصل؟؟؟و بعدين قطع غيار الجين 2 و البيرسونا موجودين بره...بس هل في للساجا طبعا غير الفلاتر و كده اللي لها بدايل..هل بدأ يتواجد لها قطع غيار بره؟؟
بس طبعا على الاقل لازم أول 30 --40 الف كيلو أحافظ على الضمان فهل في الوقت ده ممكن العربيه تتركن بسبب عدم توافر قطعة غيار؟؟؟؟؟؟؟؟
هل العربيه ممكن تتركن؟؟؟؟؟؟؟؟؟؟؟؟؟؟؟؟

---

هو بالنسبة لقطع الغيار فيه كذا محل بره التوكيل زى محل اشرف منصور -ش المحطة الجيزة - ومحل مكة و المدينة - ش دمشق مصر الجديدة...... ممكن تلاقى فيهم قطع غيار اصلية و مش اصليه تمشى بيها حالك لحد ما التوكيل يرضى عننا و يجيب قطع الغيار

بالنسبة لموضوع ركن العربية .... معتقدش ان العربية ممكن تتركن الا لو حصل عطل جامد زى مثلا الرادياتير مسرب , علبة الدريكسيون عايزة تتغير , الفيتيس اتكسر .. بس انت ممكن تجيب الحاجات ديه استيراد من الحرفيين برضه تمشى بيها حالك .. بس ان شاء الله ميحصلش الحاجات ديه معاك ... خللى بالك برضه انك بتقارن العربية ديه وسعرها بالعربيات اللى فى فئتها وغالبا هتلاقيها ارخص منهم كلهم ...

على فكرة انا مش ا/ صلاح ......... انا عمرو سيف

أستاذ عمرو..شاكر جدا بس العربيه ممكن تتركن عشان انا مش هعرف أجيبلها حاجه عشان متخرجش من الضمان...فبالشكل ده ممكن تتركن..أنا نفسي لو حد حصل معاه حاجه زي دي يحكيلنا..