امسك .... حررررررررامي ( تجربة واقعية ... للعبرة والتعلم )

**KoDaK_Gti** · 30-08-2008 06:34 PM

ههههههههههههه نفس القصة دى حصلت معايا فى شارع العشرين فى فيصل لقيت واحد بيخبطلى على الشنطة من ورا
من ناحية الباب اللى جمبى ببصله بيقولى مش تفتح ياعم انت دوست على رجلى
قولتله انت عبيط ياض ولا ايه و
كان واحد صحبى قاعد جمبى لفيت وشى قدام على غفلة وبفتح اوكرة الباب علشان انزله لقيت واحد بيمد ايده فى التابلوه وعاوز يسرق الموبايل
أفشته بقة واعتقد انه تاب من بعد اللى اتعمل فيه
طلعت عينه حطيتهاله فى أفاه
وصحبى قفش التانى اللى كان بيخبط ورا
بقوا يصوتوا ويقولو سلمونا للقسم من كتر الضرب
والشعب المصرى بأمانة فى الحاجات دى مبيسميش ههههههههههههه
الكلام ده من 5 سنين تقريبا

**Ahmed Samy** · 30-08-2008 07:17 PM

انا الصيف اللي فات حصلتلي حاجة أنقح من دي

الطريق برضه شبه واقف يعني تاتا تاتا برضه و ان عندي عادة لما يكون الطريق واقف كده باسيب مسافة بيني و بين العربية اللي قدامى علشان لو الدنيا زنقت يبقى فيه مسافة لحد يرجع ورا أو كده

المهم كنت فاتح القزاز و مطلع ايدي و ماسك النظارة و ماشي بشويش

وهوب لاقيت النظارة في ايد واحد و بيجري على شمالي في طريق فرعي كنت قدامه

ثانية بالظبط على ما فهمت اني اتسرقت و ثانية كده كنت ناوي أنزل أجري وراه بس لاقيت لاقيت فتحة في العربيات اللي جاية على شمالي

وقررت اني أجيبه بالعربية

و اديتها L وشمال وطلعت وراه و فضلت ماسك الكلاكس وفعلا قربت منه بسرعة ...قام طلع على الرصيف و من بخته المهبب لاقي عربيات راكنه على الرصيف (عمار يا مصر) :) فاضطر ينزل الشارع تاني و مالاقيتش قدامي الا اني أخبطه و قررت فعلا أخبطه

ولما قربت منه خلاااااص رمى النظارة على الكابوت فوقفت و نزلت خدت النظارة طبعا عدستها اتخربشت

وروحت وديتها للضمان و كله تمام

و مازلت مندهش حتى الآن من جرأة هذا اللص

**ahmed_su** · 30-08-2008 09:23 PM

ربنا يحفظكم جميعا من اللصوص

بس الطريقة دى قديمة شوية وشفتها اتعملت فى سواق تاكسى فى اشارة فى وسط البلد من سنتين

الاحداث بقى زميلة لينا فى العمل وهى مروحة شوية عيال من سن 10 الى 14 سنة امام حديقة الازهر بيرمو على عربيتها زجاجات الحاجة الساقعة الفارغة ... و طبعا هى ارتبكت جدا وجريت شوية لحد مابعدت عنهم وطلبت النجدة من على الموبيل وانتظرت لحد ما حضرت الشرطة وراحو لحد المكان ووجدو كمية كبيرة من الزجاجات المكسرة والشرطة عارفة الموضوع طبقا لكلمهم وان العيال بتعمل الموضوع ده علشان قائد السيارة يركن وينزل يحاول يضرب العيال دى او يمسك حد فيهم ويكون بقية العصابة فى الانتظار لتقليب العربية

المشكلة انه لقدر الله حد ارتبك وعمل حادثة علشان شوية العيال الزبالة دى ربنا يستر علينا جميعا البلد جاعت والحرامية ممكن يعملو اى حاجة مابقاش فيه امان

**aif** · 01-09-2008 12:21 AM

حاجة تانية جديدة ودمها خفيف ....
واحد كان نزل يشتري حاجة من محل و سايب ولاده صغيرين ومراته في العربية ... والموبايل كان على التابلوه او بين الكرسيين ....
جه واحا ودخل راسه من الشباك وقالهم ... مساء الخير يا ولاد ... وخد الموبايال ومشي بمنتهي الهدوء .....والست مذهوله وخايفة طبعا
لكن الاولاد كانو مبسوطين جدا
والاجابة معروفة طبعا .....
مساء النور يا عمو
وابقى دور على عمو بقى