امسك .... حررررررررامي ( تجربة واقعية ... للعبرة والتعلم )
امبارح الساعة حوالي 8 ونص بالليل كنت راجع من البلد ( قريتنا مش وسط البلد )وانا في شارع احمد حلمي فيه حته فيها زحمة شوية عشان كام محل فاتحين هناك وعاملين زحمة ... والعربيات شبة متوقفة وتمشي تاتا تاتا .... انا متجه من عبود الي اتجاه رمسيس وماشي في الحارة الوسطى ومعايا مدام شوماخر والوليدن نايمين ورا .... لقيت واحد شكله مش طبيعي واقف بيني وبين العربية اللي على شمالي ( اللي هيا آخر حارة على الشمال ) والراجل عمال يعما حركات غريبة .. ويرفع رجله لفوق ويشاور للعربية اللي علي شمالي و يخبط بأيده على شنطنة العربية .... انا طبعا قافل الزجاج ومشغل التكييف ..... العربية اللي جنبي كان راكب فيها السواق وواحد جنبة وكانت 132 و طبعا فاتح الشبابيك ومشغل مروحة متركبة على التابلوه .... طبعا السائق واللي جنبة عمالين يبصوا علي الراجل اللي بيخبطلهم على الشنطة ويرفع رجله لفوق .... يظهر انه كان بيقولهم انهم داسو على رجله او خبطوه وهما ماشيين ..... انا حسيت ان فيه حاجة مش طبيعية .....وبصيت عند السواق ... لقيت واحد تاني من عند الجزيرة اللي في الوسط .. يعني من ناحية السائق مد ايده وخد حاجة من على التابلوه من قدام السائق اللي كان هو وزميله منتبهين للراجل اللي عامل نفسه عبيط ده وبيبصو ناحيته ( اليمين )
..... فتحت الزجاج بسرعة وقولت للراجل اللي في العربية ان حد خطف حاجه من على التابلوه .... الراجل ما كانش حاسس .... وكان الاتنين الحرامية فص ملح وداب ... والراجل المسكين عمال يدور علي الموبايل و يتمم علي المحفظة .... وطبعا الطريق كان اتحرك والعيال الحرامية جريو في الاتجاه المعاكس ... وكل سنة وانتم طيبين ....
الخلاصة .......
اقفل الزجاج اثناء القيادة
اقفل السنتر لوك ... او المسوجر بتاع الابواب
لا تلتفت لمن يحاول جذب انتباهك لشيء ما ... الا بعد التأكد انك مأمن نفسك و تحاول تخلي بالك من الناحية التانية
لا تضع شيء ثمين في متناول يد اي شخص اثناء القيادة
اخيرا لا تنسي دعاء الركوب
......
ربنا يحفظنا جميعا
احترس من النشال و اللى راكب من ع الشمال ...
اقتباس:
المشاركة الأصلية كتبت بواسطة دموع الثلج
ايه ده بئه ليه الرعب ده
كل شويه تطلع طريقه جديده للسرقه او للنصب
مش جديدة و لا حاجة ... اقدم طريقة بيتعلمها الحرامى فى اكاديمية السرقة و النشل عن طريق مكتب التنسيق هو ازاى تشتت نظر الزبون لشئ تانى او واحد يخبطه من ناحية و التانى يشيل المحفظة ... او واحده ست حلوة تشاغل الزبون و زميلها يقلبه .. و صحيح اكل العيش مش بالساهل و يحتاج تدبر و خيال و فى الفيلم القديم الحرامى كان ماشى فى المولد بيحذر الناس : احترس من النشالين .. طبعا قبل هو نفسه ما ينشلهم ! :batman: