المشاركة الأصلية كتبت بواسطة sab3aawy
سبحان الله يا اخى انا كنت داخل اكتب الكلمتين دول انت سبقتنى وكتبتهم
انا خطبت اكتر من مرة قبل ما اتجوز وماتوفقتش سوى فى المرة الاخيرة بطبيعة الحال، لكن فعلا وعن تجربة ، انت بمجرد ما تخرج من حدود مدينتك بتلاقى طبع تانى وفكر تانى وعادات وتقاليد انت ممكن متقبلهاش ، كما ان عاداتك ممكن الطرف التانى ميقبلهاش،
هديلك امثلة بسيطة جدا
1-فى اماكن تعتبر بالنسبالها مسألة قائمة العفش دى مسألة حياه او موت وفيه اماكن تانية بتعتبر حاليا ان لو اهل العروسة طلبوا قايمة عفش فدى اهانة للعريس واقلال من قيمته
2- فيه اماكن ترى ان كتب الكتاب يكون فى اقرب وقت من الزفاف وفيه اماكن تانية تقول لك كتب الكتاب من اول ثانية علشان يبقى رباط لا مفر منه
3- فيه ناس بتسيب العروسة تخرج مع عريسها عادى جدا فى حدود التقاليد والعرف وفيه ناس تانية المسألة دى بالنسبه لهم فيها قص رقاب
4- فيه اماكن بتكونة فيها المشاركة فى التجهيز 50%-50% وفيه اماكن تانية بيكون النظام فيها تدفع مهر وماللكش دعوة بحاجة
5- فيه اماكن بيكون فيها الأجهزة الكهربائية على العروسة واماكن تانية تختص العريس بهذة الأشياء
4- فيه اماكن تسمح للعروسة بزيارة اهل العريس فى بيتهم وفيه اماكن تانية بتعتبر دى جريمة
6- فيه ناس تقوم بتصوير العروسة والعريس فى فيديو كليب لاذاعته فى قاعة الفرح وفيه ناس تانية بترفض اصلا انها تكتب اسم العروسة على كارت الدعوة
7- فيه ناس بتعتبر انهم لو مزاروش بنتهم فى يوم الصباحية فهذه كارثة، وفيه ناس ترى انه من العقل والحكمة ترك العريس وعروسه لبعضهم ايام عديدة بعيدا عن المضايقة قبل اول زيارة
دى مجرد امثلة بسيطة للتباين فى تفكير الناس، لذلك ادرس طبع اهل المكان اللى انت بتتجوز منه وعاداتهم، لو لقيت انها مناسبة لعاداتك ، او تقدر تتغاضى عن الاختلاف فيها، او تقدر تتفاوض معاهم على حلول وسط يبقى توكل على الله، لكن اوعى تتجوز من مكان غير مكانك على عماك بدون معرفة طبع اهله، بس هو عموما ، عادات اهل المدن بتكون متقاربة الى حد كبير ، بعكس عادات اهل الريف التى تختلف بشدة عن عادات اهل المدن كما تختلف بشدة ايضا فيما بينها وبين بعضها، لذلك ممكن تكون حالتك(اسكندرية-قاهرة) التباين فى العادات فيها مش بعيد، لكن برغم ذلك برضه لازم تدور على الاختلاف فين وتشوف هتقدر تتأقلم معاه وللا لأ