الموضوع: كيا كارينز vs جراند تريوس

الكارينز أفضل بكتير. الميزه الوحيده في التريوس هيه الارتفاع عشان المطبات حتى ال 7 كراسي مش ميزه قوي عشان مقابلهم مفيش شنطه تقريبا. انما الكارينز توكيل وقطع غيار وانتشار وسعر اعاده بيع كله أفضل.

المشاركة الأصلية كتبت بواسطة pmpo

شكراً لردك..
طيب لو حضرتك معاك كارينز ياريت لو تقولي على مييزاتها وأي عيوب فيها وبالنسبة للثبات وعالية ولا لا كل حاجة يعني .. وايه رأيك حضرتك في الخليجي موديل 2011 هايلاين؟ لو تعرف حاجة عن سعرها بردو أبقا شاكر ليك جداً

الكارينز ارتفاعها من الارض 15.4 سم وده اعلى من كل العربيات السيدان تقريبا ده غير ان الكراسي جواها عاليه عن الارض وده بيريح في القعده خصوصا للطوال ومساحه الرجلين كبيره قدام وورا يعني هترجع كرسيك لورا على الاخر واللي قاعد ورا هيبقى مرتاح.

عيبها الاساسي بطء السحب خصوصا مع تشغيل التكييف يعني مش عربيه جري وهيه في الاساس مش فئه الجري بس لازم أنبهك للحته دي عشان لو بتحب تجري مش هتنبسط بس هيه عربيه سفر بالدرجه الاولى لأنها واسعه وتساع من الحبايب ألف وشنطتها بحر والكنبه ضهرها بيتقفل وتبقى الشنطه مخزن كبير.

ثباتها حلو وتحس انها فارشه على الارض. أنا بلاحظ ده لما ألاقي كارينز ماشيه قدامي.

الفرق بين الهاي لاين الخليجي والوكيل (موديل 2012 وأعتقد 2011 زيه) ان الخليجي فيها مقابض الابواب من بره نيكل والتكييف أوتوماتيك وفيه رجلاش للنور ب 3 درجات وفيه حساس مطر للمساحات. مش فاكر ان كان فيه فروق تانيه ولا لاء.