السلام عليكم ورحمة الله وبركاته

أولا: كل عام وكل الأعضاء بخير

ثانيا: أتشرف بالإنضمام إلى المنتدى

ثالثا: مشكلتي في عربيتي (سكودا كومبي 1997) إني بأحبها جدا بالرغم من إني صرفت عليها حوالي ستة أو سبعة آلاف جنيه في سنة ونصف (كاوتش جديد وبطارية جافة جديدة ومساعدين أمامي وخلفي وشوية حاجات كدة) ودايما بأجيبلها قطع الغيار الأصلية ولكن المشكلة الحالية اللي باتعرضلها خلتني أبتدي أكرهها وأفكر أبيعها لما تكون في فرصة أغير

رابعا: المشكلة الحالية أكون شاكر لو حد عنده خبرة نصحني بحل ليها

الموضوع يتلخص في إن العربية قطعت لحد دلوقتي 5 سيور على الأقل (سير المجموعة دينامو - تكييف - طرمبة المياه)

واحد يقوللي المشكلة في بلي الشداد - غيرته والسير اتقطع قبل وبعد

واحد يقوللي طنبورة الدينامو - الدينامو القديم قطع سيرين تلاتة والجديد قطع سيرين لحد دلوقتي

الغريب في الموضوع إن السير ممكن يقعد ست شهور مافيهوش الهوا وفجأة وكأن الموضوع فيه سحر ألاقيه فوت ورحل واتقطع ومجموعة البكر والطنابير زي ما هيا ماتزحزحتش مللي وأي سير يركب مكانه يرحل ويقطع على طول


حد عنده أفكار يا جماعة؟ وكل سنة وإنتم طيبين