خطوات الرخصة الدولية (يوليو 2013)

**hany79** · 20-07-2013 01:19 PM

السلام عليكم جميعا و رمضان كريم و ربنا يعيده علينا باليمن و البركات
أنا كنت بدور على النت امبارح على الأوراق المطلوبة و خطوات عمل الرخصة الدولية فوجدت اختلافات في الأوراق المطلوبة و التكلفة, فقررت الذهاب لنادي السيارات و عمل الرخصة و الخلاصة كالتالي:
ألعنوان
نادى السيارات والرحلات المصرى, وسط البلد, القاهرة, مصر | نوادى | Yellow.com.eg | 10 ش قصر النيل

الأوراق المطلوبة:

البطاقة الشخصية (الرقم القومي) و صورة منها.
رخصة القيادة (سارية لمدة سنة على الأقل) و صورة منها.
جواز السفر (محدش شافه بس هو محتاج انك تكتب بيانات منه)
عدد 2 صورة شخصية 4x6

ملحوظة : زمان كانوا بيحتاجوا شهادة تحريات تقريبا من مرور مدينة نصر برابعة ,دلوقتي مبقتش مطلوبة (الموضوع مالوش علاقة بالمعتصمين عند رابعة)

التكلفة:

10 جنيه بتتدفع في شباك عند ضابط بيتأكد من البيانات و بيديك شهادة التحريات تقريبا
200 جنيه (غلوها لدعم اقصاد مصر!! و انتم مسافرين تتفسحوا او تكبشو فلوس فأدفعوا بقى) بتتدفع و انت بتقدم الورق على الكاونتر اللي بياخدو منك شهادة التحريات و بتملأ ورقة ببياناتك.

ملحوظة تانية: تسليم الرخصة بيكون في نفس اليوم من الساعة الواحدة الى الساعة الثانية ظهرا
و ممكن تعمل زي ما أنا عملت تحط 20جنيه و سط الورق للموظف اللي قاعد في النص (راجل أصلع) اللي بياخد الورق بيقولك بابتسامة عريضة

ارتاح حضرتك و ادخل خدها بعد خمس دقائق)

و استلمتها و الحمدلله

**zerocairo** · 20-07-2013 01:46 PM

موضوع جميل و مشكور عليه
لكن مكانش فى داعى للتحريض على الرشوه فى الجزء الأخير وو خصوصاً انى مستغرب جدا انك كمان بتحدد مين اللى المفروض ياخد منك العشرين جنيه !!!!!!!!!!!!!!!

قال تعالى : وَلا تَأْكُلُوا أَمْوَالَكُمْ بَيْنَكُمْ بِالْبَاطِلِ ,,,
وعن عبد الله بن عمرو رضي الله عنهما قال: "لعن رسول الله صلى الله عليه وسلم الراشي والمرتشي
........................*
ياريت نخلى بالنا و احنا بننصح حد لأن ذنبه فى رقبتك

**AMRPEGAS** · 20-07-2013 03:55 PM

شكرا على الموضوع
بس أناعندى سؤال هى الرخصة دى مدتها أد أية وبنتهى ولا لأ
وذلك من تاريخ استخراجها
ولك جزيل الشكر

**hany79** · 21-07-2013 01:35 AM

المشاركة الأصلية كتبت بواسطة zerocairo

موضوع جميل و مشكور عليه
لكن مكانش فى داعى للتحريض على الرشوه فى الجزء الأخير وو خصوصاً انى مستغرب جدا انك كمان بتحدد مين اللى المفروض ياخد منك العشرين جنيه !!!!!!!!!!!!!!!

قال تعالى : وَلا تَأْكُلُوا أَمْوَالَكُمْ بَيْنَكُمْ بِالْبَاطِلِ ,,,
وعن عبد الله بن عمرو رضي الله عنهما قال: "لعن رسول الله صلى الله عليه وسلم الراشي والمرتشي
........................*
ياريت نخلى بالنا و احنا بننصح حد لأن ذنبه فى رقبتك

و الله حضرتك هو مش تحريض على الرشوة اد ما هو تنبيه لأن الرجل اللي بيصور تحت العمارة بتاعة النادي بيلقط الناس من تحت فبياخد هو ليه + المبلغ اللي حيديه للموظفين فوق فاللي مستعجل فعلا خصوصاً اني ساكن في مصر الجديدة فاني افضل قاعد في التحرير ٣ ساعات يعتبر الرجوع مغامرة خصوصا اننا مبنعرفش ايه اللي ممكن يحصل في البلد كل ساعة و أشكر سيادتك على التنويه.