حقيقه اوتوماستر الوكيل المعتمد لمنصور
للاسف انا كنت معتقد انه بدايه لمراكز الصيانه اللي بتتبع اسلوب علمي للشغل ورضاء العميل لكن فعلا للاسف اتضح انه مركز صيانه اخره تغيير زيت وتربيط العفشه (مع الشك كمان فيهم لاني لما غيرت الزيت في صيانه ال5000 لقيته اعلي من max بكتير فالله اعلم عملوا ايه في تربيط العفشه)
المهم انا كان عندي مشكله في العربيه كنت كتبت عنها موضوع قبل كده وبالأختصار اني بحس بخشونه بعد ال60 لحد ال70 ...المهم بعت لهم ميل وكلمني المهندس وقالي لي تعال اجرب العربيه وفعلا رحت وجرب العربيه مشكورا وطلع كل حاجه تمام وهي الأوبترا كده مع اني لسه حاسس بالخشونه لحد دلوقتي!!
وفي نفس اليوم قلت له علي مشكله صغيره تانيه ان دراع حزام الأمان اللي مثبت في جنب الكرسي بيتهز ... انا كنت بصيت عليه لقيت ان العربيه جايه من غير الورده اللي بتضغط عليه دي تحت الصاموله وعلشان كده سايب وبيتهز ..المهم انا فكيت الصاموله دي مره علشان اجيب ورده مقاسها لكن ملقتش المهم وريته المشكله دي فخد العربيه ودخل بيها الورشه وطلع تاني بعد 5 دقايق وقالي ان المشكله دي هتحتاج تفك الكرسي خالص علشان يعرفوا يفكوا الصاموله (مع اني فكتها مره) فقلت له الف شكر خليها في مره تانيه بقه !!!
مره تانيه اكتشفت ان عندي نفس مشكله عربيه ابو عمار في تزييق الدركسيون فرحت لهم وقلت للمهندس هناك عندي مشكله في الدركسيون فقال ليه التزييق ؟؟ الحقيقه فرحت انه علي علم بالمشكله وقلت يبقي هيصلحها بضمير المره دي..
فقال ليه لأ ده صوت عادي في الأوبترا متقلقش !!!! فقلت له هو الصوت بيبقي يمين اكتر فقال لي مهو ده علشان في سيور ناحيه اليمين فالصوت بيبقي اكتر (مش عارف يعني ايه ..يعني الدركسيون بيخبط في السيور مثلا فبيطلع صوت ولا ايه؟) المهم مردتش اجادله وانا في نيتي اطلع علي التوكيل في الهرم في صيانه ال10000 ان شاء الله وهعمل صيانتي معاهم علي طول ...
حاجه تحزن لكن طلع توكيل زيه زي غيره من مستخدمي كلمه (ده طبيعي في العربيه)