الحمد لله اشتريت الجميلة ال m 11

**mohamed handy** · 23-07-2013 06:17 AM

الف مبروك على العربيه وهيا فعلا عربيه جميله اوى ربنا يديلك خيرها ويكفيك شرها

**akmm** · 23-07-2013 02:18 PM

الف الف مبروك

**aftr** · 26-07-2013 10:08 AM

الف مليون مبروك ويارب تكون مبسوط منها لونها ايه

**tarekhassan88** · 26-07-2013 04:21 PM

المشاركة الأصلية كتبت بواسطة aftr

الف مليون مبروك ويارب تكون مبسوط منها لونها ايه

ربنا يبارك فيك

العربيه لونها فضى وهكتب تقرير عن اللى عملته خلال اليومين اللى فاتوا غدا ان شاء الله

**S O P H O S** · 27-07-2013 09:59 PM

الف مبروك يا باشا ..

**tarekhassan88** · 01-08-2013 03:45 PM

السلام عليكم

معلش اتاخرت فى التقرير اللى المفروض اكتبه عن العربيه من وقت شرائها بس ظروف رمضان و الوقت الضيق جدا

احكيلكم

البدايه انا عديت على ابانوب فى الاميريه علشان اشوف العربيه محتاجه ايه و ابانوب قالى محتاج تغير زيت و بوجيهات و فلاتر و هيبقى يبص على السيور و هو شغال بس فى العموم ده مش ميعاد تغير سيور ( على اساس ان العربيه 25000 كم )
و كلمت استاذ باسم نجيب علشان اخد منه استيكر نايل موتورز و فعلا مشكورا قابلته و اخدت منه الاستيكر و استفدت منه و الحمد لله

اول حاجه عملتها رحت غيرت الاربع فرد كاوتش عند عمرو جميل فى عابدين و جبت فالكون تايلاندى مقاس 16( 205/ 55 ) و الحقيقه انا ليه زميل فى الشغل يعرف صاحب المحل ( عمرو جميل ) و بالتالى عمرو هو اللى اختار نوع الكاوتش و قالى النوع ده ممتاز وزى ما قلتلكم المقاس 16 v
و غيرلى الاربع بلوف ببلوف جديده المونيوم و طبعا غسل الجنوط و نظفها و نظف الطنابير و بص على التيل و نظفه باسبرى و قالى التيل حالته كويسه
المهم الموضوع ده دفعت فيه 2450 جنيه بالاكراميات

تانى حاجه كلمت قريب لى بيشتغل فى قطع الغيار للسيارات الفيات و بيتعامل مع محلات شارع دمشق علشان يجيب لى فلتر هواء و فلتر بنزين ( بالمناسبه ابانوب قالى فلتر بنزين كبير ) و بوجيهات بوش 3 شمعه حسب كلام ابانوب من عند زكى جرجس و المفاجئه انه طلع صديق لاصحاب المحل فقلت الحمد لله ( طبعا لظروف رمضان و مليونيه الجمعه الماضيه فلسه معرفتش اروح اجيب منه الحاجات)

ثالث حاجه رحت اغير زيت عند زيوت وولف فى الحى السادس ( الزيت القديم اللى كان محطوط فى العربيه متغير فى صيانة 10000 كم و العربيه عامله 24700 كم يعنى بقاله 14700 كم تقريبا و نوعه موبيل وان) و اول ما وصلت استقبلنى مهندس شريف و قلتله انا عايز اغير زيت موتور بس الاول عايز اعمل كابس موتور و احلل الزيت اللى موجود علشان اعرف حالة العربيه فقالى ان فى خدمة جديده و هى الكشف على كامل العربيه و عمل تقرير بها ب 150 جنيه بدل من 300 جنيه فقلتله اوك و بالفعل بدا و اخد عينه من الزيت و حطها على جهاز عندهم و تركها لانها بتاخد شوية وقت و بدا يعمل اختبار كبس الموتور و الحمد لله قالى ان كفائة الموتور حوالى 81 % و انتظرنا نتيجة تحليل الزيت اللى بتبين بردك حالة الموتور و الحمد لله طلعت النتيجه كويسه و قالى ان افضل زيت هو 5w - 40 و بدا الفنى فى تغير الزيت ووضع فلتر زيت جديد ( الموتور بياخد زيت 4.5 لتر) فى الوقت ده بدا مهندس شريف فى الكشف على كل العربيه باجهزه معه فبدا بالكشف عن الزيوت و قالى ان زيت الفرامل بحاجه للتغير فقلتله اوك نغيره و قلتله بالمره نغير زيت الفتيس طبقا لنصيحة د / المناهرى خبير الزيوت فى المنتدى وغيرت بزيت 80w - 90 (الفتيس بياخد 2 لتر ) و فعلا بدا الفنى فى تغير زيت الفتيس و اجلنا تغير زيت الفرامل لان ده من اختصاص فنى اخر اللى كان اجازه اليوم ده و كمل مهندس شريف الكشف على باقى الزيوت و السوائل و عند الكشف على مياة التبريد وجد ان المياه الموجوده هى مياه عاديه و ليست المياه المخصصه بالتبريد او المعروفه بالمياه الخضراء ( طبعا واضح ان فى مشكله فى قربة المياة هبقى اشوف محتاجه تتغير و لا هى كويسه لما اغير المياه ) فقلتله خلاص اشترى مياة من عندكم و ابقى اغيرها بره لان الخدمه دى مش عندهم
المهم استكمل مهندس شريف باقى الكشف على اجزاء السياره اللى من ضمنها الكشف عن كفائة البطاريه و الكشف عن المصابيح كلها و قالى ان فى لمبه مش شغاله فى الفوج اليمين و بدا الكشف عن حالة السياره من الداخل و حالة الفرش و الكراسى و بعد كده كشف عن الصاج من الخارج بجهاز لمعرفة الاماكن المرشوشه و اخيرا رفع العربيه للكشف عن الشاسيه و العفشه و كان ليه شوية ملاحظات على الشكمان و على الكوبلن و كتب كل ده فى التقرير و اخيرا جه وقت الحساب و هكتبلكم التفاصيل وفقا للفاتورة

جركن 4 لتر 5w -40 بمبلغ 295 جنيه ( زيت موتور)
جركن 1 لتر 5w -40 بمبلغ 80 جنيه ( زيت موتور و اتبقى منه نصه تقريبا )
عبوه 1 لتر 80w - 90 ( عدد 2 عبوه ) بمبلغ 140 جنيه ( زيت الفتيس)
جركن 5 لتر مياة تبريد بمبلغ 130 جنيه ( المياه لونها احمر )
فلتر زيت بمبلغ 25 جنيه
فحص شامل بمبلغ 300 جنيه ( لسه فى خصم 150 جنيه )
الاجمالى 970 جنيه
الخصم 214.50 جنيه
ما تم دفعه 755.50 جنيه

الملاحظات على العربيه فى الفتره دى ابدا بالكويس
ماشاء الله العربيه حلوه جدا و سحبها جميل و ثباتها رائع على السرعات العاليه مع انى مزودتش عن 120 لانى بجرى جوه البلد و الفرامل ممتازه و الحمد لله و العربيه وسعها حلو لانى جربت اقعد فى المقعد الخلفى ولقيت القعده مريحه الحمد لله و التكيف ممتاز ايضا و الحمد لله
الملاحظات التانيه بقه العفشه فعلا بتدب فى المطبات بس ده مش مسبب لى مشكله
فى صوت فى ناحية اليمين ورا عند العجله اللى ورا فى المطبات صوت عامله زى الشخلله و دى بتظهر و انا ماشى على الاول فى الشوارع اللى فيها تعاريج و مطبات مش عارف لسه الصوت ده ايه و ربنا يستر ميبقاش مساعد وتبقى حاجه بسيطه مع العلم انى لسه مربطتش العفشه و مستنى لما اروح اغير البوجيهات و الفلاتر ان شاء الله هبقى اربط العفشه و اشوف كده الصوت ده من ايه
تقريبا كده انا قلت كل حاجه و اسف للاطاله

**bassem.naguib** · 02-08-2013 08:44 PM

ربنا يباركلك فيها يا باشا .. بس يا ريت تقولنا أداء زيت الوولف معاك عامل أيه من ناحية الصوت ونعومة الموتور .. وإن شاء الله اللي فيها يطلع حاجات بسيطة .

**tarekhassan88** · 03-08-2013 02:13 PM

المشاركة الأصلية كتبت بواسطة ethooo

اولا الف مبروك ربنا يديك خيرها ويكفيك شرها وهي عربيه جميله وانا بفكر فيها لو ربنا يسير الحال الحال هشتريها ان شاء الله عنوان مركز الخدمه الي في مدينه نصر علشان لو احتجحوا للكشف علي عربيه ومواعيدهم ورقم التليفون ولك جزيل الشكر

http://www.nilemotors.net/Nile/345341-a.html

الموضوع ده فى كل المعلومات اللى تهمك ارجو قرائته بعناية ففيه معلومات هامه جدا

**tarekhassan88** · 03-08-2013 02:21 PM

المشاركة الأصلية كتبت بواسطة bassem.naguib

ربنا يباركلك فيها يا باشا .. بس يا ريت تقولنا أداء زيت الوولف معاك عامل أيه من ناحية الصوت ونعومة الموتور .. وإن شاء الله اللي فيها يطلع حاجات بسيطة .

ربنا يباركلك استاذ باسم و ان شاء الله هقولكم على اداء الزيت بس هو مبدايا صوت الماتور هادى و السحب ممتاز لدرجة انى مش بحس و بوصل على الثالث لسرعة 90 احيانا و الصوت مش بيبقى عالى