ما هي الطرق للسفر الي امريكا

**al_manara** · 23-07-2013 07:22 PM

المشاركة الأصلية كتبت بواسطة amr_mo

السلام عليكم ورحمة الله وبركاته

مبدئيا صديقك الي في امريكا ميقدرش يساعدك في حاجة لأنه ميقربلكش حاجة

موضوع تأشيرة الزيارة ملهاش اي مقاييس ولا اعتبارات ممكن يكون ورقك متستف وسليم ولكن القنصل الي بتعمل معاه المقابلة يبصلك من فوق لتحت ميقتنعش بيك او يشك في اجاباتك ويرفض يديك الفيزا

موضوع انك تسافر بلد اوروبية تاخدلك كم ختم على الباسبور ساعات بتقوي فعلا موقفك وساعات القنصل مبياخدش بيها

اهم شيئ القنصل بيدور عليه هو الرابط الي يخليك متكسرش الفيزا هناك وانك ترجع مصر تاني زي الوظيفة وانها تكون مثبتة في جواز سفرك وتجيب hr letter من شغلك بما يفيدك انك بتتشغل في وظيفة معنية بالراتب والفترة الزمنية، وان يكون مثلا عندك املاك هنا في مصر هترجع علشانها او ورابط اسرية قوية زي الزوجة والابناء لو انت مسافر لوحدك، الاب والام مينفعوش

الحساب البنكي ساعات كتيرة مبيسألوش عليه لأنك سهل تستلف فلوس من اي حد وتحطها في البنك بإسمك لحد يوم مقابلة السفارة فهما هارشين الحوارات دي

وخلي بالك لو ربنا وفقك وسافرت متحاولش تكسر فترة ال 6 اشهر لأنك لو عملتها ورجعت مصر حبيت تسافر تاني بتتحط بلوك 10 سنين متعرفش تدخل امريكا تاني

طيب كل دي معلومات كويسة .
ومحتاج شوية توضيح علي ايجابتك

هل لو حد لية قريب ممكن يعمل لة اية هناك ؟
هل تعرف مثلا الرصيد في البنك ممكن يكون كام ؟
هل كل الروابط الي انت ذكرتها هاتكون دي بس ولا في حاجات كمان ؟
هل ممكن مثلا صديقي يبعتلي عقد عمل لمدة سنة هناك في شركة ويكون الموضوع اسهل ؟

**أحمد كمال** · 23-07-2013 08:12 PM

بص يا سيدي هاجيب لك الزيتونة

باختصار تاشيرة الزيارة لازم تثبت للضابط القنصلي الاتي

1- روابط قوية جدا جدا جدا تخليك ترجع مصر في ميعادك

2- قدرة على تحمل التكاليف المادية للرحلة

و ده بيتحل ازاي؟

1- حساب بنك ...... مش مجرد رصيد ...... لا... كشف حساب 6 شهور و باين فيه عمليات ايداع و سحب (و لو انت موظف يبقى مرتبك بيتحول من شركتك في ميعاده و يبقى الرقم نفس - او قريب جدا - من الرقم اللي في شهادة المرتب)

2- شهادة مرتب من شركتك لو موظف

3- اي املاك باسمك ....... شقق اراضي شركات الخ الخ الخ

4- لو متجوز او مخلف ييبقى القسيمة و شهادات ميلاد الاولاد

5- لو مسافر تحضر كورس او مؤتمر الخ الخ لازم تجيب له دليل على حضورك (دعوة, تسجيل ..... الخ)

6- لو مسافر سياحة تجيب حجوزات الفندق و الطيران

7- لو مسافر عند صديق او قريب تجيب اسمه و عنوانه (و بالمناسبة ........ لو ابوك نفسه مواطن امريكي ده مش ضمان انك تاخد تاشيرة الزيارة)

8- لو مسافر للعلاج يبقى تجيب مراسلاتك مع المستشفى او العيادة و ما يثبت قدرتك على تحمل رسوم العلاج سواء فلوس او تامين صحي دولي ..... و التقارير الطبية طبعا

بالنسبة لاسئلتك

هل لو حد لية قريب ممكن يعمل لة اية هناك ؟
هل تعرف مثلا الرصيد في البنك ممكن يكون كام ؟
هل كل الروابط الي انت ذكرتها هاتكون دي بس ولا في حاجات كمان ؟
هل ممكن مثلا صديقي يبعتلي عقد عمل لمدة سنة هناك في شركة ويكون الموضوع اسهل ؟
__________________

1- قريبك و لا يقدر يعمل لك حاجة غير بس انه يقول انك هتقعد في بيته و يوفر عليك الفندق

2- الرصيد مش مهم بقدر ما تاريخ الحركات و التعاملات عالحساب زي ما قلتلك

3- كل ما تقدر تجيب روابط اكتر يبقى احسن

4- مفيش حاجة اسمها صديقك يبعت لك عقد عمل ...... الشركة اللي بتعينك هي اللي بتقدم لك على تاشيرة اسمها h1b (تاشيرة عمل مش زيارة) و دي موال اسود و مش سهلة خالص في امريكا ......

لو عاوز اسافر امريكا . اعمل اية ؟ (زيارة لمدة 3 شهور)
في ناس بتقول لازم يكون عندك رصيد كبير في البنك ؟
وناس بتقول انسا مش هاتعرف .
وناس بتقول اجرائات صعبة جدا .
وناس بتقول لازم تكون هجرة مش تروح كام سنة او كام شهر وترجع .
وناس بتقولي سافر الاول اي دولة في اوربا عشان يكون معاك التاشيرة وبعدها ممكن تروح امريكا بشكل اسهل .

1- حقيقي ان لازم رصيد ...... الا لو مسافر رحلة عمل و موظف في شركة كبيرة بمرتب كبير
2- مفيش حاجة اسمها انسى مش هتعرف لان امريكا بالذات بختك يابو بخيت
3- الاجراءات مش سهلة فعلا لانك مش طالع عمرة :)
4- مفيش حاجة اسمها لازم هجرة (لو غرضك فعلا زيارة مش رايح بزيارة عشان ترشق !)
5- لو عندك سفريات اوروبا اكيد اكيد هيبقى موقفك احسن ...... بس اوروبا برضه مش جمصة و لا راس البر :) ...... برضه بيطلبوا منك بلاوي زرقة عشان الفيزا

يعني ايه يكسر فترة 6 شهور ؟؟

يعني التاشيرة الخمس سنين مش معناها تقعد في امريكا 5 سنين ...... يعني خلال الخمس سنين ممكن تروح كذا مرة و كل مرة بيتحدد لك في المطار هناك وقت وصولك فترة اقامة لا تتجاوز 6 شهور (و ممكن اقل) و ما ينفعش تكسرها

السلام عليكم ورحمة الله وبركاته

تأشيرة أمريكا بتكون 5 سنين وليك في كل مره تقعد 6 شهور متواصل

مش شرط ....... على مزاج الظابط القنصلي (ممكن يديهالك خمس سنين و ممكن سنة بس ...... ممكن دخول متعدد و ممكن واحد بس ) و على مزاج ضابط الهجرة في المطار (ممطن ما يديكش 6 شهور يديك شهر بس في المطار)

بس في العادي 5 سنين و الاقامة 6 شهور في المرة فعلا

**أحمد كمال** · 24-07-2013 01:39 AM

مفيش حاجة اسمها تجديد فيزا لامريكا ....... بتقدم على فيزا جديدة

كونك رحت و رجعت في الميعاد دي نقطة كويسة و تشفع لك في الفيزا الجديدة بس مش قاعدة برضه

واخد صاحبي اول مرة طلعها بصباع رجله و راح خلال المدة بتاع 5-6 مرات و كلهم رجع في الميعاد ........ في التجديد (مجازا لان زي ما قلت لك هو مش تجديد) طلعوا بوز أهله بس اخدها في الاخر

**al_manara** · 24-07-2013 04:29 AM

المشاركة الأصلية كتبت بواسطة eslamrace

طيب سؤال بقى لخبراء الموضوع ده بالذات لانى بصراحه مش لاقى حد يفيدنى ولا ينصحنى غير اخواتى هنا .
الموضوع باختصار انى معايا فيزا علاج لامريكا من 17/12/2008 وروحت هناك لمده 3 شهور عند قرايبى وموضوع العلاج اجلته شويه علشان الدراسه لان لقيت الموضوع حيطول وخصوصا انى كنت قاعد عند قرايبى وحاليا الفيزا باقى عليها 7 شهور المشكله دلوقتى انى الحمد لله هنا مستوايا الاجتماعى كويس مش وحش بس الاحوال والمعامله مع الناس مختلفه تماما بين البلدين وانا مش محبذ فكره السفر لان برضه الغربه صعبه للى جربها بس فى نفس الوقت شايف العيشه فى امريكا حلوه برضه وافضل اكيد من هنا بس اكيد مش حكون عايش فى نفس المستوى الاجتماعى وحستحمل حاجات كتير هناك لانى مش حقعد عند قرايبى هناك تانى ممكن اخد مكان جنبهم فبرضه حتى لواشتغلت هناك اى شغلانه خصوصا انى معيش اقامه او جرين كارد فحيبقى التكاليف عاليه جدا
فمع اغفال حكايه العلاج لان الموضوع حياخد وقت طويل والواحد اتأقلم معاه هنا فممكن نقلل من اهميته فى اتخاذ القرار
فالسؤالين المهمين بعد كل ده
1* ايه رايكم اسافر دلوقتى واستحمل الوضع هناك خصوصا ان الفيزه قربت تخلص والفرص لا تتكرر كثيرا خصوصا انى عرفت ان تجديد الفيزا من هناك اسهل خصوصا لو بدأت العلاج؟
2* لو حبيت اجدد الفيزا من هنا بحيث تفضل الفرصه متاحه لحين اتخاذ القرار ايه المطلوب اعمله والخطوات بالظبط واللى حيتطلب منى فى السفاره والموضوع حيكون سهل ولا صعب لان الموضوع فى المره اللى فاتت كان صعب جدا علشان اقدر اخد الفيزا ؟

وحاليا الاهم السؤال التانى بالنسبالى
شكرا ليكم واسف على الاطاله واسف جدا لصاحب الموضوع على اقتحام الموضوع .

ولا يهمك .
بس ياريت توضح لنا ازاي طلعتها اول مرة . (شفاك الله وعافاك)
وواضح ان الاخ احمد عندة معلومات مفيدة . جزاه الله خير

**أحمد كمال** · 24-07-2013 09:42 AM

المشاركة الأصلية كتبت بواسطة eslamrace

اشكرك على التوضيح يعنى استنى لما الفيزا تنتهى خالص واقدم من جديد واحمل الابليكيشن من النت ولا بيكون فى ابليكيشن مختلف
ومعلش كنت حابب اعرف لما اقدم من جديد اقدم على فيزا علاج برضه ولا زياره وهل الورق القديم اللى معايا حينفع اتقدم بيه ولا لازم اجيب مراسلات جديده من هناك وهل اسهل انى اسافر احسن دلوقتى واجددها من هناك ولا مش حتفرق وشكرا ليك على الرد واسف على الاطاله .

مش شرط تستنى لحد ما تخلص ........ ممكن تستنى و ممكن تقدم قبل ما تخلص

و هي نفس الفورم ... مفيش اختلاف بين تقديم تاني مرة و اول مرة غير ان في الابلكيشن اما يسالك سافرت امريكا قبل كده هتجاوب بنعم و شكرا .....

الورق القديم اللي معاك اكيد مش هينفع ....... انت بتتكلم في 5 سنين فاتوا

لو سافرت مش هتعرف تجددها من هناك الا لو اثبتت انك حالة انسانية (العلاج مستمر و غلط عليك ترجع) ....... بس لو انت هناك و مش بتتعالج (غرض الفيزا الاصلي) لازم ترجع و تقدم من الاول

**aatif** · 25-07-2013 11:29 PM

من الأخر اى حد عاوز يروح امريكا يا جماعة ويشتغل هناك رسمى مش تهريب
ملهاش غير حل واحد
تقدم فى جامعة والجامعة تقبلك ويبقى عندك رصيد فى البنك يغطى تكاليف الأقامة والدراسة
وبعد كده بتتخرج تدور على شغل لحد ما شركة تقبلك وتطلعلك الفيزا اللى تعتبر تصريح عمل

اى نوع من انواع الشغل من غير تصريح العمل ده مخالف وبيرحلوك لو قبضوا عليك ومش هتدخل امريكا تانى ومحدش يفتكر انه ممكن يعمل ناصح لأن نظام الضرايب عندهم بيكشف الفلوس بتروح فين وبالتالى لو انت مخالف وبتقبض فلوس فهيجبوك هيجبوك ومش هينفع تدفع ضرايب عشان انت مخالف

فيه انواع تانيه من الفيزا اهمها
السياحة وزيارة عمل لرجال الأعمال واخرى للعلاج واخرى للدراسة وفى انواع تانية بس دول اشهرهم

القنصل وظيفته ان يشك فيك اصلا ويفترض سوء النية لحد ما تثبتله العكس
والعكس ده بيحصل من الثقة فى نفسك وفى البيانات والورق اللى معاك وكمان طريقة كلامك معاه

نوعية الأوراق المطلوبة بقى تختلف من كل سبب للتانى
يعنى لو سياحة يبقى لازم معاك فلوس وعربية ولابس كويس اوى اوى اوى وستايل وشعر لأن هيا دى الطبقة اللى معاها فلوس تتفسح فى امريكا وهما عارفين كده لأن عندهم دراسات بكل حاجة وكمان حجز فندق وطيران وكمان رصيدك يبقى فى بنك اجنبى فاتح فى مصر مش مصرى صرف

زيارة عمل يبقى لازم نوع العمل وفلوس فى البنك ومراسلات من امريكا لتوضيح سبب سفرك وكمان اى اثباتات انك راجع تانى مصر

المرض عافاكم اللى والدراسة دى مش عاوزه غير فلوس وجواب من المستشفى او الجامعة ( جواب من نوع خاص )

-- من تجربتى هنا : كل الهنود بياخدو قرض من بنوك الهند ويدرسو سنتين هنا ويشتغلو ويسددو القرض عشان كده امريكا مليانة هنود