الموضوع: ربع مليون كيلومتر مع إلنترا ... يااااااه .. والتقرير أدناه.

الأخوة الكرام
كل عام وأنتم بخير ... ورمضان كريم

أولاً أعتذر عن الإطالة .. بس على العموم أنا شايل الكاميرات علشان تبقى القراءة اختيارى.
أنقل لكم اليوم تجربتى مع الإلنترا بعد ربع مليون كيلومتر من القيادة اللى بعتبرها ممتعة ومريحة.
الأول اشتريت إلنترا 2007 مانيوال فى أكتوبر 2006 ودى كانت من أول عشر عربيات تتسلم فى مصر .. الراجل اللى سلمها لى فى غبور قاللى إنها تالت عربية تتسلم على مستوى الفروع ..
المهم لحوالى شهرين كان الناس بيوقفونى علشان يسألونى على العربية .. طبعاً كان شكلها جديد جداً وغريب عليهم.
وكنت ملتزم جداً بجداول الصيانة ومواعدها حتى 60 ألف كم ..

وبعدين قررت إنى أغير وأجيب الأتوماتيك فى أغسطس 2008.
جبت نفس العربية فى كل شئ عدا الفتيس الأتوماتيك .. حتى كتير من عيلتى وأصحابى معرفوش إنى غيرت .. لأنها كانت نفس اللون ونفس كل حاجة.

وأول ما ركبت العربية الجديدة .. اكتشفت فوراً فارق واضح جداً فى مستوى العربية (الأولى كانت أفضل وأروع وإحساس بفخامة أعلى ومخدومة فى الخامات كويس) وساعد على الإحساس ده إنى سلمت الأولى واستلمت الثانية بفارق أقل من ساعة فالفرق كان واضح حتى فى حزام الأمان.

والتانية كان حظها معايا فى الصيانة أوحش من الأولى بكتير .. يعنى تقدروا تقولوا إنها ماشية بكرم الله ومش أى حاجة تانية .. وهى عاملة بأصلها معايا وزيادة ما شاء الله برغم التالى:

- حتى الآن عاملة 200 ألف كم + 60 ألف لأختها اللى قبلها.
ما تستغربوش من اللى جاى
- صيانة كل ما افتكر أو أفضى لها ..
- تغيير سير المجموعة مرتين فقط + الأصلى بتاع المصنع.
- تغيير أول بوجيهات عند 85 ألف كم.
- تغيير أول فلتر بنزين عند 85 ألف كم.
- تغيير أول كاوتش عند 110 ألف كم.
- تغيير زيت الفتيس عند 145 ألف كم ومعاه الفلتر بتاعه.
- سير الكاتينة ما زال هو هو لحد النهاردة.
- تيل فرامل مرتين فى الـ 200 ألف كم + الأصلى بتاع المصنع .. وكل ما أكشف عليها ألاقيها تمام.
- والحاجات العادية بقى زى الزيوت وسائل التبريد وفلاتر الهواء والتكييف .... وغيره.

التعديلات أو الإصلاحات:
- تغيير السى دى كاسيت بـ دى فى دى تاتش نظام أندرويد وانترنت.
- تغيير جهاز الإنذار الأصلى بآخر وولف فقط للاستفادة بخاصية الغلق الأوتوماتيكى فى حالة أن أنسى غلق السيارة بنفسى .. وذلك بعد أن نسيتها مرتين بدون غلقها .. وأجدها صباحاً فى مكانها بستر ربنا غير مغلقة.
- تغيير طلمبة مياه مرتين .. الأولى اتنصب عليا على أنها أصلية .. والتانية عند المهندس/هانى فى سبيد سيرفيس وكانت فعلاً أصلية .. وماشية تمام لحد النهاردة .. ما شاء الله.


المميزات:
- معظمكم عارفينها مش محتاج أقولها ... قوية .. سريعة .. مريحة .. واسعة نسبياً .. شنطة أوسع حاجة فى فئتها .. قطع غيار متوفرة وسعرها معقول .. طلباتها محدودة .. وغيرها.

المشاكل:
- فيه صوت محدش قادر يعرف مصدره من حوالى سنة .. لكنه مش مأثر على أداء العربية خالص.
- المرايات لما آجى أحركها من خلال الزر الكهرباء بتعاها .. ساعات تعمل صوت صوت تكتكة وما تتحركش .. لما ألمسها بأى حاجة تتحرك.

أخرى:
- أنا فى العادى لم أختبر ثبات العربية على السرعات العالية لأنى ما بجريش .. وسرعتى العادية 100كم .. والـ 120 فى الاستعجال فقط.
لكن مرة واحدة فى شهر يوليو 2011 حصلت حادثة لأتوبيس من أتوبيسات الشركة .. وكانت كبيرة وفيها وفاة وإصابات جسيمة وبلغونى بها وأنا فى البيت .. والمرة دى الوحيدة اللى سوقت فيها 170 - 180كم .. علشان ألحق الحادثة وأقوم باللازم لأن دى مسئوليتى.

أظن كده كفاية لحسن أكون طولت عليكم ولا حاجة ... ههههههه.
أرجو يكون التقرير مفيد ..........

وأى سؤال .. ما أنا راجل خبرة ربع مليون كيلو بقة.
تحياتى
محمد ندا

الأخوة الكرام (بترتيب المشاركة)

memo2000soft ــــــ ehab78 ــــــ mahmoud_afifi ــــــ kisho55555 ــــــ YahiaAshraf ــــــ #MAAM# ــــــ maroww ــــــ aymanshebl

بارك الله فيكم جميعاً وشكراً لمروركم الكريم .. ونورتوا الموضوع.

أما بالنسبة لسؤال أخى mahmoud_afifi عن الـ DVD

أفيدك أنه أيضاً به بعض العيوب كما تفضلت / ومنها أنه بيتوقف أحياناً (بيهنج يعنى).

أما بالنسبة للإنترنت فهو بيلقط واى فاى كويس بس ما بينزلش برامج غير اللى عليه / وما بيعملش تحديث للحاجات اللى عليه لأن الحاجات اللى عليه موضوعة على إى بى روم .. يعنى غير قابلة للتحديث (ودى مشكلة كبيرة بالنسبة لى).

أنا فى شركات صناعات مغذية للسيارات ، ومنها شركة بتعمل أجهزة الدى فى دى ، والسى دى بتاع العربية ، وهذا الـ دى فى دى كان جاى للشركة ضمن عينات كتير علشان نقرر إذا كنا نعمل زيه ولا لأ ، وبعد ما جربنه فى عربيتى قررنا ما نشتغلش فى النوع ده.

بس فيه أنواع تانية كتيرة أفضل منه ، وعندنا حاجات كويسة بس أنا مركبتش منها لأنى كنت عايز أجرب ده ، وعلى العموم أنا هرجع السي دى تانى.

بالنسبة لسؤال أخى maroww عن موضوع ارتفاع العربية والمطبات فهذا موضوع شائع فى عربيات كتر فى مصر وده بسبب الطرق.

تحياتى