صيانة ال30000 كم في التوكيل
رحت انهاردة التوكيل عشان اعمل سيرفيس ال30000 لعربيتي .. المهم فوجئت بزحمة رهيبة عمري ما شفتها فالتوكيل .. و طبعا لحسن حظي ان المهندس طارق زويل ربنا يباركله كان حاجزلي عندهم و الا كنت هلف وارجع تاني D:
قعدت حوالي 3 ساعات منهم نص ساعة طلعت سلمت على المهندس طارق عدت زي الهوا من كتر ما اتكلمنا و المشكلة اني مكنتش نايم من امبارح فالمهندس طارق استحملنا والله من كتر كلامي D:d:d: ... هي دي الحاجة الوحيدة اللي هونت عليا انهارده فالتوكيل .. غير كدة طبعا الموظف اللي استلم مني العربية مش طايق نفسه ولا طايقنا D: ربنا يكون في عونه طبعا من ضغط الشغل .. ورحت اقعد في القاعة استنى العربية لقيتها مرشئة ناس .. شكلهم كانوا بايتين بقالهم اسبوعين في اماكنهم .. و فالمهم استنييت برة لغاية ما خلصت العربية .. و دفعت الفاتورة كانت ب 817 جنيه و 30 قرش "محدش ينسى ال 30 قرش دول" و تفاصيل الفاتورة :
فلتر زيت 30 جنيه
زيت موبيل 1 200 جنيه
لامبة 3 جنيه (و محدش يسألني ايه لامبة دي عشان معرفش D:)
طقم تيل امامي 350 جنيه
سرفيس 115 جنيه
تغيير تيل فرامل امامي 30 جنيه
ضريبة مبيعات 74,30 جنيه
طبعا المفروض انهم يربطوا عالعفشة بس لقيتهم سايبين الشرايط اللي رابط بيهم الطاسات زي ما هما معنى كدة انهم محلوش العجل و ربطوا العفشة بس معلقتش عشان كنت زهقت و عاوز امشي .. بس الفاتورة عالية والا انا بس اللي حاسس بكدة ؟ ممكن عشان مكنتش نايم .. بس انا مبسوط ان اللمبة مش عارف بتاعة ايه دي ب 3 جنيه بس D:
