هي كل البنوك كدة ؟؟؟

**samehafez** · 24-07-2013 04:59 AM

انا فاتح حساب في hsbc ... المهم من فترة و هم عاملين حد للسحب و خصوصا بالعملات الاجنبية ..

طبعا انا عارف ان الموضوع ده في كل البنوك و دي قصة تانية .. لان دي اوامر البنك المركزي ... و اصلا انا شايف ان ده هبل و بيوقف مصالح الناس ... يعني مواطن عاوز يشتري شقة ... انزل البنك 5 ايام عشان اسحب فلوسي .. لا وايه لازم كل يوم ابلغهم اني هاجيلهم بكرة ... ده طبعا في الفروع الكبيرة ... انما لو رحت فرع صغير ... بكل تناحة يقولك مفيش ... علي اساس اني جايلهم طالب صدقة او احسان ... و متقوليش اسحب بالمصري فيه فرق اصلا بين البنوك الخاصة و بنوك الحكومة ... 15 قرش في الاسترليني يعني لو الواحد بيسحب مبلغ كبير بيبقي كانه اتبرع للبنك ب 3 الاف او 4 الاف جنيه .....

السؤال بقي لو انا عاوز اشتري عملة اجنبية ... مفيش ... طبعا ... طيب انا هديلك استرليني و انت تحولهم مصري و اديني دولار..... الاجابة لا اغيرلك استرليني لمصري ماشي انما اديلك دولار معنديش .... طيب ام اللوحة اللي مرزوعة عالحيطة و فيها سعر البيع و الشراء دي ليه .... يا تري كل البنوك كدة و لا البنك ده بس ؟؟؟

سؤال تاني لولبي ... هي البنوك الخاصة اللي حاطة اسعار في البلالة ليه .. يعني بيفكروا ازاي ... طيب لما انت معندكش استرليني ... طيب علي الاقل حط سعر عالي عشان الناس تيجي تغير عندك مش هقول زي شركات الصرافة ... علي الاقل زي البنوك الحكومية ... معندوش عملات اجنبية ... عشان يدي العملاء فلوسهم و حاطط سعر في الارض .. ده اسمه ايه؟؟؟

**Dr.Mostafa Anwar** · 24-07-2013 05:35 AM

لك الله يا مصر

**Trondo** · 24-07-2013 07:47 AM

ياسيدى الفاضل الموضوع دا فى كل البنوك
من حوالى ٤ شهور تقريبا
انا عميل فى ثلاث بنوك cib hsbc nsgb
و مسموح تشترى مبلغ محدد فقط لعميل البنك اللى بيكون مسافر
و بيكون معاه التيكت و الفيزا و المبلغ بيختلف من بنك للتانى
و موضوع تدخل عمله فى دولار محدش بيعمل كده غير الصرافات

موضوع تبلغ البنك قبلها دا لو مبلغ كبير و دا طبيعى فى الازمه اللى احنا فيها

بالنسبه لموضوع سعر الصرف بيكون شبه موحد بين كل البنوك و الصرافات و بيكون من البنك المركزى
و ممكن السعر يتغير فى اليوم مرتين يعنى الصبح بسعر و بعد ١٢ بسعر ... نادرا بيحصل

و على فكره بنك hsbc يعتبر من البنوك المميزه جدا و معاملته رويال قوى بالاخص لو حسابك ادفانس او بريمير
و اكتر بنك عنده اقوى انترنت بانكنج فى مصر و الوحيد اللى عنده ابليكشن على الايفون تدير منه حسابك

فعلا مصر ليها ربنا بعد الرئيس المعزول اللى فى عهده وسوء ادارته الدولار وصل من ٦ جنيه لحد ٧.٤ سوق سوداء

**wawamoha** · 24-07-2013 10:08 AM

فعلا بنك hsbc محترم جدا ...
بس دي قوانين البنك المركزي ..معلش استحمل و اسحبهم استرليني عل كام يوم

**mr_green** · 24-07-2013 11:31 AM

أنا ليا تعاملات مع
hsbc
cib
nsgb
الأهلى
البركة
العربى الأفريقى
باركليز

أفضل معاملة و ثقة و راحة بال hsbc
بعده cib

الباقى عك - موضوع العملة ده من البنك المركزى مالهاش حل مع أى بنك

**Ahmed_Adham** · 24-07-2013 04:14 PM

أنا برضه hsbc ولو عندك حتى رصيد بعمله اجنبيه مبيرضاش يحول لمصري اونلاين لازم تروح البنك. تروح البنك بقى يقولك أقصى حاجه 10 تلاف دولار في اليوم وتحجز قبلها بيوم. كنت قبل كده في NSGB برضه وكان نفس النظام تقريبا بس أنا مشيت من nsgb عشان الانترنت بانكينج بدائي جدا جدا انما hsbc شتااااااااااااااااااااااا ااااااااااااان