الموضوع: واحد خبطلي عربيتي ... والظابط صاحبو كان عاوز يلبسني جناية وجنحة كمان هههههههه

بصوا الموضوع باختصار كنت خارج اجيب سحور
باختصار قلت لاعز اصدقائي سوق انتا العربية ... انا مبقاش ليا خلق اسوق زي ما انتا عارف البلد بقت زبالة
المهم طلعنا وجت فتحه يوترن ادينا اشارة وبنلف عادي. في نفس اللحظه. الي واحد
طافي نوروا و داخل عكس و داس بانزين ومش شايف اننا قداموا
وراح رازع عربيتي من ورى مكسرلي الفنوس الخلفي ومجرحلي الاكصدام
المهم متشغلوش بالكم بالتفاصيل دي كلها مش مهم

الراجل قعد يقاوح ويقول اننا احنا وقفنا قداموا فجئة ... واننا احنا الغلطانين وشوية كلام قلت ادب يحرق الدم ( كمان كل التفاصيل دي مش مهمة بس خلتني فوق قلت ادبوا قلتوا طب وحيات قلت ادبك دي لاتصلح عربيتي ... قالي مش مصلح قلتلوا يعني ايه مش مصلح. ... طيب خلاص هكسرك فنوس ووحده بوحده وقلك سلام عليكم عليكم السلام ( من اتلف شياءً عليه اصلاحه !!

قالي لا انتو الغلاطانين. المهم جيلكم بالكلام واحد لا اعرفوا ولا يعرفني جه وقالوا يابيه على فكرة انتاغلطان اولاً لانك انتا الي ورى. وثانياً لانك جي عكس وثالثاً لانك بتلف ومش باصص قدامك وخبط الجماعه

( المهم ماعلينا من التفاصيل )

وبرضوا الواد بيقاوح معايا جه واحد تاني من الموقف لا اعرفوا ولا يعرفني ولا عمري شفتوا في حياتي برضوا قال للواد يابيه. يا باشمهندس انتا غلطااااااان ... برضو مفيش فايدة كان في واحد برضوا كان واقف بيشرب قزازة حاجة ساقعه صاروخ جيه بعد ما خلص اخر بووق. وقالوا على فكرة بامانة الله بامانة الله. انتا غلطاااااان .

المهم الواد داخل في دور قلت ادب على هبل ... قال ايه هوا ممعهوش فلوس. وبعدين بعدين نعدي عليه في المكتب. يديلنا قرشين. لان سمو جنابوا مش فاضيلنا ( طبعاً انا وولعت منو اكتر واكتر ). يعني حسسني انوا هو اهم مننا سمو البرنس واحنا على هامش الحياة. ... ايش حال هو راكب عربية افيو سوده جربانه مترزعه من كل حته .

المهم عربيتي انا["] عليها تامين شامل ... بس قلت ادددددب الواد الي لو كان نزل من البداية واتكلم باحترام واعتذر كنت قلتلوا خلاص حصل خير يا ابني توكل على الله رمضان كريم ... اما الجحشنة واسلوبوا معانا خلاني بقيت عاوز ارزعو جوز اقلام هو والبنات الي معاه ... من قلت ادبو وادبهم ... وقلوا خلاص في محل بتاع قطع غيار اهو فاتح هات فانوس قالك مش هجيب قلتلوا طيب هتدفع فلوس قالي مش دافع. قلتوا خلاص تديني بطاقتك وفي اي وقت تجيب الفلوس قال مش هديك ودي مسؤوليه قلتلوا طب نروح القسم نعمل محضر قالي لا ... المهم شوية بصيت لقيتوا اتصل بزابط زميلو

وهنا بقه اساس القصة .... بعتلنا الافندي بوكس وقام سحبنا على القسم
مسافة ما رحت اجيب بطاقتي ورجعت كان مشى صاحب الافيو وروحوا
طبعاً انا دخلت القسم بقول لصاحبي ايه هو الواد راح فين قالي مشي قلتلوا مشي ازاااااااي اومال احنا هنعمل محضر لمين !
قالي لا مالزابط اتفق معايا انو نمشي الواد في مقابل انوا يعملنا محضر تامين ويستف لنا المسائل ولا نروح نيابة ولا ديولوا. وهيدينا صورة حالاً من المحضر دلوقتي وان التامين مش هيصلح لو الي سايق العربية مش صاحبها .

المهم قلتلوا يالله مش مشكلة
وبعد ما اتلطعنا ساعه في القسم ... جيلنا الزابط ابو نجمتين بيلمعوا بسم الله مشاء الله
جي بيقولي اهو الامين معاك هو الي هيعملك كل حاجة ... قالي بطاقتك اديتوا بطاقتي
قالي رخصك اديتوا رخصي
بصيت لقيت ماسك ورقه جربانه في ايدوا الي هيا المحضر ومكرمشها كده قالي عاوزين نعاين العربية هيا فين العربية قلتلوا بره طلع يبص على العربية لقى رخصة القيادة بتاعتي منتهية بقالها خمس تيام
قالي اااااااه على فكرة انا هعملك المحضر وكل حاجة بس لازم احجز على العربية ... واعملك محضر ... قلتلوا ليه قالي دي ساعدتك جنحة القيادة برخصة منتهية. لاني ممكن اعملكم المحضر كده عادي والنيابه ترجعلي المحضر وتقلي ازااي معملتش للمتهم محضر جنحة قيادة من غير رخص ... قلتلوا ايووه بس مش انا الي كنت سايق ده صديقي قالي ماهو لو عملنا المحضر هو الي كان سايق يبقى التامين مش هيدفعلك حاجة ...
قلتلوا اااه وعلشان اخود حقي. تلبسني جنحة .... وعلشان اخود حقي لازم يضيع حقي .
وطبعاً لو العربية اتحجزت عندكم وهيا موديل ٢٠١٣. اكيد هتتقلب هنا وهرجع الاقيها على الشاسيه
المهم
عرفت الفولة الزابط حب يجامل صديقوا وصحبو
انوا يلبسني تهمة او جناية لمجرد اني عاوز اخود حقي
وبدليل : ورقة المحضر الي متكرمشه في ايد الامين الي روقنا وكيفنا صح
لطعة الظابط ليناااا ...
مشى الواد المذنب من غير ما يتخذ اي اجرائات اتجاهوا وانا اقطع ايدي لو معاه رخص اساساً
او العربية الافيو دي بتاعتو .

المهم افتكرت صورة كوميديه على الفيس بوك بتقول
( جوازك في ايديك تزكرتك في جيبك وخود بعضك وسافر .... والي يقولك مصر لسه فيها امل قلوا أمل دي تبقى أمك ) هههههههههههههه