الموضوع: سؤال الى المهندس طارق زويل

أهلا بحضرتك يا استاذ نادر

انا بس كنت عايز اعرف العربية مصري ولا خليجي - ومانوال ولا أوتوماتيك - وهل سبق عمل اي صيانات للعربية أو حتى تغيير زيت وفلتر ولا لأ.

هو بخصوص الصفارة اللى مع الفرامل فدي حاجه بسيطة هي العربية محتاجة تيل فرامل وده هيتأكد بالكشف عليها ، وده طبيعي خاصة لو هي أوتوماتيك.

كذلك انا فهمت من كلام حضرتك ان العربية عاملة 15000 بدون ما تعمل لها اي صيانات رغم أن صيانات العربية بتكون عند الألف الأولى تغيير زيت وفلتر ثم عند العشرة آلاف ثم العشرين ألف ثم الثلاثين وهكذا كل 10 آلاف كيلو متر فيه صيانة دورية أساسها تغيير الزيت وفلتر الزيت ثم صيانات أخرى مثل المراجعة على تيل الفرامل والسيور والفلاتر وغيرها.

لو حضرتك معملتش اي صيانات قبل كده فيجب تغيير الزيت والفلتر في أسرع وقت ممكن وكذلك الكشف على تيل الفرامل لو محتاج تغيير

لو حضرتك بتغير الزيت والفلتر يبقى كل المطلوب هو الكشف على تيل الفرامل لو محتاج تغير والأفضل شراء تيل أصلي وسعره 385 جنيه شامل الضريبة

هو الطبيعي ان الـ 10 آلاف كيلو يتعملوا في 6 شهور والعشرين في سنة وعلشان كده بيكون الضمان 20 ألف أو سنة (ومضاعفاتها مثل 60 ألف أو 3 سنوات)

فحضرتك استهلاكك نص الطبيعي يعني 10 آلاف في سنة ومفيش مشكلة من تغيير الزيت كل سنة

بخصوص تيل الفرامل فالمطلوب الكشف عليه وتغييره لو تطلب الأمر ويفضل من دلوقتي لأن صعب الانتظار لصيانة العشرين حيث أن المشي كتير على تيل منتهي بيسبب تآكل طنابير الفرامل وتحتاج الى خرط فيما بعد

وتحت أمرك في أي سؤال