لفيت النهاردة على حاجة طلعت عينك ... اشرح لنا تجربتك عشان نستفيد
السلام عليكم ورحمة الله وبركاته
كل يوم واحد منا بيلف ويدور على حاجة لعربيته ... وممكن الحاجة تكون سهلة قوى وموش عارف مكانها لكن فيه غيره عارف مكانها بالصدفة ... او نتيجة خبرة قديمة فى مجال السيارات
عشان كده ممكن كل واحد يكتب لنا تجربته مع التجار الاستيراد وكيف تعامل معهم
او مع محلات قطع الغيار الجديدة
المهم اننا نتعلم مع بعض ونتعرف على التجار المحترمين ...
ههههههههه والحراميين
هابدأ بنفسى
بعد مشوار بالعربية صغير
المفروض ان بعد ما بتطفى السيارة بتسمع صوت المروحة لفترة قصير ثم تتوقف
المرة دى ماسمعتش حاجة خالص ههههههههههه
المهم كنت تعبان
طلعت ارتاح شوية
وقبل الفطار بساعة
قلت انزل اشوف ايه الحكاية والجو "طراوة"
اشغل مفتاح المروحة المباشر ... اللى كلنا مركبينه داخل السيارة
المروحة لم تعمل
سواء شغلت العربية .. او طفيت العربية
فتحت الكبوت
ووجدت ان المروحة لها 2 سلك
سلك راكب فى جسم الموتور ... على طول عرفت ان ده سلك "الارضى"
روحت مقشر حتة من السلك التانى
وباستخدام وصلة سلك من عندى ... وصلت الطرف الثانى على الموجب بتاع البطارية مباشرة
المفروض ان المروحة تشتغل لانى كده "لاغيت" كتاوت المروحة
ووصلت لها من البطارية مباشرة
المروحة لم تعمل
http://images.gasgoo.com/MiMgIzkyNDM...an-yz-9862.jpg
دى صورة المروحة تقريبا
ريحت نفسى
وقلت كده المروحة دى جابت من الآخر
الله يرحمها
نزلت بعد الفطار قبل الزحمة
واخويا كتر خيره
فك القميص اللى راكب فيه المروحة
هو فكه سهل ... لكن الافضل انك تخرج البطارية الاول عشان توسع لنفسك
ويا ريت تفك المروحة بالنهار والعربية باردة عشان تشوف كويس
يمكن مسمار يقع كده ولا كده
المهم
اخدنا القميص بالمروحة
ولف يا معلم فى الحرفيين
وكل واحد يعمل فيها استاذ
ويفضل يسئلك العربية نوعها .. وتاريخ ميلادك ايه ههههههههههه لحد فى الآخر يقولك
لا والله المروحة دى موش عندى
المهم
اكتشفت بالصدف ان اللى كان شارى العربية مركب لها مروحة عربية "سكودا" من الموديلات الحديثة
طبعا انسى يا معلم انك تلاقيها
وكمان انسى ان صنايعيى يقول لك تلاقيها فين
واحد من التجار يقول لنا انا اجيبهالك بـ 350 جنيه
يا عم كده كثير
طيب خلاص نخليها 300 جنيه والصنايعى ده يروح يركبهالك
لا خلاص مافيش مشكلة مرة تانية
يجرى وراك ويقولك خلاص خليها 250 جنيه
المهم بعد البحث ... يرجع يقول لك انا آسف مافيش زيها
وكمان موش عايز يقول دى نوعها ايه
زميله يقول لك دى موجودة عندى فى المخزن .... لكن المخزن فى شبرا
طبعا هى لا موجوده عنده فى المخزن
ولا حاجة
هى كل الحكاية هو عارف هايجبها منين
وهايطلع له حسنة فى الحكاية دي
شوف الحظ
بعد اللف والدوران
والساعة اصبحت 1 بالليل على الاقل
والناس هاتروح وتقفل المحلات
عيل صغير فى محل راديتير ... وعشان هو لسه طفل صغير موش عارف حاجة من شغل السوق
يقول لنا دى مروحة عربية "تمبرا" يعنى فيات تمبرا ... برغم ان القميص بتاعها مكتوب عليه "سكودا"
على طول نروح لاول او تانى محل شغال فى الفيات
وفى خلال 5 دقائق
يطلع لك ولا 20 مروحة
وجرب يا معلم
وركب والف شكر
كام الحساب
160 جنيه وبدون فصال كثيير
وشغل وجرب ... زى الفل
ملحوظة: اوعى تنسى سلك المروجة "الكابل" بتاع المروحة الخاص بها
لازم تاخد الكابل من البائع ... وممكن هو يحط لك شوية زيت ... او اى كهربائى يفك الريش ويحط نقطتين زيت ... او هى مع الاستعمال هاتتخلص من الاتربة
وما تخفش من صوت المروحة ... فى الاول هاتعمل صوت عشان الركنة
لكن بعد كده موش هاتسمع حاجة إن شاء الله
اهم حاجة ان المروحة مايكونش فيها "رولمان بلى" بايظ
والحكاية دى بترجع لخبرتك او امانة البائع
وهايظهر صوتها بعد فترة من شراءها
لو هى سليمة
خلال مشوار او مشوارين موش هاتسمع صوت خالص ... وده دليل على جودتها
وطبعا خلال التجربة لازم يكون عينك على التابلوه .... وتتابع الحرارة
وممكن تجربه اكثر من مرة والسيارة متوقفة
المهم
اطلع على العربية
وفى 10 دقائق ركب المروحة
وتأكد من اتجاه الهواء
يعنى لما بتغير او بتبدل السلك بتاع المروحة
اتجاه الهواء بيتغير
ومعلومة مهمة انا كنت ماعرفهاش
ان المروحة لازم اتجاه الهواء يكون ناحية الموتور
ههههههههههه
يعنى اعتبر نفسك جالس على الموتور
وعايز المروحة تهوى عليك
بعد ما تتأكد من اتجاه الهواء .... وده مهم جدا
ركب واتوكل على الله
وممكن تحتفظ بالريشة بتاعة المروحة القديمة
عشان لو كانت مثلا اكبر شوية
او لو ريشة المروحة الجديد انكسرت لا قدر الله
وممكن تحتفظ بالمروحة القديمة
عشان لو حبيت تجيب زيها لو احتجت لا قدر الله
معلهش هى قصة طويلة
لكن حبيت اقول لكم عليها عشان كلنا نستفيد مع بعض
يا ريت كل واحد يكتب لنا تجربة فى اللف والدوران مع قطع الغيار وحل المشكلة بتاعته ازاى
مع اطيب التمنيات
اخوكم حسين غزالة
