مشكلة التكييف

**ehab4367** · 26-07-2013 12:30 AM

تعبان ومش لاقى حل
مشكلة التكييف عندى انة بيشتغل لمدة 30 ثانية وبعد كدة يفصل فريون
(البرودة)-يعنى بتشتغل المروحة بس- روحت للصنايعى قالى دة فى تسريب فريون لانى فى اثار تشنيع على الماسورة.
ففضى شحنة الفريون الموجودة الاول وغير اولسين وشحن كيلو فريون ونضف السربانتينة ومروحة التكييف واخد 250 جنية
ولسة المشكلة زى ما هى.
مش عارف اعمل اية؟؟؟؟؟

**مصطفى-حسن** · 26-07-2013 01:04 AM

احتمال يكون فية حاجة فى الكلتش
او فى دائرة الكهرباء بتاعة الكلتش
ومش هتخسر حاجة لو راجعت على علبة الفيوز اللى فى الحوض
عشان تبقى فاهم
اللى بيحصل عندك ان الكلتش بيفصل من على الطمبورة بعد 30 ثانية
والصنايعى اللى شحنلك فريون دة
يا اما اهبل ومش فاهم حاجة
يا أما بيشتغلك عشان ياخد فلوس وخلاص

**rotanamasoud** · 26-07-2013 02:31 AM

المشاركة الأصلية كتبت بواسطة ehab4367

معلش عشان انا راجل جاهل
اية هو الكلتش؟
واية معنى ان الكلتش بيفصل من على الطمبورة بعد 30 ثانية؟
شاكرينننننننننن

عامل زى دبرياج بس بيشتغل بالكهربه
وهو اللى ماسك الكمبريسور (الطاره اللى عليها السير بتاع الكمبريسور)
والفصل لان فى حاجه بتفصل عنه الكهربه هى سبب المشكله
وبيشتغل الكلتش عند توصيل الكهربه له بجعل الكمبريسور يدور مع الطاره وعند الفصل لا يدور

**مصطفى-حسن** · 26-07-2013 02:49 AM

بص يا ريس
المشكلة اللى عندك دى مشكلة كهربا
مش مشكلة فريون
يعنى انت تروح لكهربائى وتوصفلة المشكلة
ممكن يكون الارضى بتاع الكلتش او الكلاتش (على حسب النطق) فية مشكلة
او فى الريلاى
وعشا تبقى فاهم
اكسر عجل العربية يمين قوى
وبص من عند العجلة اليمين الامامية
هتشوف سير ماسك 3 حاجات
بلية الشداد ودى اخر واحدة تحت
وطمبورة على اليمين ودى اللى قدامها علطول الكلتش او الكلاتش وهتلاقية جسم دائرى في نفس حجم الطمبورة اللى ورا منة بس هتلاقى فية حاجة زى زراعين حديد صغيرين مبططين
والطمبورة الرئيسية بتاعة الموتور دى اللى على الشمال

لما انت بتدوس على زرار A/C الكلاتش دة بقفش على الطمبورة اللى ورا منة (والمسافى بينهم بتكون غالبا 5 مم ) فالكباس بتاع التكييف بيشتغل والفريون بيمشى دوة دائرة التبريد

فلما التكييف يفصل بعد 30 ثانية يبقى معنى كدا ان الكلتش او الكلاتش فصل من على الطمبورة
ودى قصة كهربا
مش شحن فريون

انا حطيت لك صورة توضحلك كنت عاملها فى موضوع تانى متشغلش بالك بالخطوط الصفرا اللى فيها الخطوط الحمرا والكلام باللون الاحمر هوا اللى يخصك

**tarek_2005** · 27-07-2013 10:48 AM

عيب
1 - شحنة فريون عالية جداً (( كيلو فريون كتير اوي اوي علي اللانوس ))
2 - عيب كتاوت كباس
3 - عيب حساس الفريون الي علي خط الطرد اعلي البطاحة اليمين

بالترتيب الي ذكرته