الموضوع: دلـيـل لـطـلـبـة الـثـانـويـة الـعـامـة و مـحـتاريـن يـدخـلـوا كـلـية ايـه

بسم الله الرحمن الرحيم
السلام عليكم و رحمة الله و بركاته

الموضوع ده حبيت اكتبه عشان الناس اللي في ثانوي و التنسيق و محتاريين يختاروا ايه او مش عارفين مستقبل و مجال كل كلية
فالموضوع ده عشان يساعدهم بما اننا الجيل الاسبق فلازم نشاركهم بخبراتنا

بس مبدأيا احب أوضح مفيش حاجة اسمها حقوق ملهاش لازمة او تجارة ملهاش لازمة او قسم ملوش لازمة و قسم ليه لازمة لا يوجد غني عن اي مهنة فكل مهنة بنحتاجها و كلهم بيكملوا بعض
و ابسط مثل شركة مقاولات
المهندس المعماري بيرسم و يخطط
و المهندس المدني بينفذ
المحاسب بيمسك حسابات الشركة و مسئول عن الرواتب و الميزانية
المحامي مسئول عن الشئوون القانونية و كل ما يتعلق بالجانب القانوني للشركة مثل العقود و التحقيق مع المخالفيين زي المهندسين و المحاسبيين و الاداريين بشكل عام
الدكتور مسئول عن علاج و فحص اي شخص يصاب في الشركة او في موقع العمل
خريج اداب لغات مثلا و اداري في العلاقات العامة مثلا مسئول عن الكلام مع اي جهة اجنبية بينهم بين الشركة اتفاق و عقود
خريج حاسبات و معلومات مسئول عن اجهزة الكومبيوتر و الصيانة و البرمجة و الشبكات في الشركة
المدير فوق كل دول ممكن يكون من خريج كلية ملهاش علاقة بنشاط الشركة لكن اكتسب خبرات تؤهله

شوفتوا ازاي كله مهم و بيكمل بعضه مش معني انك مدخلتش هندسة او طب يبقي تزعل طب مانا كان قدامي فرصة هندسة او تجارة او اداب او او لكن فضلت حقوق و كان معانا ناس في الكلية ما شاء الله فوق الـ93 و 95 % و فضلوا حقوق :)

محدش يجي يقولك اللي بتدرسه جوة غير برة او تذاكر قبلها بشهر كل ده كلام فشلة او ناس الدراسة مش في دماغها انا في شغلي اعتمدت ع اللي درسته في مرحلة الليسانس زي مثلا قانون الاجراءات الجنائية في حين بشوف محاميين قدام و بيستعينوا بكتب في الاجراءات الجنائية عشان قضية ده مثل ع اللي بندرسه
اما في الدراسات العليا فاحنا بندرس القانون مع التعمق و القانون المقارن :)


نيجي بقي بقائمة الكليات و مجالها بعد التخرج اينعم الموضوع مش شامل بس ع الاقل هيوضح لناس كتيير

حقوق : بتدرس القوانين تجاري و دستوري و اداري و بحري و جوي و جنائي و مدني و دولي ...الخ..الخ حتي اقتصاد بتدرسه
طب خريج كلية الحقوق مجالاته بعد التخريج النيابة العامة او الادارية و طبعا القضاء و مجلس الدولة او هيئة قضايا الدولة او محامي حر او شئوون قانونية في اي شركة او بنك او مؤسسة او وزارات او اي وظيفة ادارية و للعلم بيفضلوا دايما في العلاقات العامة خريج حقوق و المحاميين نظرا لأنهم من النوعية نقدر نقول بتعرف تتواصل اكتر مع الاخرين و طبعا خبراتهم و علمهم بالقوانين و بمجالات كتييير يقدروا يديروا اماكن كتيير
و عشان تبقوا عارفين المحامي لازم يكون مطلع و بيحب القراءة و عنده الحد الادني من المعلومات في كل المجالات من هندسة و طب و علوم كيمياء و فيزياء و احياء و علم نفس و حتي تاريخ و جغرافيا كل ده بيساعدك في شغلك و هتستغربوا لما تلاقوا ان محاميين و مع ذلك شغالين محاسبيين ده احنا جبارين هههههههه
و المقولة تقول ( ان تعرف شئ عن كل شئ خيرا ان تعرف كل شئ عن شئ )

تجارة : بتدرس مبادئ الادارة و المحاسبة و البنوك و غيرها و بعدين التخصص سواء ادارة اعمال او محاسبة و الغالب بيختار محاسبة طب خريج محاسبة بعد التخرج يعمل ايه
يكون محاسب في شركة او وزارة او بنك و يعيش و يتعايش مع الحسابات و الارقام


آداب : حسب التخصص سواء لغات شرقية او غربية او اثار او تاريخ جغرافيا او اعلام او مسرحي و الاقسام متعددة و كل قسم بيدل ع مجاله بعد التخرج
يعني لغات تقدر تبقي مرشد سياحي او مترجم و تفتح بقي مكتب ترجمة و تعيش او مترجم في مكان او حتي مدرس في مدارس خاصة
الاثار كذلك
مسرح طبعا تمثيل تتخرج و تطلع كارنيه النقابة و تمثل و تبقي نجم هههههه
و هكذا

هندسة : فيه سنة في الأول اسمها اعدادي و ديه عامة شوية و بعدين بقي بتدخل في التقيل و تتخصص و تقديرك في الأول بيحدد التخصصات اللي تقدرها تدخلها و ما اكثرها
الكترونيات او كهربا او معماري او مدني او ميكانيكاسواء سيارات او قوي او .. الخ الخ
طبعا اي شركة في المجال الي اتخصصت فيه تقدر تستفيد منك يعني معماري بتخطط و بترسم في شركات مقاولة او مكاتب هندسة و المدني بينفذ برده في نفس الاماكن
و الباقية بتدل ع الاماكن
و مننساش هندسة بترول و مجال شركات البترول و التعدين و التنقيب

طب : طبعا معروف بتدرس الطب عام و بعدين تتخرج تقعد سنة امتياز و بعدها بتبقي طبيب عام و تعمل ماجستير و تتخصص بقي زي ما انت عايز
و ممكن تشتغل في مستشفيات او مراكز طبية بجانب انك تفتح عيادة بس ابقي راعي الناس اللي ع ادها او اي قسم طبي في شركات او وزارات

صيدلة : بتدرس الادوية و التركيبات ..الخ...ألخ و هتطلع دكتور صيدلي و تفتح صيدالية :)

علاج طبيعي : خاص بالعلاج الطبيعي ابسطها شوية يعني مثلا شخص لا قدر الله عمل حادثة و كان عنده زي شلل و ابتدي يتحرك انت بتعالجه بقي عشان يتحرك ده غير السمنة و التخسيس و الليزر و الكلام ده يعني هتطلع كاشات لوز يا ريس هههههههههه

طب بيطري : هتعالج الحيوانات سواء في مستشفي بيطري او تفتح عيادة

حاسبات و معلومات : تتلخص في كلمة واحدة الكومبيوتر هتتعلم كل حاجة و بعدين بقي تبقي مبرمج او شبكات او .. او .. الخ الخ زي ما انت عايز
و الاماكن كتييير اي شركة او بنك او مؤسسة عامة بتحتاجك عشان تظبط الاجهزة و تعملها صيانة و تبرمج و تعمل شبكة للمكان و تحميها و هكذا

علوم : برده ع حسب التخصص و تخصصاتها كتييير كيمياء باقسامها او فيزياء باقسامها او تدرس التركيبات و التحليلات الطبية او علم النبات او علم الحشرات او جولوجيا فلك و ارصاد جوية او .. او .. الخ
و كذلك كل قسم بيدل و ده مجالك ياما تبقي عالم بقي و تخترع و تبقي مخترع كبيير و مش هنعرف نكلمك بعد كده هههههه ياما تشتغل في الهيئات الخاصة بمجالك يعني مثلا جولوجيا بتدرس الارض و التغيرات و الزلازل و البراكن و هكذا ده مثال بسيط يعني
فلك و ارصاد جوية طبعا مفهومة و هكذا


السن : هلخصها في كلمة واحدة لغاااااااااااااااات كل ما تتخيله و متتخيليوش في اللغات

آثار : الآثار و ما احلي الآثار بتدرس بقي اللغات القديمة و الاثار فرعونية او يونانية او ..او..او و طبعا مجال العمل في الاثار و السياحة و للعلم انا بحب الاثار و التاريخ جداا

اقتصاد و علوم سياسية : ع حسب القسم اللي بتتخصص فيه هو بيبقي مجال عملك يعني اقتصاد بيكون في البنوك و البورصة و وزارة المالية قسم احصاء مثلا في اي مكان لأن اي مكان يحتاج موظفيين للاحصاء قسم علوم سياسية يبقي هنتكلم ع مراكز البحوث الخاصة او التابعة للدولة و الصحافة و الاعلام و هكذا

تربية : اقسامها كتيير برده و ع حسب التخصص بس بشكل عام وزارة التربية و التعلم و المدارس

فنون جميلة : ليوناردو دافنشي يعني تطلع فنان و ع حسب تخصصك برده

زراعة : هتدرس كل حاجة عن الزراعة و المحاصيل و كل ما يتعلق بيها
ممكن تشتغل في وزارة الزراعة او اي مكان خاصة بالزراعة او حتي لو عندك اراضي هتعرف تزرعها ازاي و تزرع صح و تطلع انتاج كويس

اعلام : هلخصها في الصحافة و الاعلام و ما يتعلق بهم و تشتغل بقي في القنوات و مش بعيد تبقي مذيع او الجرائد و تبقي صحفي و تبهدلنا يا عم بمقالات ههههه

سياحة و فنادق : من الاسم في مجال السياحة و الفنادق و ادارتها و هكذا


ده كان ملخص سريع و بسيط لأغلب الكليات اعذروني لما اتناول المعاهد في الموضوع لكن الموضوع كما اوضحت مش شامل لكن ليساعد في الاختيار
و اخيرا اختار المجال اللي تحب تشتغل فيه بعد التخرج ان شاء الله و في نفس الوقت مع مراعاة الكليات اللي تقدر تدخلها بناءا ع درجاتك
ياما ناس دخلت كليات بناءا ع رغبة الاهل مجبرين و هم مش عايزنها و النتيجة ياما فشلوا او تخرجوا لكن غير ناجحين في مجالهم او اشتغلوا في مجاله غيره
و امثلة ع ذلك اصدقاء ليا دخل هندسة بناءا رغبة الاهل و كان عايز حقوق لكن رفضوا و كان ناقص يطرد و في الاخر بعد ما دخل سقط او سنة مرتين تاني سنة مرتين و ساب الكلية و بقي في كلية الحقوق و عمره 21 سنة بدل ما يكون اتخرج و اتخرج و هو 25 سنة
صديق اخر دخل طب برده بناءا ع رغبة الاهل و مكنش عايزها و بعد ما اتخرج مشتغلش دكتور و اشتغل في مجال البرمجة و الكومبيوتر
ده مثال بسيط و احيانا بتبقي رغبات الاهل و الطالب متوافقة
انا فضلت حقوق علي هندسة و تجارة و اداب و محدش اعترض في البيت :)

فلازم تختار المجال اللي تحبه و في نفس الوقت تقدر تشتغل فيه بعد التخرج
و في نفس الوقت تطور من نفسك اثناء الدراسة و بعد التخرج يعني كورسات و لغات و دراسات عليا بعد التخرج ان شاء الله لأن كل ده بيفيدك و يرقيك في المكان اللي بتشتغل فيه و بالتالي بيبقي ليك مركز اكبر كل ما بتدرس و بتكتسب خبرات و في نفس الوقت مرتب اعلي

بالتوفيق للجميع ان شاء الله

تجديد للافادة