الموضوع: رسالة لكل مصرى و لكل شاب مسيحى

ربنا يصلح الحال

مش فاهم !!!
إيه الرسالة اللي عاوزها توصل ؟؟
شايف أن المسيحيين بيشمتوا في أي حد ملتحي بيتاذي؟؟
ولا بتهدد المسيحيين من الشماتة ؟؟
اصل انا مشفتش حد اتاذي لمجرد انه ملتحي.
و بنحزن لكل عداء سببه فتنه طائفية سواء كان علي مسيحيين أو مسلمين أو حتي شيعي.
عاوز رأيي ؟؟ إحنا عمرنا ما هنعرف نتعايش مع الاختلاف إللا لو بطلنا نفكر فيه ونفصل مابين توجهات الناس الدينية و ما بين علاقتنا بيهم.
الصح إدانة التعصب سواء ديني ( مسلم و مسيحي ) طائفي ( سني شيعي أرثوذكسي كاثوليك إنجيلي ) أو عرقي ( اسود ابيض اصفر ).
من الآخر كلنا مصريين شبه بعض.

فى تشوهات موجودة فى نفوس الكثير من الناس بسبب التعرض لاحداث مؤلمة نفسيا..... يعنى مثلا حادثة تفجير كنيسة القديسين كانت زلزال لاى حد بيفكر بشكل انسانى..... لكن فى ناس ممكن تلاقى منهم ردود افعال مختلفة- و ممكن تكون مشوهة..... حسب خبراتهم السابقة و خلفيات افكارهم و توجهاتهم..... و خد عندك امثلة:

- رد فعل مصرى مسيحى متألم لما حدث: ارحمنا يارب و ارحم الشهداء دول دلوقتى فى السماء فى مكان احسن ربنا يرحمهم

- رد فعل مصرى مسيحى غاضب: ادى اللى بيحصل لنا فى البلد دى ..... و ادى قيمتنا فيها..... كراهية و تكفير و قتل و تفجير و يوم عيد يتحول الى ميتم كبير

- رد فعل مصرى مسيحى متعصب او نفسيا مش تمام: ربنا ينتقم منهم كلهم و يجازيهم من جنس افعالهم

نيجى بقى للوجه الاخر من العملة.....

- رد فعل مصرى مسلم متألم لما حدث: لا حول و لا قوة الا بالله.... ليه كده و ازاى ده يحصل يوم عيد يتقلب فيه العيد لميتم..... الله يرحمهم جميعا و يحمى بلدنا

- رد فعل مصرى مسلم غاضب: مش الممكن الفشل اللى البلد فيه..... مفيش حد بيشوف شغله فى البلد دى و النتيجة كوارث..... ربنا يرحمنا جميعا

- رد فعل مصرى مسلم متعصب او نفسيا مش تمام: احسن ياريت تيجى مصيبة تخلعهم كلهم من البلد..... الكفرة اللى مش عايزين يدخلوا لدين الله افواجا.... كله من ده عشان يبطلوا يستقووا بالغرب الكافر..... تسلم ايد الاخوة المجاهدين اللى عملوها


طبعا ممكن تترواح ردود الافعال من وقت لوقت و كمان من درجة لدرجة..... لكن النفسية السوية لما بتيجى تنجرف و يعمى عينيها الغضب او التعصب او الكره او غيره من المشاعر السلبية بيبقى سهل عليها تفوق بسرعة و تطرد المشاعر السلبية دى لانها بتبقى دخيلة عليها و كمان بيبقى سهل عليها الرجوع لطبيعة احساسها الانسانى المعتاد

و طبعا واضح من ردود الافعال التخيلية دى حاجة مهمة..... هى ان ردود الافعال الانسانية تملى تلاقيها تتعاطف مع الانسان و ظروفه ايا كان بغير تمييز لان الانسان ايا كان بالنسبة لها قيمة عظمى فى حد ذاتها.... عشان كده تلاقيها تتراوح بين لا حول و لا قوة الا بالله و ازاى ده يحصل يوم عيد و ربنا يرحمهم

اما ردود الافعال الغاضبة او المتعصبة تلاقيها تملى جواها شحنة سلبية رهيبة من مشاعر كره او حقد او غضب بتدور على منفذ و هدف ليها توجه له الشحنة دى..... عشان كده تلاقى ردود افعال من نوعية ادى قيمتنا فى البلد دى.... او مفيش حد شايف شغله..... ربنا ينتقم منهم..... مصيبة تاخدهم...... الكفرة

خلاصة الامر ان كلنا بشر من نفس الطينة..... لكن يختلف القالب اللى بيحتوى العجينة الطرية دى و يشكلها..... وعلينا جميعا ان نبحث بداخلنا..... عن اى تشوه نفسى و كتلة سلبية من النوعيات السابق ذكرها..... لكن ده يستدعى اولا (الوعى) بأن الواحد عنده مشكلة..... و دى فى حد ذاتها مشكلة