انا ............ وسواق التوكتوك

**المنسي** · 30-07-2013 04:08 PM

اولا قبل ما احكى اى حاجة الموقف بالنسبة لى مش موضوع فلوس اد ماهو اعتراض على الاستغلال

هاحكيلكم الحكاية من اولها انى يوميا وانا نازل الشغل الصبح بكسل اخد العربية علشان اخرج بيها واركنها على الشارع الرئيسى واستنى عربية الشغل فساعات لو لقيت توكتوك بركب معاه واخليه يوصلنى الحتة دى وبادفعله 2 جنيه او ساعات باخرج من الشارع بتاعى مشى مسافة 100 متر والاقى توكتوك واديله 2 جنيه برده وساعات جنيه ونص المهم وانا راجع من الشغل برده نفس السيناريو ومبقدرش امشى الحتة دى فى الشمس مع انها من الشارع الرئيسى لغاية بيتى بالكتير من 8 دقايق ل 10 دقايق مشى النهاردة ركبت التوكتوك وباديله 2 جنيه اللى انا يوميا بدفعهم مش عاجبه وبيقوللى 3 جنيه قلتله انا يوميا بدفع كده وساعات جنيه ونص كمان قاللى انا لسه منزل واحدة قدام شوية وواخدمنها 3 جنيه قلتله انا مليش دعوة انا بركب كل يوم كده قاللى خلاص خد الفلوس مش عايزها قلتله انت هتركبنى ببلاش مش عايزها انت حر فيها ان شا الله حتى ترميها انا مش هادفع اكتر من دول ونقاش وجدال طبعا وفى الاخر قاللى خلاص وانا مش عايزهم قلتله خلاص هاتهم وراح ماشى

دلوقتى مين اللى غلطان مع العلم ان المسافة دى بركبها يوميا
تانى حاجة اعمل ايه فى الفلوس اللى اخدتهامنه حكمها من الناحية الشرعية
ثالثا انا اول مرة فى حياتى اعمل الحركة دى بس هو استفذنى وان مش بتفرق معايا ايه جنيه زيادة وع العلم والله العظيم ساعات بدفع اكتر من كده ومبستناش اخد باقى

**ابو لؤى** · 30-07-2013 04:38 PM

ياباشا دول اشكال مينفعش معاهم غير كده تاخد الفلوس وتقول الحمد لله وهو مش فارقه معاه لانهم نازلين مش علشان يشتغلو لا نازلين علشان يتفسحو ويسمعو اغانى ويعاكسو بنات ويضايقو الخلق ويقرفو الملاكى ويفطرو فى نهار رمضان الصبح ممكن تحط الفلوس دى فى اى جامع وكبر دماغك واسف على الاطاله

**المنسي** · 30-07-2013 04:40 PM

انا فعلا هاحط الفلوس فالجامع بس خايف ان اكون اخدت حاجة مش من حقى

**Land_Cruiser** · 30-07-2013 04:45 PM

الله اعلم ممكن يكون مستغل و ممكن لأ و جايز يكون كلامه سليم بس عامه اللي حصل حصل خلاص. بالنسبه للفلوس ممكن تحطهم في صندوق التبرعات في المسجد او تعطيهم لحد غلبان و اهو كده يبقي صاحبهم اخد بيهم ثواب. بالنسبه لبعد كده حضرتك اتفق مع السائق قبل ما تركب و ده مفيهوش حاجه محرجه و لا عيب علشان الامور تبقي واضحه من الاول و ما تظلمش نفسك و لا غيرك

**المنسي** · 30-07-2013 06:00 PM

المشاركة الأصلية كتبت بواسطة koshary

يووووووووووه حصلت معايا كتير اوى الهضبة وياسلام لو راجع بعد الفجر يقولك ب 10 جنيه واتخانق معاه واعلى صوتى

وتلاقى حد تانى يقولك خلاص تعالى يا أستاذ هوصلك انا علشان كدا لما بركب من الموقف بتفق الاول قبل ماركب انما كدا

كدا من تحت البيت لحد الموقف دى تسعيره معروفة ب 1.5 جنيه ..... كنت الاول باخد العربيه واسيبها فى الموقف لحد ما

فى يوم حصل خناقه وكسرولى المرايه .. مش حضرتك ساكن فى الهضبة بردو

ايوة انا جارك فى الهضبة انا فى البوابة الرابعة وبينى وبين البوابة مفيش 10 دقايق مشى مش حاجة بس اهو الواحد بعد كده هديله الفلوس بس هاقوله مش مسامحك فيهم وهو ساعتها بقى يبقى حر انما انا مش بحب اللى يستغلنى وانا نفسى مكنتش متخيل ان ده يبقى رد فعلى

المشاركة الأصلية كتبت بواسطة land_cruiser

الله اعلم ممكن يكون مستغل و ممكن لأ و جايز يكون كلامه سليم بس عامه اللي حصل حصل خلاص. بالنسبه للفلوس ممكن تحطهم في صندوق التبرعات في المسجد او تعطيهم لحد غلبان و اهو كده يبقي صاحبهم اخد بيهم ثواب. بالنسبه لبعد كده حضرتك اتفق مع السائق قبل ما تركب و ده مفيهوش حاجه محرجه و لا عيب علشان الامور تبقي واضحه من الاول و ما تظلمش نفسك و لا غيرك

حضرتك كلامك مظبوط بس لما تبقى عارفة ان الحاجة دى بقرش ويقولك لا بقرشين يبقى ده استغلال