اتسحبت رخصة العربية مني امبارح

**MomoMedo** · 01-09-2008 04:26 PM

السلام عليكم
كل سنة وانتو طيبين ورمضان كريم

امبارح كنت في المعمورة وماشي في امان الله
ورخصة العربية مكنتش متجددة:smile:

المهم عديت على 3 لجان
اول واحدة موقفونيش
وتاني واحدة رجعت بضهري ولفيت من شارع جانبي
تالت واحدة قولت ادخل بأى وخلاص اشوف ايه اللي هيحصل

المهم انا كنت دافع التأمين و كدة بس المشكلة ان كان والدي مسافر وكل سنة كنا بنجدد لرخصة بالتوكيل السنة دي قالو لازم يكون صاحب العربية موجود المهم دخلت اللجنة

وحكيت للراجل اللي وقفني عالموضوع لقيته بيقولي (( حظ اوفر المرة القادمة))

هو كان لابس ملكي مش لبس ظابط مش عارف دة يبأى ايه
المهم قالي اركن وتعلالي

روحت للظابط بتاع اللجنة لقيت واحد عنده نفس المشكلة

بس الظابط كان زوق جدا في الكلام مش عارف دة طبيعي ولا عشان شاف كلمة عقيد اركان حرب في رخصة والدي

بس المهم انه كان زوق جدا وطريقة كلامه كويسة يعني
اداني وصل وقالي دة تروح تجدد بيه
صاجبي كان جانبي قسأله يعني مفيش غرامه
قاله لا لا تاخد بس الوصل دة وتجدد بيه الرخصة

نيجي بأى لزتونة الموضوع

هو فعلا مفيش غرامة
ولا الراجل دة كان بيشتغلني

**solycar** · 01-09-2008 05:03 PM

سؤال برئ و بعيد عن الموضوع يعنى ايه عقيد اركان حرب

**Hussein_Ramdan** · 01-09-2008 09:55 PM

اركان حرب دة زاى دراسة اضافية بيخوشها ظابط الجيش بعد مايخلص الكلية العسكرية
ودى دراسة وعلى حسب ما سمعت انها مش سهلة وبتكون صعبة
ومش اى حد يخوشها عشان فى اكتر من كشف بيمر علية اكنو داخل كلية عسكرية تانى من ضمنها على حسب ما عرفت الوزن والشكل والطول واللغة الانجليزية
دى بئا ياسيدى لما يخلص اركان حرب بيعدو الظابط انو يكون قائد مثلا
قائد منطقة . ووبيوصل لواء مستريح وممكن ربنا يفتح علية ويسافر ملحق عسكرى يعنى يتفتحلو مجلات كتير جدااا وبيبقا معدى شوية

معلش اصل بحكم شغلى معا العسكرين وخصوصا الجيش طولت عليكو شوية فى الكلام

**MomoMedo** · 02-09-2008 03:34 AM

ايوة هو زي ماقال كدة حسين
بس هو اخد اركان الحرب دي واتنفخ وطلع معاش مبكر عشان طهق من الجيش وسنينه
بس قبليها جاتله فرصة فعلا انه يطلع ملحق عسكري
بس مرضيش عشان والدتي كانت لازم تقلع الحجاب
المهم انا مش عارف كدة في غرامة ولا ايه ؟؟؟؟؟؟؟؟؟؟؟؟

**Tamer-Ezzat** · 02-09-2008 04:04 AM

شوف الوصل فيه ايه ...
يعنى اسم المخالف ونوع المخالفة وما الى ذلك تبقى مخالفة يا حلو وحتدفعها ...
مش مكتوب فيه كدة تبقى مش مخالفة ...

أعتقد أركان حرب دى تساوى الدراسات العليا زى الماجستير فى الكليات المدنية ..