بص يا مصري يا اخويا انا مش هقولك المفروض ومش المفروض
لان ما كان بالامكان اكثر مما كان ... ومشكلتك دي مش بتواجهك وحدك لانها بتحصل في اغلب الاسر المصرية ...
اولاً : اكبر خطئ هو انكم عايشين بجوار اهل زوجتك او في نفس العمارة ... البنات انواع. وفي صنف كده ( عفواً نسميه صنف فرعوني ). اول مايلاقي ليه سند. وظهر تبص تلاقيه يتفرعن كده وينفش ريشو ... انا ليه اختي فرعونة كده صغيرة اول ما تشوفني جيت ازروها ابص الاقيها بتشديني من ايدي وتقلي جيت في وقتك يا ابيه خوش بقه رن جوزي علقه سخنة جوا مسافة ما اعملك كوبية الشاي الاخضر بالنعناع الي بتحبها :) . ... لذلك البنات الي زي كده اول ما تبعد عنها العزوة والسند تبص تلاقيها بتتخذك انتا عزوة وسند ليها وتبدء تجر ناعم معاك ... لذلك روح شقتك حتى لو كانت اصغر او حتى لو كانت في منطقة شعبية وحماك باني في منطقة راقية .
ثانياً: برضو انا مش معاك في حتت حماتك بخيلة وكده ... صوابعك مش زي بعضها ... ومينفعش تقارن اهلك باهلها كل واحد ليه تربيتوا وعاداتوا وتقاليدوا ... انا واحد من الناس باستحرم بصراحة اضيع فلوسي في جتوهات وبسبوسة وطبق حلويات مشكل وانا رايح ازور ناس ... وببقى. رايح وعاصر على مناخيري لمونة وانا باشتري صنية البسبوسة مش بخل واللهي بس طلع عين ( ماي ماذر ) في القرش علشان في النهاية اروح اجيب بيه بسبوسة . :)
ثالثاً : بالنسبة لحتت الحقوق والواجبات وكده .... على مستوى تلميذ تعاله نكده عليه وقلوا حللي الواجب في الكراسة ... هتبص تلاقيه إن إن حل الواجب ومقلكش نسيتو ... هتبص تلاقيه حلو غلط ومشي حالك ... او مشخبط كده اي كلام ويقولك خلصت .
المناخ المناسب اساس اي شيء في الدنيا ياعزيزي ... احنا مثلاً ليه بنقول ان الألمان في ألمنيااا. مبدعين لييه ومتفوقيين ليه .. لان المناخ. عندهم حلو :) فهتلاقي مشكلة بتعمل مشكلة او بيترتب عليها مشكلة وهكذا .
رابعاً : في حاجة ناس كتير ما بتعترفش بيها بس انا يعني اغلب الظن بقول احتمال تكون صحيحة وهيا تصنيف الناس ،ذات نفسها في طبيعيتهم. الي العلماء قسموها لاربع اصناف ( ناري وترابي ومائي. وهوائي ) ... فتصور مثلاً هواء اتمزج مع التراب = هتلاقي الحياة عفار في عفار وزوابع ومش هيرتاحوا مع بعض الا من رحم ربي .
تصور المائي اتجوز الترابي هتلاقي حياتهم كلها طين في طين ومشاكل وربك المستعين ... لذلك بنقول كل حلة وليها غطاهااا ... عاوزك تهدى كده وتاخود وقتك في التفكير وتشوف هل الزوجة مناسبة ليك ولا مش مناسبة ليك هل هتكملوا مع بعض. بقيت عمركم ولا كده هتبقى عيشة تقصر العمر ... اعمل الي عليك وابتدي بانك ترجع لشقتك اولاً بالسياسة وبالحنكة .... ومتفكرش بموضوع نقل ورق العيال من مدرسة لمدرسة وكل الكلام ده يهون مقابل. العيشة الكريمة والهادية وحل المشاكل ... ابعد عن اهل زوجتك دول مصدر قوتها وجبروتها ... وتحياتي وربنا يصلح الحال قادر ياكريم :)
المفضلات