الموضوع: مشكلة عائلية وعايز النصيحة

المشاركة الأصلية كتبت بواسطة friendship7897

أنا والله قلبي وجعني من مشكلتك
ويمكن علشان بسمع من أتجاه واحد وهو أتجاهك فمتعاطفة معاك جداً
وفعلاً زي ما رجالة كتير قالوا لك أنت طيب أوي
وكمان مش حازم خالص
وللأسف وجودك في بيت عائلة زوجتك مضعف شخصيتك أكتر ومقوي شخصية مراتك بعزوتها .
وواضح إن ضعف وقوى الشخصيتين
سبب في تبادل الأدوار والتحكمات
فأصبح الصوت العالي منها
وأصبح الخوف من تشتت البيت منك
وأصبح الخوف من الطلاق منك
وأصبح حتى التحكم في علاقاتكم مع بعض منها
وكل دا كوم ، وطردك من شقتك دي كوم تاااااني
فدا كتير أوي – الله يكون في عونك
فأنا لو نصحتك بعد كل اللي فات هقول لك سبهم يتربوا شوية وإتقل عليهم أوي أوي أوي لاغاية ما هما اللي يجيوا ويصلحوا خطاءهم في طردك وإهانتك في بيتك
ولكن وعلشان :-
1- خراب البيت صعب عليكم وعلى أولادكم .
2- وإنتقالك إلى شقتك ( اللي هي متأجرة دلوقتي ) صعب .
3- نقل عفشك من بيت أهلها ( صعب جداً ) .
يبقى لازم تتنازل شوية ( شوية ) – والتنازل دا لفترة مؤقتة .
وممكن تستغل دخول العيد لأن دي مناسبة كويسة أوي لجمع الشمل مرة تانية ( لكن بحزم )
وممكن تستغل إحتياجات الأولاد للعيد ( بدون ضعف ) – تجيب لهم حاجتهم وتروح على بيت أهلك تاني مترجعش على بيت أهلها .
ولما ترجع أوعى تكون مكسور ( علشان مايكونش موضوع الطرد دا زرار لتحسينك وكسرك من وجهة نظرهم في المرات القادمة )

ودا كله تجبيس ( حل مؤقت ) للموضوع علشان مشكلتك والفجوة ما توسعش منكم بسبب الفرقة وزيادة الجفاء( المرة دي ) .
لكن الصيانة في الإساسات هي الأهم ( الحل الجذري ) – ودا أعتقد أنه لازم يتم عن طريق أربعة خطوات وكل خطوة هتتوقف عليها الخطوة اللي بعدها :-
الخطوة الأولى: هل فراقكم وبعدكم عن بعض الفترة دي أثرت بالإيجاب أو السلب على علاقاتكم ؟ لو بالإيجاب ندخل على
الخطوة الثانية : حاول فتح كل المواضيع زي ما فتحتها معنا كدة بالحب والود بينك وبين زوجتك . لو نجحت المناقشة ندخل على
الخطوة الثالثة : حاول تقنع زوجتك بالإنتقال إلى شقتك بمجرد إنتهاء عقد المستأجر لها .
الخطوة الرابعة : محاولة تغيير وتطوير علاقاتكم للأرقى علشانكم وعلشان أولادكم ، وتقبل بعض العيوب من الطرفين ( لأن الكمال لله وحده )

طيب لو نتائج الخطوات سلبية ( لا قدر الله ) هيكون التغيير في الخطوة الثالثة وهو أصعب الخطوات عليك لأن الخطوة دي هتكون بتاعتك أنت بس بدون مشاركة حد تاني ، وهي تقعد مع نفسك وتقرر إن هل الحياة هتستمر كدة ؟ وفي ظل المشاكل دي ؟ وهتشوف شغلك إزاي في ظل الظروف دي ؟ وهتقوى على دينك وزيادة صلتك بربنا إزاي وأنت مش فاضي غير للمشاكل ؟ ومشاكلكم وخناقكم أمام أولادكم هتكون عادي ، ومش هتأثرت على شخصيتم لما يكبروا ؟ وتفكر كمان بإمكانياتك المادية لو قررت الإنفصال ؟ لأنك بالإنفصال هتكون فاتح بيتين حتى لو ما أتجوزتش - مصروفات بيت أولادك ومصروفاتك بيتك أنت ، وممكن كمان تعمل جدول مميزات إستمرار حياتك معاها من عدمه وتشوف الكفة اللأنهي اللي طابة ، وبعدها تقرر ! .

طمنا عليك إن شاء الله
وربنا يكون في عونك ويقويك

آسفة على الإطالة

شكرا اختى الفاضلة ..
فعلا انا شخصية مسالمة ومش بحب الحوارات والللت والعجن والمشاكل بشهادة كل الناس .
وفعلا انا مش طايق انى ارجع البيت تانى ع الاقل فى الوقت الحالى وهسبهم يتربوا شوية واتقل عليهم .
بس كنت عايز اسالك سؤال وتردى عليه من وجهة نظر المرأة : يا ترى تفكير زوجتى وامها ايه دلوقتى فى رد فعلى على اللى حصل خصوصا انى مشيت من البيت من غير ما اخد هدومى وحاجاتى الشخصية وما طلبتهاش منهم لغاية دلوقتى ؟ وبدات اشترى شوية هدوم تكفينى الفترة دى

ربنا يوفقك الى ما يحبه ويرضاه

المشاركة الأصلية كتبت بواسطة hany121

+11111

كلام سليم 100% ويتوزن بميزان الدهب..

نصحتي لصاحب الموضوع انك لازم تتعامل من منطلق ان الحل وزمام الامور بايدك وما تستناش هم هيعملوا ايه علشان تقرر ردك هيكون إذاي.. بمعني انك تكون فعل وليس رد فعل... بمعني انك تقعد مع نفسك وتفكر هي ممكن ييجي منها وتصلح من نفسها ولا هي كده وهتفضل كده مش هتتغير وده محدش يقدر يعرفه غيرك..

لو ما فيش امل انها تتغير أو حاسس انها كارهاك.. يبقي حل من اثنين

1- ترفض انك تكمل باقي حياتك في نكد وحرقت دم وتطلقها وتبقي عارف انه في خساره تحسبها وتتحملها..

2- تقبل تكمل معاها وفي الحاله ده هتروح تقدم فروض الولاء والطاعه لحماتك قبل مراتك وتنسي حاجه اسمها كرامه ورجوله...

طيب لو في امل انها تتغير وعارف انها بتحبك لكن امها مسيطره عليها ومفهماها ان الرجاله متجيش غير بكده ... يبقي برضوا حل من اتنين

1- تطلقها.. ايوه تطلقها كمحاوله للتقويم وفي الحاله ده هيكون الطلاق بمثابة صفعه علي الوجه تفوقهم وتعرفهم ان كرامتك فوق كل شيء وانهم مش هيقدروا يلووا زراعك لان في نوع من الزوجات لما بتحس ان الزوج بيحبها ومش هيقدر يستغني عنها بتسوق فيها انما لما تحس انه مستبيع بتلم الدور..
وبالتصرف ده
* إما انهم هيبدأوا يوسطوا ناس وتتحل المشكله وترجعها بعد ما تشترط عدم الاقامه في بيت اهلها وساعتها هتكون خدت درس عمرها وهتعيش مرتاح ولكن لازم ما تستغلش ده وتقرفها لكن تعاملها بما يرضي الله وتتقي ربنا فيها
* أو هيجروا علي المحاميين والمحاكم وساعتها تكسر وراهم زير وتستعوض ربنا في اي خساير

2- تحط علي قلبك حجر وتصبر وما تتصلش بيهم خالص مهما طالت المده وتستني انهم هم اللي يبدأوا بالاتصال. بدءوا بالكلام عن صلح اهلا وسهلا بشرط عدم الاقامه في بيت العيله. بدءوا بالكلام في الانفصال يبقي قدر الله وما شاء فعل...

أعذرني لو كان كلامي حاد وأدعوا الله ان يفك كربك ويقدم ما فيه الخير والصلاح...

شكرا اخى العزيز على ردك واحب اقولك ان الاحتمال الثانى هو الاقرب للحقيقة وهو ان فى امل انها تتغير لكن امها مسيطرة عليها ..والحل التانى برضه هو اللى عزمت عليه بعد نصيحة العديد من المقربين ليا خصوصا ان مفيش حد من اخواتها الرجالة حاول يتصل بيا وانا داخل على ثلاثة اسابيع ..انى احط حجر على قلبى واصبر ومس هتصل بيهم واستنى انهم اللى يتصلوا بيا ..واشوف بدأوا بالصلح كان بها ..بدأوا بالانفصال " اللى يبيعك بيعوا " .

المشاركة الأصلية كتبت بواسطة amr011111

ربنا يوفقك الى ما يحبه ويرضاه

اللهم امين

يا رب لك الحمد كما ينبغى لجلال وجهك وعظيم سلطانك