الأول لازم تتأكد من رخصة العربية لآن اليومين دول مفيش حاجة مضمونة فأنا أفضل إنك تروح بنفسك الأول للمرور وتتأكد إن الرخصة سليمة وبعدين
تتوكل على الله وتكتب العقد بعد ما تاخد منه شهادة المخالفات وتتأكد إن رقم الشاسية ورقم الموتور اللى فى الرخصة هما نفس الأرقام اللى على الشاسية والموتور فى العربية لآنهم لو مش مطابقين حتعملك مشكلة كبيرة فيما بعد
وموضوع التوكيل لو البائع وافق عليه دا حيبقى مصلحة كبيرة ليك لآنك حتوفر تمن تسجيل العقد حالياً بس فى بائعين كتير بترفض عمل توكيل وتشترط تسجيل العقد لإتمام البيع لأن وقتها الرخصة بتفضل بإسمه ولو حصل حاجة بالعربية هو أول واحد بيتجاب فيها وكمان لو اشترى عربية تانية بيدفع ضريبة رفاهية حوالى 60 جنيه على إعتبار إن عنده أكتر من عربية . مش مهم الفلوس الأهم هو إنه المسئول الأول عن أى حاجة تحصل بالعربية لحد ما يثبت إنه باع العربية
وخلى الإمضاء على العقد وتسليم الفلوس فى الشهر العقارى اللى حتعمل فيه التوكيل يستلم فلوسه ويمضى على التوكيل وتستلم منه العربية والرخصة وتشيل صورة ضوئية من التوكيل فى تابلوه العربية وتشيل الأصل فى البيت
التوكيل بيكون مكتوب فيه وللوكيل حق البيع سواء لنفسه أو للغير ولا يجوز إلغاء التوكيل إلا بحضور الطرفين اتأكد من وجود الكلمتين دول فى التوكيل وبإذن الله مش حتحتاج للبائع تانى فى أى حاجة ووقتها تقدر تسجل العقد فى أى وقت وتقدر كمان تبيع لغيرك بالتوكيل من غير ما تسجل