اسوا شركة تامين في مصر

**hussien456** · 02-09-2008 02:52 AM

السلام عليكم ورحمه الله وبركاته وكل عام وحضراتكم جميعا بخير بمناسبه شهر رمضان
اكيد حضراتكم عارفين الشركه المقصوده في العنوان انها الجمعيه المصريه للتامين التعاوني
انا قرات هنا في هذا المنتدي ومنتديات اخري مآسي كثيره لعملاء كثيرين تورطوا مع هذه الشركه سيئه السمعه ربما مثلي عن جهل او قله خبره او اغراهم سعر الوثيقه المنخفض مقارنة ببقيه الشركات وهو ده الفخ!!!!!! سعر مغري ولكن في المقابل لما تحتاجهم في حاجه ربنا يديلك الصبر وطوله العمر لحد ماتصرف التعويض اللي هما يقدروه بمزاجهم
وعلشان اكون منصف ومش بفتري عليهم خصوصا اننا في رمضان انا هكتب لحضراتكم تجربتي الشخصيه
اشتريت جن2 2008 اوتوماتك من معرض في الغردقه بالتقسيط مع بنك والمعرض امن علي العربيه في الجمعيه
عملت حادثه بالعربيه وانا مسافر بيها من الغردقه الي القاهره لعمل صيانه 1000كم
عملت محضر في قسم راس غارب المكان اللي حصلت فيه الحادثه وبلغت الاستاذ حسام مدير الفرع بتاع الجمعيه في الغردقه وهو ده اللي عملي الوثيقه وشلت العربيه بالونش الي عز العرب التوكيل في القاهره
الخبير بتاعهم قال انها هلاك كلي والتعويض اللي قدره 70 الف جنيه
العربيه يا حضرات ب90الف مشيت 800كم فقط ومكملتش شهر من تاريخ الشراء والترخيص
كلمت حسام قال ان ده راي الخبير وهو اللي يقدر مبلغ التعويض وبعد كده بطل يرد علي التليفون
قلت اسافر انا لمقر الشركه في العباسيه هناك بقي كل موظف يرميك لموظف تاني ويرد بقرف وبرود
ناس معرفه بعتوني لناس هناك في الشركه وعدوني ان المبلغ هيذيد عن كده بس مجرد وعود اخدت تليفوناتهم واتصلت بيهم بعد كده ماحدش بيرد ودي اكتر حاجه مجنناني في الشركه الزباله دي يعني مطلوب من واحد زيي ساكن في الغردقه كل ما يحب يسال عن حاجه يسافر 1000كم رايح جي ويضيع يومين وقت 300جنيه علي الاقل ويسيب شغله
عشان موظف معندوش ضمير مستخسر يرد علي التليفون ويطمن الناس
اخر حاجه الاستاذ ممدوح حاطط تليفونه في المنتدي وبيعرض خدماته علي الناس كلها وبيوعد بحل اي مشكله اتصلت بيه وعرفت انه موظف في الجمعيه فرحت جدا وحكيت له الحكايه قال لي هشوف حصل ايه وارد عليك 00000000000000000000
ماردش!!!! لا اتصل ولا رد علي لما اتصلت
العربيه دلوقتي بقالها شهرين بالتمام في التوكيل وكل يوم هناك ب20 جنيه انا خايف بعد عمر طويل التعويض اللي هصرفه ادفعه لعز العرب جراج للعربيه!!!
حسبنا الله ونعم الوكيل

**WalidAdel** · 02-09-2008 03:10 AM

الله يكون في عون حضرتك و يصبرك علي مابلاك
فعلا الجمعيه ناس كثيره بتشتكي منها و هناك قله قليله يقولون انهم ناس كويسه تقريباً حظوظ و حمدلله علي سلامة حضرتك

**amrtalaat** · 02-09-2008 01:41 PM

بص من الأخر......الهيئة المصرية للرقابة على التأمين ...دى اللى ماسكة وبتراقب كل الشركات بتاعة التأمين فى مصر.....
وقراراتها ملزمة تماما ليهم ...وإنت بتلجألها لما بيحصل نزاع بينك وبين أى شركة للتأمين فى مصر...
ودة كلام مدير عام فى أحد شركات التأمين فى مصر ..وكان حكالى على مواقف كتيرة مشابهة وكانت التعويضات فيها بالملاييييين!

**amrtalaat** · 02-09-2008 01:43 PM

كيفية تقديم شكوى للهيئة المصرية للرقابة على التأمين :

توجيه الشكوى الى الهيئة المصرية للرقابة على التأمين وإرسالها بأحد الطرق التالية:

1. بالبريد على عنوان الهيئة التالي:

الهيئة المصرية للرقابة على التأمين

28 شارع طلعت حرب – القاهرة, الدور الثاني .

الإدارة العامة لخدمة حملة الوثائق.

2. بالتلغراف على العنوان التالي: إنشوركونتر

3. بالفاكس رقم 25758645

4. بالاتصال تليفونيا برقم 19053.

5. بالبريد الالكتروني : comp.complain@eisa.gov.eg (إذا كانت الشكوى خاصة بإحدى شركات التأمين)

fund.complain@eisa.gov.eg ( إذا كانت الشكوى خاصة بأحد الصناديق الخاصة )

6. . تقديم شكوى من خلال الموقع On Line Complaint

7. بالمقابلة الشخصية بالحضور للهيئة ومقابلة المسئولين بالإدارة العامة لخدمة حملة الوثائق و إطلاعهم على كافة المستندات اللازمة.

هذا مع ضرورة ان تتضمن الشكوى البيانات التالية:
1. إسم شركة التامين المشكو فى حقها

2. فرع أو نوع التامين المشكو بشأنه

3. رقم وثيقة التامين ومدتها .

4. نبذة عن موضوع الخلاف محل الشكوى.

5. المطلوب تحديدا من الشكوى.

6. بيانات مقدم الشكوى ( الاسم, العنوان , رقم التليفون, البريد الالكتروني ).

**hussien456** · 02-09-2008 10:13 PM

شكرا جزيلا للاخوه الاعذاء اللي اهتموا وردوا
بالنسبه للشكوي ينفع دلوقتي ولا بعد الشركه ماتعمل اجراءاتها ولجنتها وتاخد قرار نهائي
ياريت اللي عنده معلومات او خبره سابقه يقولي وشكرا جزيلا

**ALIHUSSIEN** · 02-09-2008 10:36 PM

السلام عليكم - كل عام وحضراتكم بخير --- انا وقعت مع شركة تامين زيكم بالضبط
اسمها اليانز مصر
= رينا ينتقم منهم نصبوا عليا واكلوا التامين عليا الله ينتقم منهم
انا امنت عندهم على الحياة بمبلغ معين
دفعت لغاية 20000جنيه وكان عندي فرصة اصفي
ولما جيت اصفي رفضوا بحجة موظفهم ما حصلش قسطين ؟؟ طب وانا مالي يا ولاد النصابة ... قالو امش مشكلتنا مشكلتك
حاولت اخد اي مبلغ ما امكنش ابدا ابدا
ربنا ينتقم منهم
نصابين اليانز مصر مبنى ساريدار الدقي ربنا يحرقهم بجاز
بحق هذا الشهر الفضيل
اميييييييييييييييييين

**amir** · 02-09-2008 10:37 PM

ياه يا حسين
انت متعرفنيش بس انا كنت قاعد مع احمد صيام لما انت عملت الحادثه دي و فعلا حزنت ليك جامد ربنا يصبرك و بجدلازم يكون ليك وقفه جامده مع شويه الموظفين ماركه فوت علينا بكره دول

**AhmedGen2** · 02-09-2008 10:55 PM

بس غريبة جدا ، نتيجة التصويت عن أفضل شركة تأمين كانت لصالح كونتكت كارز بفارق 5 أصوات فقط عن الجمعية ، ودة شىء يحسب لصالح الجمعية !!!

http://www.nilemotors.net/Nile/poll....lts&pollid=313