انا اتخنقت ! مش عارف اشتري عربية !
السلام عليكم ورحمة الله وبركاته ،
رجالة اسكودا الاعزاء .. كل سنة وانتوا طيبين
انا بقالى فترة بدور على عربية a4 تكون نضيفة وفبريقة وبسعر غير مبالغ فيه
كان قدامى عربية الاخ العزيز mezo73 وطبعا دى كانت هتبقى بالنسبة لى لقطة بمعنى الكلمة بس عشان النصيب كلمته بعد ما كانت اتباعت فعلا ..
والصراحة الراجل زوق جدا جدا جدا الى ابعد درجة لدرجة انه كان محرج منى في التليفون وكان بيتأسفلى وهو ما عملش اي حاجة اصلا ! انا اللى كلمته متأخر ، ربنا يكرمه يارب ويكتر من امثاله ..
المهم اول امبارح شفت اعلان على كونتاكت عربية 2008 مانيوال فابريقة بالكامل بدون خدش لون سماوى 60 الف كيلو صيانة كاملة في التوكيل وتم تغيير الكاوتش والسعر 85 نهائى !َ
انا طبعا قلت اشطة جدا كلمت الراجل واتأكدت ان المواصفات كما في الاعلان ، قاللى انه ساكن في مدينتى وعشان المشوار بعيد ااعمل حسابك ان السعر نهائى قلتله ماشى مفيش مشاكل ، واتفقنا نشوفها بعد الفطار امبارح ، وحاولت اخليها بالنهار قاللى لا مش هبقى فاضى ، قلت مش مشكلة ، انا ساعتها كنت واثق انى اول واحد يكلمه لانى شفت الاعلان بعد 15 دقيقة بس من ساعة ما حطه ، والاهم انه ما قالليش ان في حد هيشوفها قبلى ...
المهم انا مكنش هينفع اخد عربية والدي مشوار طويل اوى زي ده وخصوصا انى في اخر الاسبوع يعنى روحت المنوفية والمشوار هيبقى طويل جدا
فقلت ااجر عربية وزي ما تيجى وخدت اخويا معايا وروحنا .. ( عربية النترا 2011 بـ 250 جنيه 24 ساعة + 90 جنيه بنزين ، ومن غير ما نمضى على حاجة عشان عن طريق واحد صاحبنا وصاحب محل التأجير ، والحمد لله انى رجعت بيتنا سليم عشان الدركسيون بتاع الالنترا باور كهربة وكان بايظ واللمبة بتنور والتحكم في العربية كان صعب جدا)
المهم عدينا على سوق السيارات قبل الجمعة ، ولكم ان تتخيلوا الحال المزري اللى وصلله سوق السيارات وسيطرة التجار الـ........ (اللهم انى صائم)
تلاقى عربية 2004 فابريقة برة وجوة بس شكلها متهان شوية وبيقوللك 86
و بعد شوية عربية 2002 بتاعت ظابط ( مستوردة ) وبيقولك 86 برضه والعربية 2002 ومش الجامدة ولا حاجة يعنى!
طبعا انا قلت خليهم يتسلوا ومشيت ، وروحنا صلينا الجمعة وروحنا على الشقة اللى في الجيزة قلنا نريح شوية ..
المهم قلت اتصل بالراجل ،اتصلت ما بيردش ، قلت مش مشكلة تلاقيه نايم ولا حاجة
نزلت على العصر كدة وعلى ما صلينا ،واتحركنا ، وصلنا مدينتى على الساعة 5 ، انا قلت اخلينى قريب منه وافطر هناك وابقى اروحله بعد الفطار ..
اتصل بيه اخيرا رد ، ايوة بقى انت فين في مدينتى بالظبط في المجموعة كام ؟
يرد بكل برود يقوللى العربية اتباعت النهاردة بعد الصلاة ، واحد صاحبى شافها وخلص فيها
طيب واللى مكلمك امبارح ده ! وخابط مشوار 350 كيلو رايح جاي مخصوص ده !
قاللى انا مش فاكر قلتلك ولا ولا ! وبعدين انت ماكلمتنيش قبل ما تتحرك !
قلتله انا روحت السوق بالمرة وعامل حسابى من امبارح بالليل انى كدة كدة نازل لانى بالفعل حجزت العربية
قااللى ببرود اكتر : ااه طب الحمد لله انك كنت كدة كدة نازل السوق !!!!!!!!
طبعا انا دمى اتحرق والحمد لله انى كنت صايم والا كان هيسمع ما لذ وطاب
انا لقيت الساعة 5 ، قلت حسبى الله ونعم الوكيل ، ولفيت بسرعة ، قلت اهو نروح نلحق الفطار في البيت احسن
خدت طريق السويس كله على 120-140 ولولا ظروف العربية كنت زودت عن كدة لان الطريق مغري جدا بصراحة وفاضى ، وبعدها دائري وزراعى والحمد لله وصلنا البيت الساعة 7 بالظبط ، وضاع يوم اجازتى ومجهود وفلوس على الفاضى ..
انا مستنى تعليقكم ، الناس دى ايه ! ، وايه الاستهتار بالناس ده !
للاسف انا مكنتش مدي اي خوانة في الاول هو كان بيتكلم كويس في التليفون ، و من صوته كان (شكله) ابن ناس اوى ومهندس وكدة .. وساكن في مدينتى وبيعمل الصيانة في التوكيل ... كل دى حاجات خليتنى مطمن .... للاسف :(
الحمد لله انا هديت خالص بعدها لسببين ، ان ربنا مش كاتبلى العربية دى وده اكيد فيه الخير ، وثانيا ان انسان زي ده ، ما يستاهلش يتحرق دمى بسببه ..
وحاجة كمان مهمة استفدتها من المشوار ، انى عمرى ما هشتري هيونداى او كوري عموما ..
اسف انى طولت عليكم ، بس كانت تجربة وحبيت انقلها للناس