و عليكم السلام و كل سنه و حضرتك طيب
لو حضرتك رايح من المعادي يبقي تطلع علي شارع اللاسلكي و منه لشارع النصر فالاتوستراد ثم الطريق الدائري و منه لطريق القاهره السويس و هتمشي فيه حوالي 85 كيلو فيه و بعدين هتلاقي u turn تلف منه و ده هيدخلك نفق الشهيد احمد حمدي بعد كده هتطلع منه تدخل يمين في طريق رأس سدر و هتكمل فيه هتلاقي طريق الطور رأس سدر و برضه تكمل فيه و هتدخل شمال علي طريق الطور سانت كاترين ثم طريق شرم الشيخ الطور و بعد كده تلاقي مدخل شرم الشيخ . طبعا ده وصف باختصار بس الطريق حضرتك هتلاقي عليه يفط كتير علشان ما يتوهش و هو ان شاء الله بسيط و ان كان طبعا طويل .
بالنسبه لطول المسافه هي مبدأيا هتبقي معديه ال ٥٠٠ كم يعني ممكن نقول كمتوسط ٥٥٠ كم مثلا و زمن الرحله اكيد يتوقف علي سرعه قياده حضرتك و هتقف ترتاح قد ايه بس خلينا نقول برضه في المتوسط من ٦ ال ٧ ساعات .
بالنسبه لتوقيت السفر يستحسن لو ينفع حضرتك تطلع بدري شويه عن كده يعني علي ٦.٣٠ مثلا او حتي ٦ صباحا و ده علشان تقلل المشي في الحر علي قد ما تقدر و حتي لو وصلت بدري شويه مش مشكله بس علي الاقل تقعد في الفندق في الظل.
بالنسبه للنصائح طبعا تراجع علي ضغط الهواء في الاطارات و مستوي السوائل في السياره اللي هي الزيت و المياه و لو في اي صيانه او تغيير زيت تغيره قبل ما تسافر و ان حضرتك تفول العربيه من بنزينه كويسه و قريبه لطريق السويس زي مثلا إمارات مصر اللي قبل كارفور او شل اللي علي الدائري و فوّل العربيه لحد الزور لان الطريق طويل و بعد كده البنزينات هتبقي قليله و كمان مش مضمونه جوده البنزين بتاعها لان كتير منهم بيعتمدوا علي انك هتمون مضطر و ممكن تبقي تقف تريح في بنزينه مش مشكله و تفول تاني مثلا لما التانك يوصل للنصف علشان تبقي في الامان و حاول ما تفضلش مشغل التكييف علي طول علشان الحمل علي الموتور و كمان استهلاك البنزين و علشان كده قلت لحضرتك تسافر بدري .
طبعا لازم تبقي متابع الأخبار علشان تتأكد ان النفق مفتوح مش قافلينه و تراجع علي الاستبن و تخللي معاك شنطه عده صغيره و كشاف طوارئ و يبقي معاك منفاخ للعجل اللي بيتوصل علي البطاريه ده و طبعا يبقي عينك علي الطريق و علي العربيات اللي حواليك و يستحسن لو لقيت عائله مسافره هناك برضه تمشوا ورا بعض كنوع من الامان و الموبيل يبقي مشحون و فيه رصيد و لما توصل هناك تحط تكمل تفويل العربيه لان البنزين هناك احيانا بيبقي قليل و عليه زحمه فباستمرار حاول انك تبقي مغطي النقطه دي و توصل بالسلامه ان شاء الله و رحله سعيده
المفضلات