ما شاء الله الموضوع هنا مجمع كل المفاهيم الخاطئة عن زيوت المحركات!!!!!
طيب.. استعنا عالشقا بالله..
أول مفهوم خاطئ .. الزيت الكويس يمشي مع كل العربيات. ..
ﻻ يا إخواني... الزيت الكويس هو اللي له مواصفات زي المواصفات اللي مكتوبة في كتالوج العربية اللي نازل معاها.. ﻹن اللي صنع الموتور هو أدرى واحد بموتوره.
واللي يمشي معاك مش لازم يمشي مع غيرك.
المفهوم التاني.. موبيل وحش.. حط شيل.. ﻻ ﻻ ﻻ .. ليكوي مولي .. !!!!
ﻻ بردو... الشركات بتعمل أنواع كتير من الزيوت.. فيه منها اللي مستواه عالي وفيه منها اللي مستواه منخفض .. وكلهم ليهم مواصفات متعارف عليها..
ولو جيت تقارن زيوت الشركات اللي ليها نفس المواصفات .. مش هتلاقي فرق يذكر ما بينهم..
خد من الماركة اللي تحبها الزيت اللي تمشي مواصفاته مع كتالوج عربيتك.. إذا ما كانش أحسن منها.
تالت مفهوم خاطئ... الزيت ده 10000.. والزيت ده 5000.. والزيت ده 3000..
ميعاد تغيير الزيت بيتحدد من كتالوج العربية .. بناء على طريقة استخدامك للعربية... مش بناء على نوع الزيت..
رابع مفهوم خاطئ... "عربيتي ماشية 65000.. أحط زيت إيه؟؟"... "وأنا عربيتي ماشية 146 ألف.. أحط زيت إيه؟؟"
الكيلومترات اللي ماشياها العربية مش هي المقياس في اختيار الزيت ولا في اختيار اللزوجة... إنما تاريخ العربية وحالتها الميكانيكية وطريقة استخدامها هي الحكم.. وده كله أساسا ما ينفعش من غير ما ترجع لمواصفات الزيوت المذكورة في الكتالوج.
المفهوم الخامس... "أعرف واحد جرب الزيت ده وكويس معاه قوي"... "وأنا أعرف واحد تاني جرب الزيت ده وكان سيء جدا معاه".
اختيار الزيت عمره ما كان بالتجربة.. إلا إذا كنت مستغني عن الموتور بتاع عربيتك.. وبتحط نفسك في مجازفة عشوائية.. يا صابت يا خابت.
راجع المفاهيم الأربعة الخطأ اللي اتكلمنا عليهم قبل كده.. وانت تعرف الصح إيه..
عايز تختار الزيت الصح؟؟؟
أنصحك تاخد فكرة من الموضوع ده...
http://www.nilemotors.net/Nile/341680-a.html
علشان تتعلم و ماحدش يشتغلك...
...
المفضلات