يا جماعه انا محتار وعايز اشتري عربيه من الاتنين 301 هاي لاين وسعرها 136 الف والشارك فول اوبشن مانيوال عامله 140الف ؟؟؟
عرض للطباعة
يا جماعه انا محتار وعايز اشتري عربيه من الاتنين 301 هاي لاين وسعرها 136 الف والشارك فول اوبشن مانيوال عامله 140الف ؟؟؟
هل يوجد فى الميتسوبيشى فرامل abs أو إيرباج؟
هي كمقارنة عربية بعربية الشارك تبهدل البيجو بصراحة... بس بلاش الفاضية... هتبقى مملة جدا ومفيهاش اي اوبشنز...
انا شايف تزود شوية وتجيب الشارك الفئة قبل الاخيرة... اعتقد ب150 ألف تقريبا...
مفيش مقارنة يا باشا دى فئة و دى فئة
الشارك تكتسح فى كل حاجة
مش لدرجة البهدلة يا باشا.. و بعدين لو العربية مافيهاش 2 إيرباج و ABS على الأقل و فاضية كده يبقى البيجو تكسب . الفئة اللى حضرتك بتقول عليها تمنها 158000 جنية يعنى أكثر من البيجو ب 22000 جنيه .
العربيتين فى فئتين مختلفتين بس إذا كانت الميزانية فى حدود مبلغ ال 140000 جنيه و المتسوبيشى مافيهاش عوامل الأمان إللى ذكرتها يبقى البيجو تكسب أما لو هاتجيب الفئة الأتوماتيك القبل الأخيرة إللى فيها ABS ,EBD و ال2 إيرباج يبقى أرشحلك المتسوبيشى.
الأسعار اللى موجودة على كونتاكت كارز مش مظبوطة.
سعر سيارة ميتسوبيشى لانسر EX 2013
- ميتسوبيشى لانسر EX 2013 اوتوماتيك GLX
140.000 جنيه مصرى - ميتسوبيشى لانسر EX 2013 اوتوماتيك GLX Alloy Wheel
142.500 جنيه مصرى
- ميتسوبيشى لانسر EX 2013 اوتوماتيك GLX Fog Lamp
146.000 جنيه مصرى
- ميتسوبيشى لانسر EX 2013 اوتوماتيك GLS 6 Speakers
152.000 جنيه مصرى
- ميتسوبيشى لانسر EX 2013 اوتوماتيك GLS ABS + EBD + BAS
158.000 جنيه مصرى
- ميتسوبيشى لانسر EX 2013 اوتوماتيك GLS Sunroof + Spoiler
163.000 جنيه مصرى
الشارك بصفه عامه افضل فى كل شىء ... خصوصا عند اعاده البيع ...
ال 301 لسه جديده على السوق المصرى و غير معلوم استمراريتها مثل كثير من الموديلات ...
تحياتى ...
انا شوفت فى كونتاكت كارز لقيت 4 فئات من الميتسوبيشى شارك موديل 2013
http://i.imgur.com/8nbW3ic.png
وحسب الموقع يامهاجر باشا مواصفات الفئة الثانية الفول أوبشن مانيوال اللى بسعر 139.900 جنيه وهى بتحتوى على ABS و EBD و 2 إيرباج
http://i.imgur.com/2E5dTBY.png
ولو الفرق فى السعر بين العربيتين 4000 ده مش يعتبر فرق لأنك عشان تستلم فورى البيجو 301 بتدفع أوفر برايس بيوصل ل 6000 دلوقتى .. ايه رأيكم ياشباب ولا كونتاكت كارز معلوماته مش صحيحة .. أرجو الافادة والتوضيح ؟؟
شكرا ياجماعة لكل اللى رد عليا بس يبقى عامل واحد هو اللى بيحدد نتيجة المقارنة دى هو السعر وأنا بصراحة ميزانيتى حد أقصى 150 ألف ومستقر ومستريح نوعا ما الى البيجو 301 ومش حاطط فى دماغى موضوع اعادة البيع أوى عشان انا معنديش نية أبيع قبل 5 سنين عالأقل أما توكيل العربية وخدمة العملاء وأسعار قطع الغيار ده اللى يهمنى بشكل أكبر بس بردوا ميكونش على حساب جودة الخامات والتقفيل وثبات العربية والا كنت روحت أشترى النيوصنى 2013 وسعرها سوبر صالون 120 ألف وبتتميز بقوة التوكيل وخدمة العملاء بس خامات فقيرة وتقفيل مصرى أكيد مش زى الأوروبى أو اليابانى .. أرجو الإفادة ياشباب خصوصا لو فعلا ان الشارك بالمواصفات دى فى رينج 140 ألف يبقى فى اعتقادى تكون أقوى كتير
الشارك تكسب طبعا
لا هوه مش ده بس الفرق... فيه كمان الفئة الاعلى فيها ابانوس وتبطين الابواب الامامية بالجلد... فرش العربية بيج مش رمادي... عدد السماعات اكبر (6 سماعات)... واعتقد هيكون الراديو سي دي شاشة باللمس... ومقابض الابواب نيكل من الداخل...
عموما انا لسة سائل النهادة على الهايلاين قالولي ب170000 فأعتقد كل الفئات زادت حوالي 3000 جنيه...
في حاجة كمان... ياريت تكلم دايموند وتتأكد من المواصفات والاسعار لان اللي مذكور هنا وعلى كونتاكت واضح انه مش صح...
د
انا ما قصدتش خالص ان البيجو تعبانة... وبعرين انا نصحت صاحب الموضوع ميجيبش شارك فاضية لان عدم وجود عوامل امان هيقلل منها طبعا...
بس صدقني والله الفرق على الطريق كبير لصالح الشارك...
بالنسبة للاسعار اللي فوق دي كانت اسعار وفئات 2012 قبل التخفيض اللي كانوا عملوه... انما 2013 فئات مختلفة (اول فئة مانيوال) واسعار مختلفة (الهايلاين 170000)... انا بس نفسي الراجل يجيب الحاجة الاعلى حتى لو هيضطر يزود حاجة بسيطة... ومتنساش ان الشارك حمارة شغل وبتاعت بهدلة ومتجربة من 2008 ومحدش قال انها (خسعت) معاه... بالعكس... قطع غيارها معمرة جدا وفي حد هنا كان قال ان البطارية بتاعته عدت الخمس سنين مثلا...
انما البيجو لسة برضه جديدة ومش عارفين ايه الدنيا معاها كمتانة وغيره... خصوصا انها بتنزل للاسواق اللي زينا بس... مش حاجة يعني زي ال308 كده...
وفي الاخر انا اركب ال301 احسن من اي حاجة كوري برضه... بس عربية زي الشارك اتقل بصراحة...
تمام أنا ان شاء الله هسأل فى دايموند على فئات الشارك والفروق بين الفئات وأسعارها وهرجعلكو هنا تانى عشان أحسم الاختيار النهائى بس زى ما قولت قبل كده انا بقارن بين البيجو 301 هاى لاين سعرها 136 ألف والشارك الفئة الثانية اللى تمنها 146 تقريبا عشان هى دى الامكانيات المتاحة معايا دلوقتى ولو معايا أكتر من كده كنت هعمل موضوع أقارن فيه بين الشارك والكورولا مثلا لأنى عارف ان الشارك أعلى من ال 301 لو بنقارن بين أعلى فئات انما حيرتى الكبيرة دى عشان بقارن بين عربيتين الفرق بينهم 10.000 جنيه على أقصى تقدير ..
صباح الفل ياشباب
أنا لسة قافل مع مبيعات دايموند ودى المعلومات اللى طلعت بيها من المكالمة ..
الشارك موديل 2013 يوجد منها 4 فئات
الفئة الأولى أوتوماتيك بيزلاين وسعرها 137.500 جنيه ومفيهاش من وسائل الأمان الا ايرباج واحد
الفئة الثانية وسعرها 147.000 جنيه وتفرق عن الأولى ان فيها جنوط سبور و2 ايرباج و abs و ebd
الفئة الثالثة وسعرها 153.000 وتفرق عن الفئة الثانية ان فيها مساند رأس ومسند يد وتكييف تاتش و أوكر نيكل وشبكة نيكل وفوجات وأبانوس
الفئة الرابعة وسعرها 170.000 جنيه وتفرق عن الفئة الثالثة فتحة سقف وسبويلر وكاسيت تاتش والمفتاح بصمة ومالتى فنكشن والطارة والفتيس جلد
من فضلكوا ياخبراء المنتدى أنا محتاج أعرف رأى نهائى لأنى محتار جداً وعايز أدخل فى المقارنة عربية تانية هى الفلوانس 2013 الفئة الثانية أوتو وسعرها 155.000 وكده أبقى جبت آخر ومش هزود على كده ان شاء الله فالمقارنة دلوقتى هتكون بين
بيجو 301 موديل 2014هاى لاين 136.000 جنيه
الشارك الفئة الثالثة 2013 وسعرها 153.000 جنية
الفلوانس 2013 الفئة الثانية أوتو وسعرها 155.000 جنيه
طبعاً البيجو 301 هتكون أقل واحدة فيهم بحكم السعر بس فيها كل الأوبشنز وأسعار قطع الغيار بتاعتها متوسطة وصالونها واسع جدا (بالمناسبة أنا عايز عربية عائلية), بس مشكلتها الوحيدة انها لسة متجربتش فى السوق والتوكيل الجديد بتاعها لسة مش معروف بعكس ميتسوبيشى ورينو الاتنين متجربين والتوكيلات بتاعتهم معروفة .. اللى أنا عايز أعرفة هل الفرق فى الأداء والفخامة يستاهل الفرق فى السعر والتضحية ببعض الأوبشنز اللى موجودة فى البيجو 301 .. ولو فى عربية تانية فى رينج 150.000 جنيه وشايفين انها هتكون أفضل من ال 3 دول ياريت لو تذكروها لأنى بصراحة مش ناوى أغير العربية قبل 7 سنين مثلا عشان كده انا مهتم اوى وبسأل كتير عشان أستريح بعد كده ... معلش بقا طولت عليكو ومستنى ردودكم بفارغ الصبر ..
فلوانس افضل اختيار عربية عائلية توكيل افضل وقطع غيار ارخص من الشارك
خلاص كده يبقى شارك... طالما فيها وسائل امان وشوية حاجات معقولة زي الفوجات والابانوس والنيكل وجنوط يبقى زي الفل...
وبعدين حتة ان العربية بإذن الله هتقعد معاك 7 سنين يبقى الشارك بدون تفكير... العربية مفيش واحد بس شفته اتكلم على مشكلة فيها من يوم ما بدأت في 2008...
وبعدين بصراحة... اعتمادية ميتسوبيشي اعلى من البيجو والرينو...
وكعربية قصاد عربية... الشارك افضل من الفلوانس وافضل بفرق ملحوظ من ال301... توكل على الله وخلص فيها...
الشارك