لتفادى إى مشكلة فى تغير زيت الفتيس
السلام عليكم
قررت اعرض تجربتى فى المشكلة اللى حصلت معى بعد تغير زيت الفتيس ليستفاد الجميع من التجربة
اشتريت c4 2007 اوتوماتيك فقلت اعمل بعض الصيانة كتغير سيور وزيوت وفلاتر ، المهم الفتيس كان شغال كويس
بدون إى مشاكل لكن بعد تغير الزيت بدأت المشكلة وهى ان لما العربية تسخن ( بعد حوالى ساعة من المشى) يبدأ الفتيس ينتش عند النقل من الأول للثانى واحيانا يهبد جامد كأن حد خبطك من ورا فحاولت أدور عن السبب فعرفت من القراءة فى هذا المنتدى العظيم موضوع مهم جداً وهو بعد وضع الزيت الجديد لابد من تدوير الموتور لمدة خمس دقائق حتى تسخن العربية ثم نفتح الطبة الحديد اللى تحت مش البلاستيك بتاعة القياس وذلك أثناء دوران الموتور فبعد فتح الطبة سينزل الزيت الزائد ( حوالي نصف لتر أو أكثر قليلا ) ونترك الطبة مفتوحة حتى يتوقف الزيت عن النزول ثم نقفل ونبطل الموتور
فرحت لميكانيكى تانى وقولتله على الموضوع سألني عن نوع الزيت قولتله الأحمر اللى ب٨٠ جنيه التر فقال المشكلة فى نوع الزيت لانه مش أصلى وطلب ٤ لتر زيت أصلى فأشتريته ب١٢٥ جنيه للتر بس لما نزل الزيت القديم قال العربية مفهاش غير ٢ لتر أو اقل لدرجة أنى شكيت فى الميكانيكى الاول انه محطش ال ٤ لتر كلهم
بس بعد كدة اكتشفت الحقيقة كانت ان الزيت لم ينزل كله معرفش ازاى بالضبط فأصبح فى الفتيس ٤ لتر جداد غير القديم اللى لسة جوة وحتى لما طلبت منه يفتح الطبة لنزول الفايز(الزيادة) قالى لا مفيش حاجة كدة وثق فى خبرتى مش ما قرأت فى النت
بعد ما مشيت من عنده والعربية سخنت الهبد بين الأول والثاني اصبح أكثر من الأول
فقلت أروح التوكيل فبعد الكشف المهندس قال عندك زيت زيادة وأنا نزلته
بس بعد ما مشيت لقيت نفس الموضوع مفيش تحسن، فقلت يمكن المشكلة تكون بسبب وجود نوعين زيت مختلفين مع بعض فقررت أغير الزيت كله فرحت التوكيل تانى علشان عندهم مكنة تقدر تسحب الزيت كله وفعلا سحب كله ووضع زيت جديد أصلى فسألت المهندس عن موضوع فتح طبة الفايز لتنزيل الزيادة قال كله تمام
لكن المفاجئة المحبطة بعد ما مشيت من التوكيل لاقيت المشكلة زى ما هى
فقررت اعمل موضوع الفايز بنفسى وفعلا ركنت ودورت المتور ونمت تحت العربية فتحت الطبة نزلت حوالي ثلثين لتر فى اقل من دقيقتين ولما خلصت نزول زيت قفلت الطبة تانى وبطلت الموتور
وبعد التجربة لأول مرة من لف ودوخة أسبوعين رجع الفتيس تانى وبطلت نخع وهبد وكله تمام الحمد الله
أسف على الإطالة بس حبيت أحكى التجربة كاملة علشان مش عايز يتكرر تانى مع إى حد
تحياتي للجميع