الموضوع: مشروع قانون ديفندرات لكل سيارة ... ايه رأيكم ؟؟

بسم الله الرحمن الرحيم
السلام عليكم و رحمة الله و بركاته

كل سنة و انتم طيبين

زي ما العنوان بيقول مشروع قانون ديفندرات لكل العربية بدل انه لازم يكون فيه تصريح لتركيبه لأ يبقي قانون لتركيبه
للاسف شوارعنا أصبحت جحيم في السواقة و كل مدي الأمر بيسوء
بالاضافة للحرية اللي اتفهمت غلط و كله ماشي فاتح صدره ع الخناقة فالناس اغلبها ماشيين بنظريات و قواعد من اختراعهم مثل البوز بيز او اضرب فرامل فجأة يخاف اللي وراك او الزق في اللي قدامك تعدي اسرع ده بالنسبة للملاكي اما للميكروباصات و التاكسيات فحدث و لا حرج اول ما يشوف راكب يفرمل و مش مهم باقي الخلق ده غير استخدامهم لمجموعة معقدة و متشابكة من النظريات و القواعد لحد ما حازوا ع لقب بلطجية الاسفلت بجدارة و هو اللقب الذي اطلقته عليهم و اللي زاد و غطا التكاتك اللي ما شاء الله بقت بتشد معاك في الطرق السريعة و مركب ديفل و بيحط بنزين 92 و عايش حياته قريب هنلاقيهم مركبين تربو تشارجر و اللي يحصلني يكسرني

المهم نظرا لأن اغلب الحوادث من الامام او الخلف و انا ما شاء الله العربية عندي دلوقتي ضاعت قدام و ورا و رفارف و ابواب حتي خراطيم الريداتير ضربت و اتفلقت نصين انهاردة اظاهر مستحملتش القلش اللي في الشارع
و بسبب الحوادث ديه بتحصل خناقات قد تصل لمجازر ده غير احيانا دم الواحد اللي بيتحرق ع عربية جديدة لسه جايبها و يلاقها وشها راح او شنطتها راحت

ففكرت ليه ميتعملش قانون يخلي كل عربية ملاكي فقط تركب ديفندر امامي و خلفي و التأكد من وجوده وقت الفحص و يكون بمواصفات معينة مش واحد يروح يعملي وش قفص و يقولك ديفندر
و خاصة للعربيات الهاتش باك لأن نسبة الامان في العربيات الهاتش باك بيكون اقل من السيدان بسبب الحجم
و بكده اي خبطة هتاخدها الديفندرات و الديفندرات تخبط مع بعض
و بالتالي العربية هتفضل سليمة لأكبر وقت ممكن و احتمال تقل الخناقات بسبب الموضوع ده ديفندر في ديفندر مش هيحصل حاجة

ايه رأيكم فيه امل و لا أمل انتحرت و عمر انتحر وراها ؟؟