المشاركة الأصلية كتبت بواسطة الجنرال
انا معايا كيا ريو هاتشباك مانيوال وكيل
العربية كويسة وانا عموما بحب المانيوال .. والمانيوال بتاعها خفيف (الدبرياج والنقلات)
لكن بصراحة انا عايز ابيعها لكذا سبب:
1- بيع المانيوال فى مصر صعب جدا .. بقالي فترة عارضها للبيع وكل اللى بيتصل ويعرف انها مانيوال بيرفض
2- الشنطة بتاعت الهاتشباك صغيرة قوي .. يعنى بتاخد عربية البيبي وشكرا على كده
3- واهم سبب بالنسبة لي هو العفشة .. وده فى الكيا عموما (كل عربيات كيا عفشتها ناشفة) وان كنت انا حاسسها زيادة شوية فى الريو عن السيراتو
4- استهلاك البنزين مش قادر افهمه الصراحة .. احيانا بيبقى قليل قوي جوه القاهرة (حوالي 6.5 الى 7 ليتر .. واحيانا بيوصل لـ 9 ليتر لكل 100 كيلو) ومش عارف هل ده عيب فى العربية ولا ايه
5- تانك البنزين صغير نسبيا والمؤشر بتاع البنزين مساحتة كبيرة .. وده بيدي احساس ان مؤشر البنزين بيجري جري علشان يخلص وتحس ان البنزين بيتاكل اكل فى العربية
6- اخر عيب فى المانيوال تحديدا ... انها مش بتنزل باي كماليات .. يعنى مفيش اي اوبشن من اللى موجود فى الاوتوماتيك .. انا بالنسبة لي الاوبشنز دي كلها ملهاش لازمة لكن يعنى في حاجات بتبقى حلوة لو موجودة لكن عدم وجودها بالنسبة لي مش مؤثر قوي
ربنا يوفقك للي فيه الخير