الموضوع: وجهة نظر في الشروط الواجب توافرها في السائق و السيارة و اختبارات القيادة

بسم الله الرحمن الرحيم
السلام عليكم و رحمة الله و بركاته


كل سنة و انتم طيبين

بعد المهازل اللي بشوفها اللي بيطلعوا رخصة قيادة و هم ميعرفوش حاجة عن السواقة و لا ركبوا عربية و بنتبلي بيهم في الشوارع
او الاختبارات العملية البسيطة اللي شخصيا لا اعتبرها كافية كاختبار لاستخراج رخصة قيادة
او الناس اللي مش عارفين يستخدموا شنطة الاسعافات او حتي الطفاية في احدي المرات عربية ع الطريق ولعت واحد نازل بيجري بالطفايه معانا و يُشكر علي ده لكن المصيبة انه كان بيرش و خلاص و الادهي عكس اتجاه الرياح ضيع طفاية ع الفاضي بسبب جهله باستخدامها و طفيناها بالرمل اللي ع جنب الطريق
اختصارا للكلام
فوجهة نظري ان يتوافر بعض الشروط في السائق طالب الرخصة و في العربية كمان بالاضافة للاختبارات

اولا : بالنسبة طالب الرخصة

بجانب طبعا اتقان القيادة
- الاسعافات الأولية و يفضل ياخد دورة الاسعافات الأولية من الهلال الاحمر المصري و مقره عند حديقة الطفل و يقدم الشهادة
- كيفية الاطفاء و التعامل مع الحرائق و ديه دورة تانية في الدفاع المدني و مقرها في الحي السادس جنب مقر شركة رامو تقريبا اللي جنب قسم تاني م.نصر و يقدم الشهادة برده
- علم بالمبادئ في العربيات الاعطال و تشخيصها تقريبيا و كيفية التعامل و ممكن تتعمل زي دورة تعليمية يكون فيها شرح لميكانيكا العربية و الاعطال الشائعة في الطريق و الزيوت و الصيانات و الكلام ده كله لأن ناس كتيير كل علمها بالعربية بنزين و زيت و امشي يا ريس و برده ليها شهادة و تتقدم

ثانيا : بالنسبة للعربية

بجانب
- الطفاية
- المثلث العاكس

يتوافر الآتي :

- شنطة اسعافات أولية محترمة مش اللي ملهاش تلاتين لازمة دي و متسعفش غير جروح سطحية
الناس هتقولي مهو ممكن ميعرفش يستخدمها اولا قولنا لازم يكون اخد الدورة يعني هيعرف افترضنا مبيعرفش اكيد فيه غيره مبيعرفش افترضنا مفيش حد فيهم عارف فيه كتيب ارشادات جوة الشنطة للاسعافات الأولية

و اعتقد اللي مناسبة هي المواصفات اللي اقرتها وزارة الصحة في البداية و بعدين رجعت لغتها لأنها هتكون الي حدا ما مكلفة و المواصفات حسب ما قريتها في بداية تطبيق موضوع حقيبة الاسعافات الأولية هي :

3 أربطة شاش عرض 10 سم

3 أربطة ضاغطة عرض 10 سم
5 باكت شاش معقم للجروح

5 باكتات "دريسنج" معقم

5 باكتات شاش فازلين للحروق

5 باكتات شاش معقم للعين

100 جرام قطن طبي
2 بكرة شريط لاصق "بلاستر طبي 5سم"

مقص صغير


زجاجة سائل مطهر "بيتادين"
5 أطقم قفاز طبية "لاتكس"
2 رباط مثلث "لكسور عظمة العضد والترقوة"
1 ملاية حروق
2 أكياس ثلج منشط عن طريق الفرك
وبطارية إضاءة حجم متوسط

و ممكن نضيف اكتر حسب كل شخص و علمه و مهارته

- وجود كبل قطر لقطر العربية في حالة انها اتعطلت

- كابل بطارية و ده عشان لو البطارية فصلت

- منفاخ كاوتش يشتغل ع الولاعة اي ان كان نوعه المهم يكون شغال عشان محدش يعطل و يقف في الشارع و خاصة لو مش هيقدر او مش عارف يغير الاستبن


لازم يتوافر في العربية كل الادوات ديه و يتراجع عليها في الفحص
و في جميع الحالات كتيير مننا شايلين الادوات ديه في العربية
فلو بقت رسمي هيكون أفضل لأنها هتساهم بشكل كبيير
يا خوفي بس تطبق برده لكن نلاقي الناس مجبتهاش و يدخلوا الفحص و تعدي :(

ثالثا : الاختبارات النظرية و العملية

بجانب الاختبار النظري الخاصة بعلامات المرور

- اختبار نظري للاسعافات الأولية

- اختبار نظري لكيفية اطفاء الحرائق

- اختبار نظري عن كيفية استخدام باقي الادوات في السيارة في حالة تعطل العربية او عربية شخص اخر سواء كبل القطر او كبل البطارية او المنفاخ

- اختبار علمي يكون قريب من البيئة المحيطة الشوارع يعني تمشي و يكون فيه عوائق و تفاديها
- اختبار للقيادة في الطرق الزلقة يعني مية او رملة و اظاهر مدي تحكم القائد
- اختبار للركن بأكثر من وضع سواء موازي للرصيف او عمودي سواء امامي او خلفي
و يكون ركنة كمان بين نموذجين كرتون او كاوتش كأنهم عربيتين عشان لو حد خبط ميحصلش خسارة و يكون مسموح له محاولتين او تلاتة في المرة الواحدة عشان يركن

و كل اللي معاهم رخص حاليا يتعاد اختبارهم تاني

بس الناس تحضر الاختبارات فعلا مش يطلعوا الرخصة بدون ما يروحوا
و لو عليا عايز اصعبها اكتر مش عشان الناس مطلعش رخص لكن عشان ناس تكون فاهمة فعلا هي اللي تسوق

و اخيرا انا عارف ان مفيش حاجة من ديه ممكن تتطبق او صعب انها تتطبق
و حتي لو اطبقت بسبب الجهل اللي عندنا الناس اول شئ هيتبادر في ذهنهم انها سبوبة او طبعا اللي هيحاول يلجأ لكل الطرق عشان ميدخلش الاختبار

بس اهو الواحد بيفضفض شوية