العربية بتنتش فوق ال80

السلام عليكم, انا عضو جديد هنا و حبيت استفيد من خبراتكو.

انا عتدي فيات 127 نصر .. و اما ببقى ماشي مثلا على طريق سريع جوا البلد. فبلاقي اول ما اعدي ال80 ان العربية تنتش جامد , بروح دايس دبرياج و مكمل تاني بسرعة 85 , مفيش ثانيتين و الاقيها بتنتش, فالموضوع دا منرفزني , اول ما نتشت جامد, روحت دايس دبرياج و دست بنزين على الاخر راحت العربية مع النتشة مبطلة, وقفت على جمب ادورها , دارت في المرة التالتة تقريبا....

سألت ناس كتير في الموضوع دا واحد قلى البوجيهات, و واحد قلي فيلتر بنزين.. و واحد تاني قلى نضف فيلتر البنزين

و مبقتش عارف, اجيب فلتر جديد ولا بوجيهات ولا اعمل ايه ساعدووني :10_1_104v[1]:

و شكرا

you need tuning

غير فلتر بنزين وهواء ومش هيخسروك حاجه بالمره تبقى عملت طقم نضافه
وبص على البوجيهات معرقين زيت او مهببين
ونضف الكربراتير عند متخصص وهينضفلك البوابه التانيه بالذات لان غالبآ المشكلة منها او فى بيكات السرعه فيها وساخه

وكمان لو الموضوع جديد يبقى جرب تحط بنزين من بنزينه تانيه الاول

طب تدفع كام وأحللك مشكلتك ديه وقتي؟؟؟؟؟؟؟؟؟
ههههههههههههههه بوص يانجم من خلال خبرة طويلة في أل27 أحب أأكد لسيادتك أنها سكة بنزين
طب وبعدين؟؟؟ كسبنا أحنا كدا يعني صلاة النبي؟؟ طب ماسيادتك شاكك م الأول أنها سكة بنزين بس مش عارف بالظبط العيب فين....
هاقولك يامعلم أبدأها الأول بتغيير الفلتر ومراجعة الخراطيم وحط مليون خط تحت مراجعة الخراطيم ديه عشان سعات كتير الخراطيم بيبقي شكلها سليم ومابتسربش والعملية فل الفل بس فيه واحد منهم أبن حلال منسل في الخباثة وقوامه ضعف ومع السحب العالي والقرص ع الماتور بيتشفط ويمنع التغذية عن طرنبة البنزين فالعربية تقطع منك!!!
طبعا أنت بتسأل نفسك دلوئتي أيه اللي بيقوله أبن العبيطة ده؟؟؟ بس صدقني والله حصلت معايا قبل كدا في عربية 128 وبعد مادفعت ميات ورا ميات وغيرت بوبينات وفلترات مع كوليهات وطبعا سلوك بوجيهات طلعت في الأخر حتة خرطوم مالهاش أم عزا رابطة بين ماسورة البنزين النحاس وفونية دخول البنزين للطرنبة!!!

وعلي فكرة نفس القصة ديه حصلت مع واحد صاحبي من شهرين معاه 127 بس هوا بأه كان عنده كل الخراطيم سليمة وفضلت ماشيله ورا العيب وعملتله تنك بنزين خارجي عباره عن جركن بنزين حطيتهوله أدام الكرسي اليمين جوا العربية وطلعت منه خرطوم طويل عديته من ورا التابلوه ومنه ع الحتة بتاعت مروحة التكييف ومررته بين الريش بتاعتها لحد ماوصلته لطرنبة البنزين وركبته مكان خرطوم التغذية اللي جايلها من الماسورة....والعربية مشيت معاه زي الفل 4 أيام وأول مارجعتله كل حاجة زي مكانت ظهر العيب من تاني...وطبعا كدا أحنا حصرنا العيب في تنك البنزين وراح حله علي طول وزي ماتوقعنا طلعت الشبكة السلك النحاس اللي في أخر ماسورة عوامة التنك مصدية ومتلعبكة ب60ألف نيلة قام الميكانيكي شايلهاله خالص وأستعوضنا ده بفلتر زيادة ركبناه قبل طرنبة البنزين بالأضافة للفلتر اللي كان راكب أصلا قبل الكاربيراتير