انا تعبت و اعتزلت البحث عن الميجان خلااااااااااص

الاخوة المحترمين بقسم الرينو ... انا جبت أخرى و تعبت خلاص من البحث عن ميجان محترمة
التجار يحطوا اسعار غريبة و لما تروح تلاقى العربية شوربة ما تنفعش غير عشة فراخ
ولما تلاقى حالة شكلها نضيف و توافق على السعر العالى تروح التوكيل تكتشف ان العربية برضه فاشلة ( التوكيل بقى عارفنى و اول سؤال انت خلصت فى العربية ولا لسه ..لو لسه ارجع فى البيعة احسن )
ملاك السيارة ينزل اعلان العربية بكذا وحالتها ممتازة و تروح تبص على العربية تلاقيها موديل غير اللى معلن عنه و العربية حالتها سيئة ( يقوللى العربية 2006 الاقيها 2005 و اللى يقوللى 2007 توب لاين القيها أول 2006 و حالتها تعبانة )

و اللى مسند و ملصم العربية لحد الزبون ما يشرب البيعة و خلاص

غير الكلام الكتير و اللف و الدوران و الحوارات و الكذب و الاشتغالات و...و...و...

من الاخر انا تعبت و حتى لو الميجان احسن عربية انا خلاص يأست انى الاقى حاجة محترمة 2006 -2007 و يكون سعرها مناسب مش اشتغالة يعنى

هوة اللى عايز عربية محترمة يتبهدل فى البلد البهدلة دى انا حاسس انى من كتر الحوارات بقيت اشك فى العربيات اللى مصر كلها
مافيش امانة فى البيع اللى يقدر يلبس الزبون فى عربية يلبسه و يجرى
انا زهقت و خلاص مش عايز عربيات يا زيرو يابلاش و ربنا يقدرنا و نجمع ثمن الزيرو

وشكرا للناس المحترمة اللى حاولوا يساعدونى فى عملية الشراء الفاشلة لمعشوقتى الميجان

والله انا بعد ما بيعت الميجان اللى معايا عشان عملت بيها حادثة فضلت ادور على ميجان كويسة حوالى شهرين او اكتر و شوفت فيهم عدد كبير من العربيات، رغم انى كنت picky اوى فى اختيار الاعلان اللى بكلم صاحبة، و اخر ما زهقت قمت لامم اللى معايا كلة و عملت علية جمعية و جبت 301 زيرو و ريحت نفسى

سوق المستعمل فى الميجان ينطبق علية، كلهم و لا مؤخذة شمال، 98% من الاعلانات نصب و عربيات متبهدلة و متهانة و تشوفها او تجربها، تكرة نفسك، المشكلة ان زى ما حضرتك قلت كلة ملصم العربية على ما يلبس الزبون و يخلع و مش اى حد بيعرف يلقط الكلام دة الا لو كشف فى التوكيل او كان معاة ميجان قبل كدة و عارف يدور فيها على اية

ليه كده بس و البستاج طلعت مقلب ولا ايه يا عم ايمن اتقل تاخد حاجه نضيفه

و الله انا تعبت و زهقت و من كتر العربيات و الناس اللى تتصل بيا او العكس و اروح اشوف العربيات و لاقى العملية حوار و نصباية و سبوبة من واحد للتانى وعايزين يطلعوا عمولتهم فابيرفعوا السعر
حتى الميجان البوستيج مش عايز التوكيل و اى مكان تانى اوك و طلعوا اتنين تجار وعايزين طبعا عمولتهم من العربية فابيرفعوا السعر و خنقونى زى ماكون خلاص هاموت و طلع فى الروح لو ماخدتش العربية

صحيح الميجان معششة فى دماغى بس مش كده كل العربيات ملعوب فيها لعب سئ و مضروبة ضرب مبرح ... سدوا نفسى الله يسد نفسهم

لدرجة و الله فى واحد محترم كان رد عليا فى عربية مترخصة 2007 بس هية اخر 2006 و عامل شغلها كله توكيل و اتكلم معايا كتير و شرح اللى عمله فى العربية كله وطالب فيها 78ألف جنيه ..

ومن كتر مازهقت من اللى شفته و طبعا السعر العالى (بالنسبة لى) ممكن اتصل بيه و اعتذرله عن الموضوع كله

أى حد لف المشاوير اللى انا عملتها كان كره نفسه و العربيات و اللى اخترعها

و الاكتر من كده الناس اللى اشترت الزيرو برضه بيشتكوا من عيوب فى عربياتهم !!!

طيب نعمل ايه اللى عايز يجيب عربية فى البلد يعمل ايه ؟!!!

انا برضو كنت عايز ميجان زمان وحصل معايا نفس اللي حصلك ...... كل ماروح الاقي عربيات ضاربها السلك وسيئه جدا والسعر عالي جدا

بس بصراحه الزيرو حاجه تانيه والفلونس جميله جدا وبالاخص الشكل الجديده حكايه من امكانيات وشكل وسعر
توكل علي الله وخد زيرووووووووووو ولو كانت اي عربيه

نصيحة مدام حضرتك دقيق اوى كدا مش هتلاقى لسه ميجان 2006 2007 بحالتها هات جديد و ريح نفسك

أنا عربيتى ٢٠٠٦ مع مثبت سرعة... ٧٢ ألف كم فقط .....صيانة توكيل و غير رشه و لا يوجد بها أى مشكلة ميكانيكية أو كهربائية و معروفة بالاسم فى توكيل إسكندرية......معاها ملف كامل بكل صيانة أو ضمان تم فيها حتى تاريخه بالفواتير

أنا يمكن استلم فلوانس جديدة أن شاء الله على شهر ٩ أو ١٠.....

لو الأمور ان شاء الله مشيت تمام معى و حضرتك كنت لسه متوفقتش حتى هذا الوقت .....انا هعرض العربية بتاعتى للبيع لأعلى سعر.......أن شاء الله تكون من نصيبك

معلش اصبر و هتلاقي ان شاء الله
انا قعدت ادور ييجي 6 شهور و لما اشتريت اتنازلت عن الفئة و جبتها اول فئة

الأخوة وحوش الميجان ..

عيب أوى لحد دلوقتى مالاقيش ميجان محترمة و انتم موجودين !!

من الاخر أخوكم أصبح مدمن ميجان 2006 - 2007 توب لاين من ساعة ما شفتها و شوفت الكتالوج و الاوبشن و التابلوه و الفرش البيج و العربية مش عايزة تطلع من دماغى

كنت رايح النهاردة عند أباظة اشوف النيسان صنى و اشترى زيرو و خلاص معرفش ايه اللى رجعنى تانى و قولت ماتيأسشى ربنا يكرم بالعربية قريب و تلاقى الحالة اللى ماتزعلكش و تعوض صبرك ...

ممكن ناس تضحك على الكلام ده و تقول يا عم عربية زى اى عربية انت مكبر الامور حبتين
بس فعلا مافيش عربية علقت معايا زى الميجان مع انها كانت بعيدة عن دماغى خالص و كنت رايح للنيسان او اللانسر .. بس نقول ايه النصيب

و ارجع أقولكم انتم السبب فى اللى انا فيه بسبب المواضيع اللى قريتها منكم عنها .. يللا للناس فيما يعشقون م..... ميجان ... ههههههههههههه

و الله انتم جروب زى العسل و ناس محترمة جدا و أول ما ربنا يكرمنى بالميجان اللى تفرح قلبى بحالتها ليكم عندى حفلة فى اى كافيه او مكان انتم تحددوه

ادعولى ... زى ماكون بذاكر علشان امتحان الثانوية

هههههههههههههههههههههه ... بس يا عم ايمن انا هدورلك عليها و ليا عزومه عند قدوره ايه رايك
و ياريت تقولي ايه اللي حصل مع البستاج و ربنا يكرم بحاجه حلوه

اقتباس:

---

المشاركة الأصلية كتبت بواسطة dedo_ryo

هههههههههههههههههههههه ... بس يا عم ايمن انا هدورلك عليها و ليا عزومه عند قدوره ايه رايك
و ياريت تقولي ايه اللي حصل مع البستاج و ربنا يكرم بحاجه حلوه

---

و الله وانا عند قولك بس هية تيجى
بالنسبة للميجان البوستاج التاجر حدد ميعاد علشان التوكيل و انتظرت يتصل تانى يوم ما اتكلمش فا اتصلت بيه قاللى اصل العربية كانت فى 6 اكتوبر و راجعة باليل ؟!!!!
فا أجلنا الميعاد لليوم التالى و تم التأكيد بالليل ... و انتظرته ما إتصلش .. بصراحة انا من النوع العندى شوية و ما احبش احس انى مرمى على حاجة كده و طالما كان فيه اتفاق و تأكيد على انه هايتصل بيا علشان نروح التوكيل و ما إتصلش بالتالى ماكلمتوش تانى و ماعنديش اى فكرة
و حتى لو اتصل فى اى وقت تانى خلاص العربية بالنسبة لى .. علشان التعامل بيكون بالكلمة و الامانة مش تحت أمره يعنى و اللى خلقها خلق غيرها ... بس ياسيدى دى الحكاية .

و حاليا بدور على التوب لاين ...

فى حاجة تانية شوفت اعلان على رينو سينيك 2008 شكلها زى الميجان بس الفتيس مكانه غريب شوية ما اعرفش حاجة عنها بصراحة لأنى مركز فى الميجان .

و الله انا عايز اشكر الاستاذ أحمد عبد القادر لأتصاله بيا شخصيا و عرضه المساعدة عند معاينة السيارة

ألف شكر استاذ أحمد و أول ما استقر على سيارة أكيد هاكلم حضرتك

انا حاولت اكلمك تانى بعد الخط ما اتقطع لكن تليفونك كان غير متاح !!

انا لسه بايع الميجان بتاعتي 2006 كامله فتحة سقف حالتها كويسه جدا ب 62000 جنيه قبل العيد وبعد ما بعت اكتشفت ان اسعار العربيات المستعمل عاليه فا ندمت اني بعت الميجان ودلوقتي عايز ارجع اشتري ميجان 2008 او 2009 كامله شكلي كده ها انضم لك في رحلة العذاب (أنا اللي جبت ده كله لنفسي !!!)ز

فعلا و الله هية عذاب ..ربنا يكرمنا بإتنين ميجان محترمين

ممكن نعمل رابطة لراغبى شراء الميجان ... و نعتصم امام التوكيل هههههههه

طيب ماتدور علي فلوانس مستعمله ؟؟!!

سعرها عالى بالنسبة لى حاليا .... و لو هاوصل لسعرها يبقى أجيب حاجة زيرو .. ولا إيه ؟!!

اقتباس:

---

المشاركة الأصلية كتبت بواسطة أيمن كور

و الله انا عايز اشكر الاستاذ أحمد عبد القادر لأتصاله بيا شخصيا و عرضه المساعدة عند معاينة السيارة

ألف شكر استاذ أحمد و أول ما استقر على سيارة أكيد هاكلم حضرتك

انا حاولت اكلمك تانى بعد الخط ما اتقطع لكن تليفونك كان غير متاح !!

---

أستاذ ايمن
كما يقال لا شكر على واجب ، وأتمنى ربنا يرزقك بالميجان اللى تتمناها .
لو تسمع عن ورشة ميكانيكا للرينو فى الحرفين بأسم حمدي بيرو ، ممكن يساعدك لان ديما عنده فكرة من زباينه عن الميجان المعروضة للبيع من أصحابها مباشرآ ، يعنى حاجة بيتى بعيد عن التجار
وممكن أيضاً عند سامح الهواري فى شارع ٤٥ ... الاثنين دول تقريبآ يتعامل معاهم اغلب ملاك الميجان فى الاسكندرية
لو عايز أرقام التليفون ،. كلمنى فى إى وقت

ربنا يخليك أستاذ أحمد ... أنا فكرت فى كده برضه بس مع احترامى للاتنين حضرتك عارف ان الموضوع ده بيبقى فيه مجاملات للبايع على حساب المشترى
و ربنا يكرم و الله انا مش هاين على اجيب عربية و السلام ... حضرتك عارف الميجان معلقة معايا جامد ههههههه
و ربنا يسهل ممكن الاقى حاجة فى التوكيل لأنى كلمتهم و قالولى تابع معانا و ربنا يسهل

و شكرا مرة تانية لذوق حضرتك