الموضوع: مشاكل الجيلى ايمجراند

تعليق على موضوع العيوب.....مش معنى أن سعر العربية ٨٥٠٠٠ ألف جنيه أن العربية تكون شربه و مليانه مشاكل.....سعر العربية رخيص لانها مكونات صيني متجمعة فى مصر مش لانها حتة خردة على قد فلوس الزبون
العربية الصيني رخيصة عامة لانها بتستخدم تكنولوجيا محركات و تروس قديمة من شركات كبيرة عالمية زى تويوتا و ميتسوبيشى....فبتكون سعر المكونات دى رخيص مقارنة بالتكنولوجيا الحديثة الموجودة حاليا اللى بيضاف عليها سعر البحث و التطوير....

العيوب دى نتيجة سوء تجميع من مصانع غبور مع و هو الأهم عدم الاهتمام بالجودة من المورد المصرى ( البطاريات، الكاسيت، الشكمان، .....) و مسؤلية مهندسو غبور فى عدم اختبار المكونات المستلمة من الموردين الصيني و المصرى و عمل اختبارات جوده لكل مكون و اختبارات تحمل و اختبارات عمر افتراضي زى ما أى مصنع محترم فى العالم لازم لازم يعمل بالإضافة لعدم متابعة عملية التجميع و خصوصا فى البداية من شركة عالمية محترمة زى خبراء من تويوتا أو ميتسوبيشى أو كده فى اول كام شهر لتدريب المهندسين المصريين على تجميع هذه السيارة فى مصر...مش الأسبوعين اللى سافروهم الصين أتفرجوا على خط تجميع السيارة و رجعوا و كده يبقى تمام......

طبعا بعد المنتج النهاءى ما يطلع لازم أخد كام عربية من اول إنتاج و اعملهم اختبارات شاقة و كمان أدى طقم المهندسين المسؤولين عن التجميع عينات للتجربة الفعلية و التقييم على الطرق المصرية فى مختلف الظروف و بعد كله ده انزل العربية السوق للمستهلك و اعد حاطط رجل على رجل و سمعتى زى الفل.....مش معنى كده أن مفيش مشاكل هتظهر و لكن مش هتكون ضخمة و لا متكررة زى الموجود دلوقتى.....

اللى بقوله ده مش انشا و لا أحلام و لا كلام كتب....ده ألف به تصنيع لأى شركة محترمة عايزه تحافظ على اسمها و بتحترم عميلها.....

انا لما بشترى صيني و نتيجة لرخص السعر عن الأوروبي ببقى عارف أن اعتمادية القطع اقل بكتير من الأوروبي .....دى حاجة معروفة و متفق عليها لكن اللى بيحصل ده عيوب صناعة ١٠٠٪ و عيوب تجميع و مكونات و منتج تام لم يختبر لكى ينزل السوق فى اسرع وقت ويحقق اعلى مكسب بغض النظر عن الجودة.

للأسف غبور بيستخدم المستهلك كحقل تجارب لسيارته.....منتهى الاستخفاف بصراحة و لن تتقدم مصر فى الصناعة طول ما هذه الثقافة و هذا الاستخفاف سائد.

قلبى مع كل اللى اشترى هذه السيارة و عنده مشاكل فيها.