الموضوع: مشكلة شخصية رجاءاً المشاركة

مبدئيا احييك علي بر والدتك اولا وعلي حكمتك في التصرف ثانيا...

انا في بعض الحالات كنت بنصح بالطلاق لكن في موضوعك ده انا مش مع اللي بينصحك بالطلاق وكمان مش مع اللي بيقول عادي وكل الستات بتعمل كده لأن المفروض الست تحاول تحسن لحماتها بالذات لما تكون مسنه ارضاء لزوجها طالما انه بيحبها وبيراعي ربنا فيها انما تدعي عليها وكمان علي جوزها يبقي لازم اما تتطلق او تتربي اذا كان ممكن ييجي منها وانا شايف في حالتك ده انها تتأدب وتتربي لحد ما تعرف ان الله حق وانها باللي عملته ده كانت هتقعد جنب أمها وتحمل لقب مطلقه وتبقي تخلي صحابها اللي بتتريق عليكم معاهم ينفعوها...

انت قلت انكم اتخانقتم كتير قبل كده بسبب الموضوع ده وان اهلها كانوا بيتدخلوا ويصالحوكم وده معناه حاجتين

اولا

ان اهلها محترمين ومتفهمين ان بنتهم غلطانه وده حاجه كويسه لان في اهل والعياذ بالله بيبقي ربنا عامي بصرهم وبصيرتهم وبيبقوا دائما مع بنتهم سواء غلطانه او مش غلطانه

ثانيا

انها ما بتتعلمش من اخطائها وانها محتاجه تتقرص قرصه محترمه تصوم وتصلي بعديها وتبقي بمثابة الفرصه الاخيره بالنسبالها اللي لو ما اتعلمتش منها يبقي تطلقها بدون تردد...

انا من رأيي انك لازم تحافظ علي علاقتك الطيبه مع اهل مراتك وماتخسرهمش.. انما تتصرف ازاي فانا اقترح الاتي...

ما تحاولش تتصل بيهم خالص وهم اكيد بعد فتره هيكلموك ويطلبوا يقابلوك ...اقعد معاهم وابدأ انت بالكلام وقولهم انه تفهمهم وعدم تحيزهم ليها لما بتكون غلطانه هو اللي كان مصبرك علي تصرفاتها وانه لولا هم كان البيت اتهد من اول مشكله لكن لمل توصل انها تخرج اسرار البيت وتدعي علي انا وامي ان ربنا ياخدنا يبقي الموضوع انتهي وتقولهم انك ما تقدرش تعيش مع واحده بتتمنالك الموت وانك عايز تفض الارتباط ده بشكل ودي وكل واحد يروح لحاله... اعتقد بنسبه كبيره انهم هيحاولوا يصلحوا الامور وانها تعتذر لك وساعتها ما تشدش في العريض قوي لكن ما تديهمش قرار في نفس القعده ولو اتزنقت وكان لازم تديهم قرار ساعتها قولهم انك موافق علي رجوعها بس خليها اسبوعين تلاته لحد ما اهدي شويه ...

لو ما عندكش صبر ممكن انت اللي تتصل بابوها وتقوله انك عايز تقعد معاه علشان تفضوا الارتباط ده وتشوف طلباتهم ايه علشان ذي ما دخلتم بالمعروف تخرجوا بالمعروف ويكون مضمون الكلام نفس اللي مكان هيتقال في حالة اتصالهم هم بيك ...

اوعي تقول لوالدتك علي اللي مراتك قالته لانها مش هتصفي لها مهما حصل والامور هتتأزم اكتر ...

ربنا يصلح الحال ويقدم ما فيه الخير والصلاح...