هل ال 127 عربيه اعتماديه؟؟

انا اخ جديد ليكم فى قسم الفيات لانى كان معايا هيونداى وبعتها لظروف
وانا مقبل على شراء 127 وانا معرفش عنها اى حاجه فقلت اسألكم عنها وانا ميال ليها اكتر من ال 128 بصراحة
انا ميزانيتى 12 الف ومشاويرى يوميا 45 كيلو جوه القاهره ومعظمها زحام واشارات وكله بكون لوحدى فى العربيه
بسافر مرتين فى السنه اسكندريه فقط
يهمنى فى العربيه قلة الاعطال ورخص قطع الغيار جدا وانها تقبل بنزين 80 وده انا لقيته فى ال 127
بس انا معرفش تفاصيل كافيه عنها او ابص على ايه وانا بجيبها..انا كده كده معايا واحد شاطر جدا فى العربيات بس انا عايز اكون عارف انا هبص على ايه واخد بالى من ايه فيها وانا سايقها وبجربها لانى هنزل اخر الاسبوع ابص على واحده
انا خدت بالى ان عجلها من ورا مقوس فهل ده عادى؟؟
ورقم الكارتيره بيكون فى الحوض ولا القايم؟؟
وهل فعلا معظم ال 127 بيكون راشش من جوه؟؟وهل ده يعيبها اوى؟؟
وهل فعلا اغلى حاجه فيها الفتيس والكبوت؟؟
وهل ماتورها صوته عالى فعلا؟؟
وهل تستحمل الجرى لمده ساعتين مثلا فى السفر على سرعة 100 من غير راحة؟؟
وهل بتسخن ولا لا؟؟
وياترى كبوتها بيتفتح بسهولة ويتسرق منها البطاريه زى ال 128 ولا ده فى ال 128 فقط؟؟
لو فيه اى معلومات عنها ياريت حد يقولى عليها وجزاكم الله خير
وشكرا ليكم

ال27 وقت تصنيعها كانت قنبله وكانت سابقه وقتها وعصرها
انا باتكلم خصيصا عن الموديل الاشهر منها
سوبر فيورا
اوعي تشتري غير كده
طبعا يعيبها تاكل كارتيرات المساعدين لعيب في تصميها يساعد علي سرعه انتشار البارمه
لكن حلها بيكون في تركيب كارتيرات بلاستيك
قعدت معايا سنه
عربيه رائعه وسريعه الاستجابه افضل من ال 28
لكن الشيء الاهم انك تشتري عربيه ماسكه نفسها وماتكونش خلصانه
ويفضل يكون معاك سمكري نضيف واهم حاجه امين

شخصيا انا شايفها غير عمليه تماما ركبتها سنتين وبتصرف مصروف كبير

اقتباس:

---

ال27 وقت تصنيعها كانت قنبله وكانت سابقه وقتها وعصرها
انا باتكلم خصيصا عن الموديل الاشهر منها
سوبر فيورا
اوعي تشتري غير كده
طبعا يعيبها تاكل كارتيرات المساعدين لعيب في تصميها يساعد علي سرعه انتشار البارمه
لكن حلها بيكون في تركيب كارتيرات بلاستيك
قعدت معايا سنه
عربيه رائعه وسريعه الاستجابه افضل من ال 28
لكن الشيء الاهم انك تشتري عربيه ماسكه نفسها وماتكونش خلصانه
ويفضل يكون معاك سمكري نضيف واهم حاجه امين

---

شكرا للرد
يس ال 12 الف دول ميجيبوش غير 127 نصر انما السوبر فيورا من اول 16 لحد 18
وهى النصر دى تعبانه اوى كده ولا ايه؟؟

اقتباس:

---

شخصيا انا شايفها غير عمليه تماما ركبتها سنتين وبتصرف مصروف كبير

---

هل الكلام ده لان العربيه اللى كانت معاك كان فيها عيوب؟؟
ولا كل ال 127 كده؟؟

ابعد عنها وعن تجربه شخصيه ورحله بحث دامت شهرين على سوبر فيورا
وكانت فابريكه جوا وزى الفل كرهت نفسى
وكان وشها فقر
وبعتها بخساره

اعتماديه جدا جدا جدا وقليله الأعطال وعمرها ماعطلت فى سفر او ماشابه وأنا لفيت مصر كلها بها حتى سيناء كمان وعملت بها 500 كيلو فى سيناء فى يوم واحد ورجعت من مطروح بدون توقف واسكندريه رايح جاى فى خلال 6 ساعات متضمن الوقت داخل البلد ولكن كل هذا بعده شروط :
1- لابد من استخدام قطع غيار أصليه من مستورد محترم حتى لو غاليه
2- بلاش بنزين 80 وخليك فى 92 وهى موفره جدا فى البنزين
3- اختار ميكانيكى كويس وذو خبره وتعامل معه فقط
4- ركب رادياتير خاص ب 128 وانسى السخونه وهى مجهزه لذلك
5- ركب كاوتش عريض بحد أقصى 155/70/13 وده سوف يحافظ على العفشه ويجعلها ثابته تماما
6- عاملها على انها سياره محترمه ولاتبخل عليها فى شىء وعمرها ما هاتخذلك ابدا
7- دائما فى شنطه السياره سلك دبرياج اصلى وسير دينامو مشرشر اصلى وعمره ماتقطع لكن سلك الدبرياج ممكن يعملها معك
8- ركب كتاوت منفصل للمارش وأخر للنور مع لمبات زئبق
9- خليك فى السوبر فيورا 86 علشان تكون حالتها كويسه وأعتقد السعر فى حاله السياره النظيفه سواء 127 او سوبر فيورا لن يقل عن 14 ألف
ده اللى انا فاكره واتمنى لك التوفيق

اهم عيوبها البرومة ممكن تكون في اي حتة (الدوسات الكرتيرات الشنطة القنطرة العتب ...........) كل العيوب بتاعة ال128 فيها. كرهتها؟ :)
لا طبعا اي عربية فيها عيوب المهم تعرفها وتتعايش معاها العربية جميلة جدا بتتصلح ببلاش تقريبا اعطالها زي اي عربية من سنها بس تمتاز ان اي حد بيشتغل فيها وقطع غيارها عند السوبر ماركت تحت البيت :)
بس مش بتاعة جري اخرها 100-120 وبتبقى مش ثابتة بعد كدة. تستحمل السفر والزحمة والمشوير اللي زي الزفت المهم ايدك تبقى فيها علطول ومتأجلش تصليح حاجة فيها
الفتيس4 غيار 600جنية بس ال5غيار غالي 1200 لو لقيته. الكبوت و البيبان غاليين طبعا عشان الاستيراد منها قليل (عربية قديمة ومش موجودة برة) موضوع الرش جوة بسبب البرومة يعني لو مش عاملة حوادث مش مهم
زي ما الاستاذ ايمن قالك عاملها زي اي عربية غالية ومتبخلش عليها وهتبقى معاك زي الفل
وربنا يوفقك للصالح

بجد انا تعبتكم معايا اوى واشكركم للردود
بس ليا سؤال هى بتفتح شاسيه زى ال 128 ؟؟
وهل فعلا الفيورا افضل من النصر حتى لو النصر حالتها كويسه؟؟
وهل الفتيس ال 5 غيار فعلا بيريح العربيه اكتر من ال 4 غيار على السرعات العاليه والمسافات الطويله؟؟

اقتباس:

---

المشاركة الأصلية كتبت بواسطة new_man

هل الكلام ده لان العربيه اللى كانت معاك كان فيها عيوب؟؟
ولا كل ال 127 كده؟؟

---

والله تانى يد وكانت مرفوعه 15 سنه وبتاعت خالت واحد صاحبى ومعروف السى فى بتاعها كويس
وكانت حالتها ممتازه
العيوب اللى قابلتنى
عفشه سيئه جدا جدا كتصميم وخدمه يجب الربط عليها كل 1000 كيلو باستمرار(غير العيب الازلى انها تحك لو اتنين تخان ركبو ورا)
اسوء جوده لقطع الغيار كمثال ممكن تغير قاعده موتور كل سنه
المحرك محتاج ضبط كل 500 كيلو(كنت بسافر وبمشى 120)
فرامل ضعيفه فى موديلات السيرفو ورايحه فى موديلات الماستر(مقارنه بالفرامل الخرافيه للفرنساوى)
الفتيس ضعيف دايما فى دقره فى الاول او الاول والتانى
كل ده والعربيه سليمه مفيهاش نقطه بارومه او سمكره والموتور انا اول واحد يحله يعمله شنبر

اقتباس:

---

المشاركة الأصلية كتبت بواسطة rotanamasoud

والله تانى يد وكانت مرفوعه 15 سنه وبتاعت خالت واحد صاحبى ومعروف السى فى بتاعها كويس
وكانت حالتها ممتازه
العيوب اللى قابلتنى
عفشه سيئه جدا جدا كتصميم وخدمه يجب الربط عليها كل 1000 كيلو باستمرار(غير العيب الازلى انها تحك لو اتنين تخان ركبو ورا)
اسوء جوده لقطع الغيار كمثال ممكن تغير قاعده موتور كل سنه
المحرك محتاج ضبط كل 500 كيلو(كنت بسافر وبمشى 120)
فرامل ضعيفه فى موديلات السيرفو ورايحه فى موديلات الماستر(مقارنه بالفرامل الخرافيه للفرنساوى)
الفتيس ضعيف دايما فى دقره فى الاول او الاول والتانى
كل ده والعربيه سليمه مفيهاش نقطه بارومه او سمكره والموتور انا اول واحد يحله يعمله شنبر

---

مع احترامى لكلام حضرتك العيوب دى ليس لها وجود لأنى كنت بسافر مسافات طويله وعلى سرعات عاليه 140 وساعات 150 ايام ماكانت جديده حتى اول عمره وكانت ثابته وركبت الكاوتش العريض لزياده الثبات والأطمئنان وفراملها كويسه عاديه مش سيرفو واول عمره عملتها كانت بعد 300000 كيلو وانا رجلى ثقيله جدا وبسوق بسرعه العيب الوحيد كان فى المطبات ممكن بسهوله تجيب زوايا والعربيه كانت معى من الزيرو عام 1983 واتعلمت السواقه عليها ولينتها على 5000 كيلو والزوايا امامى وخلفى وده السبب فى عدم ضبط السياره والحكه فى الرفرف الخلفى وفى الأخر بتيقى ساعات حظوظ طالما انتاج مصرى أو يمكن انا كنت من الدفعات الأولى .. وشكرا

كده انا اتحيرت!!!
طب انا لو دخلت فى المقارنه معاه سيتروين ax بس هتزيد الميزانيه ل 16 الف مثلا
مع الفارق ان السيتروبن موديل 95 وفيها تكييف وماتور 1400 سى سى وزجاج كهربا وافضل شكلا
هاه كده انهى الافضل من خيث متطلباتى اللى ذكرتها فى الاول؟؟

لو تعرف تجيب مازدا 323 يبقى كده كويس

اقتباس:

---

المشاركة الأصلية كتبت بواسطة ayman2

مع احترامى لكلام حضرتك العيوب دى ليس لها وجود لأنى كنت بسافر مسافات طويله وعلى سرعات عاليه 140 وساعات 150 ايام ماكانت جديده حتى اول عمره وكانت ثابته وركبت الكاوتش العريض لزياده الثبات والأطمئنان وفراملها كويسه عاديه مش سيرفو واول عمره عملتها كانت بعد 300000 كيلو وانا رجلى ثقيله جدا وبسوق بسرعه العيب الوحيد كان فى المطبات ممكن بسهوله تجيب زوايا والعربيه كانت معى من الزيرو عام 1983 واتعلمت السواقه عليها ولينتها على 5000 كيلو والزوايا امامى وخلفى وده السبب فى عدم ضبط السياره والحكه فى الرفرف الخلفى وفى الأخر بتيقى ساعات حظوظ طالما انتاج مصرى أو يمكن انا كنت من الدفعات الأولى .. وشكرا

---

اكيد الزيرو وضع مختلف بالنسبالك ولما ركبت عربيات اعلى حسيت فعلا بالفرق اللى ابسطه انعدام المصروف بعد تظبيت عربيه محترمه ان يبقى مصروف العربيه بنزين وزيت بعد شده مظبوطه وده حصل معايا فى الفرنساوى

اقتباس:

---

المشاركة الأصلية كتبت بواسطة new_man

كده انا اتحيرت!!!
طب انا لو دخلت فى المقارنه معاه سيتروين ax بس هتزيد الميزانيه ل 16 الف مثلا
مع الفارق ان السيتروبن موديل 95 وفيها تكييف وماتور 1400 سى سى وزجاج كهربا وافضل شكلا
هاه كده انهى الافضل من خيث متطلباتى اللى ذكرتها فى الاول؟؟

---

انا ركبت الax اربع سنين تقريبا فيهم سنتين بنزين وزيت بعد شده صح (بس الاصل تكون العربيه سليمه)
وكبرتها لما عجبتنى بzx بس لازم تكون فاهم كام نقطه
العربيه معمره واعتماديه لاقصى مدى بس تكون مشدوده صح
لازم تفهم انها اتقل شويه فى البيع وان ناس بتخاف منها (ثقافه السوق المصرى)
لو عايز معلومات مفصله عنها راجع مواضيعى او اسئلنى

اقتباس:

---

المشاركة الأصلية كتبت بواسطة ayman2

ولكن كل هذا بعده شروط :
1- لابد من استخدام قطع غيار أصليه من مستورد محترم حتى لو غاليه

---

منين يا باشا بقى قطع الغيار الاصلى علشان اللى مالى السوق صينى و مضروب ؟؟؟

اقتباس:

---

المشاركة الأصلية كتبت بواسطة maka

منين يا باشا بقى قطع الغيار الاصلى علشان اللى مالى السوق صينى و مضروب ؟؟؟

---

مازال هناك بعض المحلات وبعض المستوردين الشرفاء (حتى لو صينى ) لكن لانسمع عنهم لأن اسعارهم مرتفعه بعض الشىء عن السوق لكن أؤكد لك انهم موجودين وانا بتعامل مع بعض منهم

طاب ما تقولنا اماكنهم و اسماء محلاتهم حتي لو علي الخاص

اشترى جولف 1 برقبه اى 27 او ستروين وبنفس سعر ال 127 عربيه قويه مواتير قويه بتسافر واسعه من جوة قطع غيار جولف 2 وبولو وابيزا متوافرة ومش غاليه سيبك من الفيات

حسب العربية سليمة ولا لا
لو سليمة شايفها اعتمادية جدا فرأي

واحد صاحبي العربية دي طلعت مع والده موديل 85 من الزيرو بسم الله ما شاء الله والله جميلة جدا وسواقتها ممتعة ومريحاهم في البنزين قوي مع ان معاهم شاهين وعايزين يغيرو الشاهين انما ال127 ابدا

اقتباس:

---

المشاركة الأصلية كتبت بواسطة new_man

انا خدت بالى ان عجلها من ورا مقوس فهل ده عادى؟؟

مش مقوس .. ده العادى

ورقم الكارتيره بيكون فى الحوض ولا القايم؟؟

فى القائم

وهل فعلا معظم ال 127 بيكون راشش من جوه؟؟وهل ده يعيبها اوى؟؟

لا يعيب الفيات القديم الرش طالما الشاسيه حالته كويسه

وهل فعلا اغلى حاجه فيها الفتيس والكبوت؟؟

فى قطع غيار استعمال الخارج بصفه عامه الفتيس - الكبوت - التابلوه اسعارهم غاليه شويه

وهل ماتورها صوته عالى فعلا؟؟

مش صوته عالى و انما صوته فيه زنه لان العربيه حوضها ضيق جدا و الموتور ناحيتك و انت سايق

وهل تستحمل الجرى لمده ساعتين مثلا فى السفر على سرعة 100 من غير راحة؟؟

تستحمل بشرط تكون العربيه حالتها كويسه

وهل بتسخن ولا لا؟؟

بتسخن داخل المدينه فى الزحمه لكن فيه حل للسخونه بتركيب راداتير نحاس بتاع 128 بمروحته و تغيير ترموستات بواحد اعلى

وياترى كبوتها بيتفتح بسهولة ويتسرق منها البطاريه زى ال 128 ولا ده فى ال 128 فقط؟؟

بيتفتح بسهوله للاسف .. كل العربيات القديمه كده (128 - 131 - لادا - ... )

لو فيه اى معلومات عنها ياريت حد يقولى عليها وجزاكم الله خير

1- استخدم قطع غيار من مكان مضمون (احمد محرم عين شمس - الكيلانى ش شامبليون - فيات 2000 ش رمسيس - محمد يوسف الدقى)

2- لازم تربط العفشه باستمرار و تبص على المساعدين كل الف كيلو

3- استخدم زيت التعاون البرتقالى او الازرق حسب حاله الموتور

4- لو هاتحط بنزين 80 حطه من بنزينه نظيفه (وطنيه مثلا) و نظف الكاربيراتير كل فتره

5- راجع على الكهرباء عند كهربائى كويس و ركب كتاوت لاى حاجه مضافه فى العربيه (انذار - سنتر - لمبات اماميه عاليه - ...)

---

بالنسبة لاسالة حضرتك العضو مواطن مصري رد عليها بس انا سمعت ان رقم الكارتيرة بيكون في القائم لما البارومة تمسك في الكارتيره فالافضل لو دورت دور على الرقم اللي في الكارتيرة مش القائم. تاني حاجة صوتها عالي عشان سير الكاتينة في العربية دي جنزير مبيتقطعش وده اللي بيخلي صوتها عالي شوية بس والله عربية سواقتها ممتعة فعلا للي بيحب العربية دي

انا جبتها خلاص وظبطت فيها حبة حاجات
بس بعد ماظبطتها فيها الاتى
الشكمان صوته عالى وفيه حليه كده زى الديفل بتعمل صوت عالى..ياترى الصوت العالى من الحليه ولا الشكمان نفسه تعبان؟؟
وانا طالع فى الكبارىممكن تضرب باك فاير واحد بس ده لما بدوس بنزين جامد وانا لسه فبدايه الغيار بس فطلعة الكوبرى بس..مع انى مظبط كهربا كويس
الدركسيون بالعمود بتاعه بيتحركو من مكانهم
المرايات الجانبيه بتاعتها سيئة جدا وهى زى اللى فكل ال 127 اللى شفتها