الموضوع: شرم الشيخ بالعربيه رايح جاي

المشاركة الأصلية كتبت بواسطة SAbuhashem

حد جرب يسافر شرم بالعربية قبل كده

ايوة, كل شهرين تلاتة لازم اروحها.

المشاركة الأصلية كتبت بواسطة SAbuhashem

طالعه في دماغي أروح شرم بالعربيه وعاوزها تكون رحله وفسحه على الطريق

هل هتكون رحلة ممتعة عن تجربة أي شخص واللا هتكون متعبة والطيران أحسن

هتكون لطيفة لو انت بتحب سواقة السفر.

المشاركة الأصلية كتبت بواسطة SAbuhashem

والمسافة الكلية حوالي كام كيلو متر تقريباً من القاهره

520 كيلو من مصر الجديدة لحد قبل نعمة جوة شرم.

المشاركة الأصلية كتبت بواسطة SAbuhashem

سؤال أخير في رادارات ولجان كتير على الطريق ؟

طريق السويس علية رادار.

انت تطلع من هنا 3 الصبح كدة و تاخد طريق السويس لحد مدخل النفق (90 كيلو) و بعدين طريق النفق (20 او 25 كيلو) و بعد النفق بقى طريقك اخضر, مستقيم علاطول.

هتقابلك 3 لجان و غالبا بيشوفوا رخص بس (لو مش عربيتك اعمل توكيل ادارة عشان بيغلسوا جامد) و سعات بيشوفوا بطايق (بس قليل) و فى مدخل شرم هيشوف بطايق و رخص و يسالك جى لية و مين اللى معاك دول.

من بعد طريق السويس مفيش ولا رادار. انا كنت ببقى ماشى على 140 الصبح عادى و هتلاقى الطريق بيشجعك لانة فاضى و شبة مستقيم.

خللى بالاك قبل شرم ب 30 او 40 كيلو كلها ملفات فا متجريش.

حلاوة العربية فى شرم انك تروح اللى انت عايزة من غير ما تشيل هم التاكسيات عشان اقل مشوار هناك ب 10 او 20 جنية و معاك لحد 50.

بالمناسبة, شرم دلوقتى بقيت مليانة خروجات و حتت فا مش هتخلصها و مش هتزهق.

سعات فى طريق السلام قبل نعمة و بعديها بيحطوا رادار 60 و بيسيبك لحد 80 عشان فية ناس كتير متعرفش الموضوع دة.

و تروح و تيجى بالسلامة.

انا سافرتها كتير الطريق مش و حش و مش حلو علشان بعد النفق هتلاقى الطريق فرده واحد رايح جاى يعنى هاتقطع 350 كيلو على فرده واحده حتى مافيش رصيف فى النصف رجاء متزودش السرعه عن 120 _ 140 بالكتير اوى علشان سعات بتلاقى ملفات فى الطريق يادوبك تلحق تاخدها وانت مستريح

الواقين على الطريق محترميين جدا جدا عن تجربه انا سافرت على الطريق ده كذا مره الصبح و بليل بليل لو انت عايز تعدى منه و هو شايف ان فى عربيه جايه فى وشه يديلك انتظار علشان ماتعديش او اشاره شمال و اول ما العربيه تعدى يديلك اشاره يمين على اساس انه هايفتحلك الطريق و تعدى انت الصبح السفر فيه افضل بكتير يعنى تصلى الفجر و تتحرك احسن حاجه عقبال ماتوصل للطريق الفرده الواحده هايكون نور ربنا طلع و تشوف الطريق كويس قدامك خلى بالك قبل شرم ب 60 كيلو غصب عنك هاتمشى 60 علشان الملفات هناك غبيه جدا

انا بفضل العربيه فى شرم علشان الموصلات هنا غاليه بطريقه بشعه

رحله سعيده

شكراً يا رجالة على التفاصيل دي كلها
ممنون ممنون

وشكراً للدعاء والله يسلمكو جميعاً

حاجة كمان لو سمحتوا

أنا لي صديق عزيز طلبت منه إنه يظبطلي ٤ ليالي و-٥ أيام في هوتيل معين
في حال إذا منجحتش المهمه

على بداية شهر ١٠ كدة إن شاء الله بتكون أسعار ال-٤ نجوم وال-٥ نجوم حوالي كام فل بورد وهاف بورد

وهل بيكون في إمكانيات حجز واللا بردو كله محجوز وأحاول احجز من دلوقتي
يا سلام بقى لو واحد وارث هوتل في شرم ويجبلي غرفة فل بورد عنده ويعملي ديسكاونت يبقى تمام

أنا حاسس اني تقلت في البوست ده شويه :)


Thanks
Eng.Sherif Shaker

هيه اكيد رحله طويله .. بس هتبقى رحله لذيذه طريق السفر دائما ممتع ..

بس ياترى في على الطريق استراحات نظيفه زي El Master اللي على الطريق الصحراوي او سفاري او امارات مصر !!

ولا كلها حاجات تعبانه كده و اكشاك !!!

ياريت بقه يا باشمهندس تاخد معاك شوية مكسرات كده و شندوشتات علشان الطريق طويل وابقى اشتري كانز من الطريق