هل عيوب سي فور c4 فتيس دينامو علبة فيوزات طرمبة بنزين

أحد مالكى السى فور وأنا بحاول أشترى منها مستعمل قالى إن عيوبها
فتيس يتصلح بـحوالى 3 آلاف , دينامو , علبة فيوزات , طرمبة بنزين كل حاجة منهم لو أصلى ومن التوكيل تعمل تقريبا
2.500 إلى 2.700
فحبيت أعرف آرائكم فى العيوب دى وهل فعلا صحيحة , ويا ترى فيه أى عيوب تانية , وابتداءً من أى موديل العيوب دى
اختفت لو موجودة
, لأن سعر العربية مستعمل كويس وطبعا ثباتها عالى وكنت كلمت المهندس إيهاب بناءً على شكر أعضاء المنتدى فيه وسألته عن عيوب العربية ولم يخبرنى إلا عن الفتيس فقط , فيا ريت أعرف رأيكم , ولو أشتريت تبقى عاملة كام كيلو أو تحديدا المشاكل دى بتظهر عند كام كيلو

مش عيوب جوهرية
سواء
دينامو , علبة فيوزات , طرمبة بنزين
لكن حكاية الفتيس هي ال تقلق
ياريت ملاكها الكرام يفيدوا
المغرمون الجدد بها امثالنا
:coming-soon[1]:

كل الجيل دا من العربيات الفرنساوى واحد و نفس العيوب اللى حضرتك ذكرتها
بيجو 307
رينو مبيجان
c4

اغلب مشاكل الفرنساوي بتبقى بسبب الاهمال في الصيانة
لو إنت معملتش الصيانة في معادها
ده ميبقاش عيب من العربية
والإهمال ده غالبا بيبقى بسبب سعر اعادة بيعها القليل
واحد يبقى شاريها و عاوز يعاملها زي verna أو lanos مثلا

بالنسبة للفتيس
النتشة دي ,هي طبيعة الفتيس كده

أما ال solenoid
دي بتبقى بسبب الاهمال فيه أو عمر افتراضي
غير زيت أصلي على 60 ومش هيبقى عندك مشاكل

وعلى فكرة دي مش مشكلة الفرنساوي بس
دي بتحصل في أي فتيس بـ torque converter لما يقدم

بتحصل في ال a5 و ال megane و بدأت تحصل في ال cerato برده
وابقوا اسألوا أبوليلة

هي مشهورة في الفرنساوي بس لأن معظم عربياته المعروضة في السوق قديمة 2005-2008
وغالبا بيبقى اصحابها تجار و ملصمينها


الطرومبة المفروض ليها عمر افتراضي بتتغير عنده
لو ما اتغيرتش بتضرب وساعتها عندك حلين
1. تغير الموتور بتاعها بـ 200 جنيه (ده bosch ويستحسن تجيبه من التوكيل عشان فيه مضروب كتير)
2.تجيب واحدة استيراد بـ 1000


علبة الفيوزات دي مش عيب
أي عربية ورد إن تحصل فيها مشكلة في علبة الفيوزات
و أنا عن نفسي مسمعتش حد اشتكى منها بأمانة

أما الدينامو ده فعلا عيب فيها مع إنه mitsubishi ياباني !!!!!!!!
بيضرب ومالوش ميعاد معيَّن
ممكن على 40 أو 80 أو بعد كده , إنت وحظك
وعندك حلين :

1.تجيب واحد استيراد valeo بـ 1500 و تخلص من وجع الدماغ ده
ودة اللي أنا عملته
2. تغير كتاوت بس دي غالبا فترة و بتضرب تاني لأن اللي في السوق مش كويس
بس سمعت إن فيه نوع كوري ممتاز بـ 350 جنيه (بيبيعه إيهاب جلال)

يا ريت أكون ساعدتك
واي استفسار تاني أنا معاكم :)

حاجة زيادة برده :)

مشكلة الفرنساوي إنه لما بيعطل بيقف غير الكوري حقيقة
مشاكله مش بتوقف العربية

يعني عارف والله العظيم
عندنا lanos ماشية 60 ألف و megane ماشية أكتر من 100
ال megane عطلت مرة software ومرة compressor التكييف اتغير في الضمان أول ما جبناها
غير كده ولا الهوا ما شاء الله

اللانوس بقى حاجات عبيطة بس كل شوية تلاقي حاجة

* فيوز ضرب -حاجة هابلة- بس خلت الكهربائي لف حوالين نفسه
* علبتين شكمان
* خراطيم تكييف وجلد و.....
ده غير شحنه كل سنة
* مراية الصالون بتقع
* سلك نور يضرب
* دهان يبهت من لوحده

والله الفرنساوي مش زي ما الناس فاهمة خالص
مش عشان معايا والله ده بأمانة

ولو أنا هشتري مستعمل هجيب فرنساوي تاني لانه سعر ممتاز في المستعمل
بس المرة اللي جاية إن شاء الله DS4

ده ال C4 ال 2006 بتتباع بـ 65-70
وال lanos بـ 50-55 LOL

يعني فرق 10 الاف وطبعا مش محتاج أقول الفرق بين الاتنين إيه
حتى لو مش باعتمادية الياباني أو انتشار الكوري

وعلى فكرة قطع الغيار موجودة ومش عاوز أقول إنها من أكتر الماركات الأوروبي انتشارا كمان
بصوا على fiat أو VW أو seat مثلا

وقطع الغيار موجود منها استيراد وجديد و كذا نوعية
فيه تايواني و اسباني و فرنساوي و اتحاد اوروبي
وكله بتمنه

ده حاجتها ارخص من اسعار الكوري اللي بسمعها في المنتدى هنا
على سبيل المثال : الصني الجديدة وال RB

تخيلوا ؟

يا ريت أقدر أصف زوق وأدب الباشمهندس أحمد عادل وأمانته فى النصح
الحمد لله شرفت بالتحدث معاه واستمر الحوار حوالى ساعة وفعلا مش هقدر أوصف سعة صدره وأخلاقه المحترمة , وشهادة منى أنه بيتكلم دون تعصب على الإطلاق وعن فهم ودراية باللى بيقولوه
وعلى فكرة كان الكلام بنفس مضمون مشاركاته المكتوبة علشان الفائدة تبقى للكل
جزاك الله خيرا يا باشمهندس

اقتباس:

---

المشاركة الأصلية كتبت بواسطة SAWA1SAWA

يا ريت أقدر أصف زوق وأدب الباشمهندس أحمد عادل وأمانته فى النصح
الحمد لله شرفت بالتحدث معاه واستمر الحوار حوالى ساعة وفعلا مش هقدر أوصف سعة صدره وأخلاقه المحترمة , وشهادة منى أنه بيتكلم دون تعصب على الإطلاق وعن فهم ودراية باللى بيقولوه
وعلى فكرة كان الكلام بنفس مضمون مشاركاته المكتوبة علشان الفائدة تبقى للكل
جزاك الله خيرا يا باشمهندس

---

كل التحية للاستاذ/احمد
من ساعة ما c4 دخلت دماغي
وانا
متابع مشاركته ومواضيعه التي توضح كل شئ عن العربية
في قسم الستروين
وفعلا الاوربي سعره في المستعمل لا يتناسب مع متانة وقوة وجمال وكمالياته
وانتظروني معكم قريبا في القسم
:coming-soon[1]:

والله ما عارف أقول إيه
ده من ذوقكم والله

أنا حصلي الشرف إني اتعرف على العضو المحترم sawa1sawa
و إن شاء الله اتعرف على أستاذ waleedrahmy برده

واهلا بيكم معانا مقدما

أستاذ محمد

أنا بجهز لحضرتك الحاجات اللي تكشف عليها وهعملها في موضوع إن شاء الله
عشان تبقى مرجع لكل اللي عاوز يكشف على عربية

اقتباس:

---

المشاركة الأصلية كتبت بواسطة A.Adel

أستاذ محمد

---

اقتباس:

---

المشاركة الأصلية كتبت بواسطة A.Adel

أنا بجهز لحضرتك الحاجات اللي تكشف عليها وهعملها في موضوع إن شاء الله
عشان تبقى مرجع لكل اللي عاوز يكشف على عربية

---

ربنا ما يحرمناش من ذوقك يا باشمهندس
بس صاحب العربية اللى ماشية 100 ألف تقريبا خلص مع حد تانى , وبصراحة أنا كنت متردد بسبب فترة الصيانة ابتداءً من 60 ألف لأنه كان بيعملها فى أى مكان , غير إن الوالد رفض تماما وانا بحترم رغبته طبعا على أساس إن جزء كبير من فرحتى بالعربية هى فرحة البيت وأسرتى بيها , وبعد موافقته على المساعدة ممكن أوسع نطاق بحثى فى c4 لحد موديل 2009 إلى 2011 مستعمل وأضيف بيجو 308 كمان عن نفس السنوات باعتبار إن السى فور 2006 , 2007 المعروضة قليل جدا

وبرضوا ما نستغناش عن رأيك يا باشمهندس وحابب أستشيرك هل رنج سعرهم مستعمل هو 90 ألف للأقل من 60000 وقطع غيارهم أسعارها عملة إية وقريبة من إية فى اليابانى وموجودة ولا لأ , والمهندس إيهاب وأمير وجوزيف بيشتغلوا فى الموديلات لحد السنوات دى كويس وبحرفية ولا أخلينى فى موديلات 2006 , 2007
وعلى فكرة كلمت واحد النهاردة كان عارض c4 2011 بــ 100 وعمله 41 ألف كيلو وتخيل باعها على 85 ألف فهل ده الرنج بتاعها فعلا
و أخيرا يا ريت أعرف هى مشاكلهم هى نفس المشاكل بتاع موضوع المشاركة وتتعالج بنفس التكلفة ولا زى ما سمعت من بعض ملاك البيجو إن قطع غياره غالية جدا وهل تفرق عن قطع غيار السيتروين