التبريد في بيرسونا

**eslamcentre88** · 13-08-2013 09:23 PM

لو سمحتم ,
هل طبيعى ان بعد تبطيل الموتور و قفل العربيه بيرسونا 2012 مروحة التبريد تفضل شغاله ؟
بتشتغل فتره طويل ممكن من 5 ل 10 دقايق و بتكون اكتر من مروحه و صوتهم عالى
الموضوع دا بيحصل في الصيف لكن في الشتاء نادر جدا لما يحصل
هل دا ليه علاقه بقصر عمر البطاريه ؟ لانى اضطريت اغير البطاريه رغم ان العربيه بقالها معيا سنه و شهرين

**a7mad_mo7amad6** · 13-08-2013 10:06 PM

لا مش طبيعي يباشا...
غالبا هتلاقي الثرموثتات ضرب او دورة التبريد فيها هوا او في تهريب مياه
بس غالبا هتلاقيه الثرموثتات لانه مشاكله كتير

انا عانيت من الموضوع ده اول الصيف بس بمجرد حليت مشكلة الترموثتات المروحة بقت تفصل مع قفلة الكونتاكت

**tutankhamoun** · 14-08-2013 06:09 AM

الجين 2 عملت معايا كدا من أسبوع مرتين ورا بعض

غسلت الرادياتير من برة مع السربنتينة .......... نزلت شوية تراب .......... من بعدها معملتهاش تاني .

كدا فيه حاجة في دورة التبريد مش مظبوطة

روح البنزينة اللي فيها غسيل عربيات
و خلى الواد بتاع البنزينة يغسل الرادياتير و السربنتينة و تاخد بالك مينزلش حاجة على الموتور .

و شوف و قلنا ايه الأخبار

**lad** · 14-08-2013 07:52 AM

لا مش طبيعى زى الاعضاء ما تفضلو و قالولك

**ahmedsiyam** · 15-08-2013 02:25 AM

الحل الجذرى انك تفك كوعة الثرموستات تماما بحيث ان دورة التبريد تفضل مفتوحة على طول
و انا عملت كده فى الجين 2 و فضلت مستمر على الوضع ده سنتين لحد لما بعتها بدون أى تأثير يذكر على أداء العربية .
بالعكس الزيت بيقعد معاك أكتر شوية لانه مابيسخنش كتير و أداء الموتور بيبقى ممتاز
الفكرة كلها إنك بدل مابتسخن العربية الصبح 3 دقائق بتحتاج لخمس دقائق و بعدها تتحرك براحتك علشان تاخد اداء كويس منها .

**D . a .\ AYMAN** · 25-08-2013 05:24 PM

أنا عندي في البيرسونا العربية بتعمل كدة من ساعة ما جبتها .. بس بعد المشاوير المحترمة والسرعات العالية لمدة طويلة زي السفر أعتقد

لسة عاملة معايا كدة برضه وأنا رايح مطروح الإسبوع اللى فات .. بس في ملاحظة كمان هي مش بتعمل كدة غير لما أطفيها بس أسيب الكونتاكت مفتوح .. لكن لو طفيت وطلعت المفتاح من العربية خلاص مش بتعمل حاجة

عموما أنا مش قلقان لأن المؤشر عندي كويس ودرجة الحرارة مش بتعلى

**moh2015** · 28-08-2013 09:37 PM

حصلت معايا والعربية كانت بتسخن
أول مرة غيرت رادياتير ضمان في ال 5000 كيلو
ثاني مرة غيرت ثرموستات ضمان في 10000 كيلو
ثالث مرة غسلوا الرادياتير والسربنتينة في ال 20000 كيلو وبعدها باسبوع رجعت المشكلة تاني

**hadota_masreya** · 29-08-2013 10:52 AM

اسلام باشا
هارجع اقول نفي اللى الأعضاء المحترمين قالوه - كده عندك مشكله فى دورة التبريد و لازم تكشف اذا كان السبرنتينة بتاعة الريداتير بتسرب ماء ولا لأ و فى كل الأحوال اغسل الريداتير كويس و لو مافيش اي تسريب خلى بتاع الريداتير يعملك تسليك فى المواسير اذ ربما يكون فى سد فى المواسير الخاصه بيه.
أما بقى موضوع ثرموستات الكوعة - فأنا مش برجحه على الاطلاق على الرغم من انى شايله. الموضوع بيأثر فعلا على اداء العربية بالذات فى الشتاء - ممكن تقعد جمبها قد 10 دقايق على ماتسخن و تعرف تمشى بيها كويس لكن لو دورت و استنيت دقيقه كده و ابتديت تتحرك هاتلاقى معاك رجرجه فى العربية و مش هاتسحب معاك غير لما تسخن (زي حالاتى).
اه هو اوقات بيبقى فى مشكله من ثرموستات الكوعه لكنه بيتغير زي اي حاجه تانية فى العربية بتتغير.

و نصيحه ليك و لاي عضو بيقرأ الموضوع ده - اوعى تستهون بالحرارة أو تتأقلم مع المشكلة لأنها هاتعمل مشاكل اكبر مع الموتور نفسه.
و العضو الاستاذ أيمن عايز أقوله لأ كده انت عندك مشكله فى العربية و ياريت تحاول تحلها سواء مع التوكيل او عصام و صفا

للعلم أي حد عنده الكتالوج بتاع العربية هايلاقى فى جزء فى موضوع الحرارة ده بيقول ان فى بعض الحالات النادرة و ظروف ارتفاع حرارة الجو تستمر مراوح التبريد بالعمل بعد اغلاق السيارة.